ဇွန်-၁၆၊၂၀၂၅။အိမ်သွင်/People’s Spring
ကချင်ပြည်နယ်၊မြစ်ကြီးနားမြို့အခြေစိုက်သော အမှတ်(၂၁၁)ခြေမြန်တပ်ရင်း (ခမရ-၂၁၁) ဒုတိယတပ်ရင်းမှူးသည် ရခိုင်ပြည်နယ်ကျောက်ဖြူမြို့သို့ တာဝန်ကျပြီးရက်သတ္တပတ်၂ပတ်အကြာ၌ တိုက်ပွဲမတိုက်ရသေးခင်အာရက္ခတပ်တော်(AA)၏စနိုက်ဘာထိမှန်ပြီးသေဆုံးခဲ့သည်။
ခမရ(၂၁၁) ဒုတိယတပ်ရင်းမှူးဗိုလ်မှူးဝင်းသန့်သည်ကျောက်ဖြူမြို့သို့မေလ၂၆ရက်နေ့က လေကြောင်းမှရောက်ရှိခဲ့ပြီး ဇွန်လ ၉ရက်မနက်က ခမရ (၅၄၂)တပ်ရင်းမှူးထံ သတင်းပို့ပြီး အပြန်တွင် စနိုက်ဘာကျည်ထိမှန်ခြင်းဟု သတင်းရရှိသည်။
“၅၄၂ ထဲကအပြန်မှာစောင့်ပစ်တာ။ဘယ်နားလဲတော့ကျတော်မပြောဘူး။ကျောက်ဖြူက စစ်တပ်ရင်းတွေနဲ့ စခန်းတွေကလွဲလို့AAကနယ်မြေစိုးမိုးထားတာပါ”ဟုဒေသခံသတင်းရင်းမြစ်ကပြောသည်။
Public Service Announcement
အသက် ၃၉ နှစ်အရွယ်ဗိုလ်မှူးဝင်းသန့်သည်မကွေးတိုင်းထီးလင်းမြို့နယ်မှ ဖြစ်ပြီး ၎င်း၏ဇနီးသည် မြစ်ကြီးနားလေဆိပ်၌ ဝာာဝန်ကျနေသည့် ဒုရဲအုပ် ဒေစီဝင်းဖြစ်သည်။ရုပ်အလောင်းကို လေကြောင်းဖြင့် ပြန်သယ်ခဲ့ပြီးနာရေးကို ခမရ(၂၁၁) အရာရှိရိပ်သာတွင် ဇွန်လ ၁၅ရက်က ပြုလုပ်ခဲ့သည်။
“လင်ရောမယားရောမြစ်ကြီးနားမှဟန်ကျနေတာကနေ ရခိုင်ကို အပြောင်းကျသွားတာ။ ရက်ပိုင်းပဲခံတယ်။ ဖောက်သည်တစ်ယောက်လျော့သွားတာပေါ့”ဟုဗိုလ်မှူးဝင်းသန့်နှင့်ဒုရဲအုပ်ဒေစီဝင်းတို့ထံ ရတနာပစ္စည်းရောင်းသူများအနက် မြစ်ကြီးနားမြို့မှ ရတနာရောင်းဝယ်သူတစ်ဦးကပြောသည်။
ဗိုလ်မှူးဝင်းသန့်မသေဆုံးမီ ရက်အနည်းငယ်ကပင် တပ်မ(၁၁)နည်းဗျူဟာမှူးဗိုလ်မှူးချုပ်ကျော်မျိုးအောင်သည် ကျောက်ဖြူမြို့တွင် AA၏ စနိုက်ဘာလက်ချက်ဖြင့် သေဆုံးခဲ့သည်။မေလ ၂၇ရက်နေ့က ကျောက်ဖြူမြို့၊ အမှတ်(၃၂)ရဲတပ်ရင်း၏ ကာကင်းစခန်းဖြစ်သောနှမ်းဖဲတောင်စခန်းသိမ်းတိုက်ပွဲ၌ဗိုလ်မှူးချုပ်ကျော်မျိုးအောင်နှင့် စစ်ကောင်စီတပ်ဖွဲ့ဝင်အချို့ သေဆုံးခဲ့ခြင်းဖြစ်သည်။ မသေဆုံးမီက ဗိုလ်မှူးကြီးအဆင့်ဖြစ်ပြီးသေပြီးမှစစ်ကောင်စီက ဗိုလ်မှူးချုပ်ရာထူးတိုးပေးခြင်းဖြစ်သည်ဟု စစ်ရေးလေ့လာသူတစ်ဦးကပြောသည်။
ယခုသေဆုံးခဲ့သောဗိုလ်မှူးဝင်းသန့်အားရာထူးတိုးပေးခြင်းရှိမရှိကို မသိရသေးပေ။
ပြီးခဲ့သည့် ဇန်နဝါရီလ၂၈ရက်နေ့ကလည်း ဧရာဝတီတိုင်း၊ သားပေါင်းမြို့နယ်၊ ကျားခေါင်းရွာတွင် တိုက်ပွဲဖြစ်ပွားနေစဉ် သာပေါင်းမြို့မရဲစခန်းမှူးဒုရဲမှူး ဝင်းနိုင်ဦးကို AAက စနိုက်ဘာဖြင့် ပစ်ခတ်ရှင်းလင်းခဲ့သည်။
