မေ – ၂၆ ၊၂၀၂၅ ၊ ဆိုင်းမင်း/People’s Spring
ရှမ်းပြည်အရှေ့ပိုင်း ၊မိုင်းလားဒေသမှာ လက်နက်ကိုင်အဖွဲ့အစည်းတွေနဲ့ နိုင်ငံရေးအဖွဲ့အစည်းတွေ ကို လက်သင့်ခံထားတာမရှိဘူးလို့ အမျိုးသားဒီမိုကရက်တစ်မဟာမိတ်အဖွဲ့ (NDAA) ရဲ့ ဒုတိယ ဥက္ကဋ္ဌဦးစန်ပေ့က အာဏာ သိမ်းစစ်ကောင်စီခေါင်းဆောင်နဲ့ မေလ ၂၅ ရက်တွေ့ဆုံရာမှာအသိပေးပြောဆိုပါတယ်။
ရှမ်းပြည်နယ်၊ ကျိုင်းတုံမြို့အခြေစိုက် ၊တြိဂံတိုင်းစစ်ဌာနချုပ် မှာ စစ်ကောင်စီခေါင်းဆောင်နဲ့ မိုင်းလားအဖွဲ့ လို့ လူသိများတဲ့ NDAA တို့ တွေ့ဆုံရာမှာ အခုလို ပြောဆိုအသိပေးတာလို့ စစ်ကောင်စီထိန်းချုပ်ထားတဲ့နိုင်ငံပိုင်သတင်းစာက ဖော်ပြပါတယ်။
မိုင်းလား အဖွဲ့ ဒု ဥက္ကဋ္ဌဦးစန်ပေ့ က NDAA ဟာ ဒို့တာဝန်အရေးသုံးပါး အဓိကထားဆောင်ရွက်နေတယ်ဆိုတာကို စစ်ကောင်စီခေါင်းဆောင်ထံအသိပေးခဲ့ပါတယ်။
Public Service Announcement
အာဏာသိမ်းစစ်ခေါင်းဆောင်ကလည်း လက်ရှိမှာ ပါတီစုံဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ ပြည်ထောင်စုစနစ်ကို လျှောက်လှမ်းနေပြီဆိုပြီး NDAA အဖွဲ့နဲ့တွေ့ဆုံပွဲမှာ ပြောခဲ့တယ်လို့သိရပါတယ်။
မနေ့က တွေ့ဆုံပွဲနဲ့ ပတ်သက်ပြီး NDAA ဘက်က သတင်းထုတ်ပြန်တာမျိုး မတွေ့ရသေးပါဘူး။
မိုင်းလားအဖွဲ့ (NDAA) ဟာ ၁၉၈၉ ခုနှစ် မှာ ဗမာပြည်ကွန်မြူနစ်ပါတီ(ဗကပ) က ခွဲထွက်တည်ထောင်ခဲ့တဲ့တိုင်းရင်းသားလက်နက်ကိုင်တပ်ဖွဲ့ဖြစ်ပါတယ်။ အဖွဲ့ခေါင်းဆောင်ကတော့ ဗကပ အမှတ် (၈၁၅) စစ်ဒေသမှုး ဦးစိုင်းလင်းဖြစ်ပါတယ်။
ဦးစိုင်းလင်း ရဲ့ဇနီးဟာ ကိုးကန့်တပ် (MNDAA) တည်ထောင်သူ ဦးဖုန်ကြားရှင် ရဲ့ သမီးဖြစ်ပါတယ်။ ၂၀၀၉ ခုနှစ်မှာတော့ စစ်တပ်က ဦးဖုန်ကြားရှင်ကို ဖမ်းဆီးချိန်မှာ ယောက္ခမ ဖြစ်သူကို ဦးစိုင်းလင်းက သူရဲ့ နယ်မြေထဲမှာ ခိုလှုံခွင့်ပေးခဲ့ပါတယ်။
ဦးစိုင်းလင်းတည်ထောင်တဲ့ NDAA ဟာ ဗကပကနေခွဲထွက်ပြီး နှစ်လအကြာမှာပဲ စစ်အစိုးရ နဲ့ အပစ်ရပ်ပြီး ယခင် ဗကပ ရဲ့ စစ်ဒေသ (၈၁၅) ရဲ့ နယ်မြေဖြစ်တဲ့ ရှမ်းပြည်အရှေ့ပိုင်းက နမ့်ပန်း ၊ ဆီလူး နဲ့ မိုင်လားဒေသကို စစ်အစိုးရက အထူးဒေသ(၄) အဖြစ်သတ်မှတ်ပေးပြီး အုပ်ချုပ်ခွင့်ပေးခဲ့တာပါ။
NDAA ထိန်းချုပ်အုပ်ချုပ်နေတဲ့ အထူးဒေသ (၄) ဟာ တရုတ်နယ်စပ်နဲ့ထိစပ်နေတဲ့ဒေသလည်းဖြစ်ပါတယ်။
NDAA ဟာ သူတို့ နဲ့မဟာမိတ်ဆက်ဆံရေးရှိတဲ့ ကိုးကန့်တပ် (MNDAA) ပါဝင်တဲ့ ၁၀၂၇ စစ်ဆင်ရေးမှာတော့ ဝင်ရောက်ပါဝင်တာ ၊စွက်ဖက်တာ ပြုလုပ်မှာမဟုတ်ဘူးလို့ ကြေညာချက်ထုတ်ပြန်ပြီးအသိပေးခဲ့ပါတယ်။
ပြီးခဲ့တဲ့နှစ် သြဂုတ်လ ၈ ရက်က NDAA တည်ထောင်သူ ဦးစိုင်းလင်းကွယ်လွန်သွားပြီးနောက် သားဖြစ်သူ ဦးထိန်လင်းက ဖခင်ရဲ့နေရာကို ဆက်ခံပြီး အဖွဲ့ကို ဆက်လက်ဦးဆောင်နေတာပါ။
