ဇွန်-၁၉၊၂၀၂၅။ဇော်ရမ်း/People’s Spring
ဖားကန့်မြို့နယ်ဆန်းကြွယ်ရွာအနီး၌ ယနေ့ ညနေ ၆နာရီကျော်မှစတင်၍ တိုက်ပွဲဖြစ်နေပြီး ဒေသခံများအား လေကြောင်းအန္တရာယ်သတိပြုကြရန် KIAနှင့် KPDF ရဲဘော်များက သတိပေးနေကြသည်။
ဇွန် ၁၈ ရက်ညက မှော်စီစာကျေးရွာအနီး၌ တိုက်ပွဲဖြစ်ပွားပြီးနောက်ညနက်ပိုင်းမှစတင်ကာ ပစ်ခတ်မှုများငြိမ်သက်ခဲ့သည်။ထိုနောက် ဇွန်လ၁၉ရက် နေ့လယ်ပိုင်းမှစ၍ ဆန်းကြွယ်ရွာအနီး တိုက်ပွဲပြန်ဖြစ်ခဲ့သည်ဟု ဒေသခံများကပြောသည်။
“နေ့ခင်းက ဖြစ်တာထက် ညနေက ပိုဆိုးလာတာပါ။ဆန်းကြွယ်ရွာမှာ ဖြစ်နေတာ။ ထုံးစံအတိုင်း ဒေသခံတွေက ရှောင်ဖို့မလွယ်တော့သတိတော်တော်ထားနေကြရတယ်။လက်နက်ကြီး၊ လက်နက်ငယ်သံ စုံတယ်”ဟု ဆန်းကြွယ်ရွာမှဒေသခံတစ်ဦးကပြောသည်။
Public Service Announcement
စစ်ကောင်စီက ဖားကန့်ဗျူဟာကုန်းအပြင်၎င်းတို့တပ်စွဲထားသည့်နေရာများမှ လက်နက်ကြီးများပစ်ခတ်နေကာ လက်နက်ကြီးနှင့်လေကြောင်းအန္တရာယ်သတိပြုကြရန် KPDF ရဲဘော်တစ်ဦးကသတိပေးသည်။
“ဒီည အစောပိုင်းကမန္တလေးကရောမြစ်ကြီးနားကပါ လေယာဉ်တွေတက်တယ်။လေကြောင်းသတင်းတွေ နားစွင့်ပြီးနေကြပါ”ဟုအဆိုပါKPDF ရဲဘော်က ပြောသည်။
ဇွန် ၁၈ ရက် တိုက်ပွဲတွင် စစ်ကောင်စီလက်နက်ကြီးပစ်ခတ်မှုကြောင့် အရပ်သားတစ်ဦးဆုံးပြီး ခြောက်ဦး ဒဏ်ရာရခဲ့သည်။နေအိမ်ပျက်စီးမှုများလည်း ရှိခဲ့သည်။ ဇွန်လ ၁၆ရက်က ဖားကန့်မြို့နယ်၊ မှော်ဝမ်းလေးနှင့် မှော်ဝမ်းကြီးရွာအနီး တိုက်ပွဲတွင်လည်း အရပ်သားထိခိုက်သေဆုံးမှုရှိခဲ့သည်။
ဖားကန့်ရောက်စစ်တပ်နှင့် ပြည်သူ့စ်ပူးပေါင်းစစ်ကြောင်းကို KIAနှင့် KPDF ပူးပေါင်းတပ်က ဇွန်လ ၅ရက်၊ဇွန်လ ၉ရက်နှင့်ဇွန်လ ၁၀ရက်၌ တိုက်ခိုက်ခဲ့ပြီး ယနေ့အထိ စစ်ရေးဆက်လက်တင်းမာနေသည်။ စစ်ကောင်စီက လက်နက်ကြီးဖြင့်ပစ်ခတ်ခြင်း၊ စစ်ကြောင်းထိုးစဥ်သတ်ဖြတ်ခြင်းများကြောင့် မေလ ၂၈ရက်မှ ဇွန်လ၁၉ ရက်နေ့အထိ ဒေသခံပြည်သူ သေဆုံးသူ၃၀ဦးနီးပါး ရှိလာသည်။
ဖားကန့်၌ တိုက်ပွဲဆက်လက်ပြင်းထန်နိုင်၍ ဒေသခံများစစ်ဘေးရှောင်နိုင်ရေးအတွက် ဦးစားပေးကြိုတင်ပြင်ဆင်ပေးကြရန် ဒေသခံများနှင့် လူမှုကူညီရေးလုပ်ဆောင်သူများကတောင်းဆိုနေကြသည်။