ထို့အပြင် ရခိုင်ပြည်နယ်သည် စစ်ကောင်စီအရာရှိများ သေဆုံးခြင်းနှင့် အဖမ်းခံရခြင်းတို့အများဆုံးဒေသဖြစ်သည်။ရခိုင်ပြည်နယ်တွင်၂၀၂၃ နိုဝင်ဘာလ၁၃ရက်မှ စတင်သည့် ၁၀၂၇စစ်ဆင်ရေးအတွင်း ဗိုလ်မှူးချုပ်လေးဦးကို AAက ဖမ်းမိထားကာ အတည်ပြုနိုင်သော စာရင်းများအရ ဗိုလ်မှူးကြီး၅ဦးထက်မနည်းသေဆုံးခဲ့သည်။ စကစ (၁၉)၊ ရှေ့တန်းဌာနချုပ် တပ်မမှူး ဗိုလ်မှူးချုပ် ဇင်မျိုးဆွေသည် ကျဆုံး၊ ပျောက်ဆုံး၊ ရေထဲနစ်မြုပ်၊ ထွက်ပြေးလွတ်မြောက် သွားသည်ကိုအတည်ပြု၍ မရနိုင်ကြောင်း AAက ထုတ်ပြန်ထားသည်။
အာရက္ခတပ်တော်(AA)က မြို့သိမ်းတိုက်ပွဲ တိုက်ခိုက်နေသည့် ကျောက်ဖြူမြို့နယ်တွင်စစ်ကောင်စီအရာရှိများ သေဆုံးပြီး အရာရှိအချို့အဖမ်းခံရပြီးနောက်ပိုင်ရှေ့တန်းရောက်စစ်တပ်စစ်ကြောင်းများ ဖရိုဖရဲဖြစ်နေပြီးAA ထံလက်နက်ချအညံ့မှူများရှိနေကြောင်း သတင်းရရှိသည်။
မေ ၃၀ရက်နေ့ညနေ၃ နာရီခန့်ကကျောက်ဖြူမြို့နယ်၊ မင်းတက်တောင်ကျေးရွာရှိ စက်မှု၊လက်မှုသင်တန်းကျောင်းအနီးဖြစ်ပွားခဲ့သည့် တိုက်ပွဲ၌ တိုင်းစစ်ဦးစီးမှူးဒုတိယဗိုလ်မှူးကြီးကျော်လင်းကြိုင်အပါအဝင်တပ်မ(၁၁)နှင့်တပ်မ(၉၉)ပူးပေါင်းစစ်ကြောင်းမှ တပ်ဖွဲ့ဝင်၇၀ ဦးထက်မနည်း AAက လက်နက်ချခဲ့ကြကြောင်း သိရသည်။
ကျောက်ဖြူမြို့နယ်တွင် ဓညဝတီရေတပ်စခန်းအပြင် တောင်မော်ကြီးရေတပ်စခန်းနှင့် အုန်းကျွိန်ရေတပ် စခန်းတို့အပြင် ခလရ (၃၄)၊ ခမရ (၅၄၂)၊ ခမရ (၅၄၃)၊ အမှတ် (၃၂) ရဲတပ်ရင်းတို့ရှိသည်။
ထို့အပြင် စစ်မှုထမ်းသင်တန်းဆင်းများ၊ မီးသတ်တပ်ဖွဲ့ဝင်များကို အဓိကထားရှိသည့် စစ်ဆေးရေးဂိတ်များလည်းရှိနေသည်။
AAသည် ကျောက်ဖြူမြို့သိမ်းတိုက်ပွဲကို ပြီးခဲ့သည့်ဇန်နဝါရီလမှစတင်၍ အရှိန်မြှင့်ခဲ့သည်။ ဓညဝတီရေတပ်စခန်းဌာနချုပ်အနီး ကာကင်းများကို သိမ်းယူနိုင်သည်အထိ စစ်ရေးအသာစီးရခဲ့ပြီးနောက် မတ်လ ၂၈ရက်က လှုပ်ခတ်သောစစ်ကိုင်းငလျင်ကြောင့် အပစ်ရပ်ထားစဉ် စစ်ရေးအရှိန်လည်း လျော့ကျသွားခဲ့သည်။
သို့သော်စစ်ကောင်စီကလေကြောင်းမှအင်အားဖြည့်ပြီး AAရှိသည့်နေရာများကို စစ်ကြောင်းထိုးလာ၍ တိုက်ပွဲများပြင်းထန်နေခြင်းဟု စစ်ရေးသတင်းရင်းမြစ်ကပြောသည်။တိုက်ပွဲသတင်းများကို AAက အသေးစိတ်ထုတ်ပြန်ထားခြင်းမရှိသော်လည်း စစ်ကောင်စီ၏ထိုးစစ်များကို ခုခံနေပြီး တိုက်ပွဲပြင်းထန်နေကြောင်း ပြီးခဲ့သည့် ဧပြီလ ၅ ရက်ကထုတ်ပြန်ထားသည်။
