ကမ္မမြို့ပေါ်တွင် ကားဖြင့်ပတ်​နေ​သော စစ်တပ်တိုက်ခိုက်ခံရ

ဇွန်-၂၇၊၂၀၂၅။‌ဇော်ရမ်း/People’s Spring

ကံမ္မမြို့ပေါ်တွင်ကားများဖြင့် စစ်ကြောင်းလှည့်နေသည့် စစ်ကောင်စီတပ်ကို ပြည်သူ့ကာကွယ်ရေးပူးပေါင်းတပ်များက တိုက်ခိုက်ခဲ့ပြီး မြို့ပေါ်တိုက်ပွဲဖြစ်ခဲ့ကြောင်း ဒေသခံများကပြောသည်။

အမိုးဖွင့်ကားဖြင့် ပတ်မောင်းနေသော စစ်ကားနှစ်စီးကို ဇွန်လ ၂၆ ရက် နံနက် ၁၀ နာရီခန့်တွင် ပြည်သူ့ကာကွယ်ရေးပူးပေါင်းတပ်များက တိုက်ခိုက်ခဲ့ခြင်းဖြစ်သည်။

“ဒီကောင်တွေ Double Cab နှစ်စီးနဲ့ မြို့ပေါ်မှာ ပတ်နေတုန်းတက်ပစ်တာ။ စစ်ကောင်စီစခန်းနဲ့ဆို မီတာ ၆၀၀ လောက်ပဲ ဝေးတယ်” ဟု ကာကွယ်ရေးရဲဘော်တစ်ဦးကပြောသည်။

Public Service Announcement

တိုက်ခိုက်မှုတွင် စစ်သား၇ဦးသေဆုံးသွားသည်ဟု Pakokku People Defense Force (PPDF) က သတင်းထုတ်ပြန်ထားသည်။စစ်​သားများ​သေဆုံးထိခိုက်မှု အ​ခြေအ​နေကို People’s Spring က သီးခြားအတည်မပြုနိုင်ပါ။

အဆိုပါကား စစ်ကောင်စီနှစ်စီးသည် ပြည်သူပိုင်ပစ္စည်းများကို လိုက်လံခိုးယူနေခြင်းဖြစ်ပြီး ABSDF အမှတ် ၃ စစ်ကြောင်း ၊ အောင်ကျော် (RG) ၊ မြို့နယ် ပလဖ ၊ Tiger Warrior Force (TWF) ၊ အညာမြေပြောက် ကျားတပ် ဖွဲ့ (ကိုဇော်မိုက်) ၊ ကိုရေခဲနှင့် ကိုဗလဦးဆောင်သော လူငယ်ပြောက်ကျားတပ်ဖွဲ့ (YGF) တို့နှင့်အတူ ပူး ပေါင်း တိုက်ခိုက်ခဲ့ခြင်းဟု PPDFက ထုတ်ပြန်ထားသည်။

လက်ရှိတွင် ပခုက္ကူ-ကမ္မ-ပေါက်လမ်းကြောင်းအတိုင်း ပြီးခဲ့သည့် မေလကထွက်လာသောစစ်တပ်ယာဉ်တန်းသည် ကမ္မနှင့်ပေါက်မြို့နယ်ကြား၌ ဆက်ရှိနေပြီး စစ်ရေးသတိပြုနေထိုင်ကြရန် ပခုက္ကူမြို့နယ်ပြည်သူ့ကာကွယ်ရေးအဖွဲ့က သတိပေးထားသည်။