အာဏာသိမ်းခေါင်းဆောင်ကိုသြဇာခံသူတွေထိပ်ပိုင်းမရောက်လာတဲ့ကြံခိုင်ရေးပါတီညီလာခံ

စက်တင်ဘာ -၂၀ ၊၂၀၂၆

အာဏာသိမ်းစစ်တပ်ကျောထောက်နောက်ခံကြံခိုင်ရေးပါတီရဲ့ ဥက္ကဋ္ဌ နေရာကိုအာဏာသိမ်းမှုထောက်ခံအားပေးသူဦးခင်ရီပဲကိုပါတီညီလာခံမှာ ဆက်လက်ရွေးချယ်ခန့်အပ်လိုက်တယ်လို့ ညီလာခံကို တက်ရောက်ကြတဲ့ပါတီဝင်တွေက သတင်းဖော်ပြလာပါတယ်။

ပါတီဥက္ကဋ္ဌအဖြစ်ဦးခင်ရီ၊ဒုတိယဥက္ကဋ္ဌ တွေဖြစ် ဦးမြတ်ဟိန်းနဲ့ ဦးသောင်းအေး၊အထွေထွေအတွင်းရေးမှုး ဦးတင်အောင်ချစ်နဲ့ တွဲဖက်အထွေထွေအတွင်းရေးမှုး ဦးအောင်စိုးတို့ ဖြစ်လာတာပါ။

ပါတီထိပ်ပိုင်းခေါင်းဆောင်ရာထူးတွေထဲမှာအာဏာသိမ်းစစ်ခေါင်းဆောင်ရဲ့လက်ရုံးတစ်ဦးဖြစ်သူ စစ်ဗိုလ်ချုပ်ဟောင်းဖြစ်၊ စစ်ကောင်စီအဖွဲ့ဝင်လည်းဖြစ်ခဲ့သူ ဦးအောင်လင်းဒွေးမပါဝင်တာတွေ့ရပါတယ်။

Public Service Announcement

သူဟာဗိုလ်ချုပ်ကြီးရာထူးနဲ့ အာဏာသိမ်းစစ်ကောင်စီရဲ့ အတွင်းရေးမှုးတာဝန်ယူခဲ့သူဖြစ်ပြီးအာဏာသိမ်းစစ်ခေါင်းဆောင်ရဲ့အမိန့်တွေကို ဒိုင်ခံလက်မှတ်ရေးထိုးထုတ်ပြန်ခဲ့သူပါ။

အဲဒီနောက်ဗိုလ်ချုပ်ကြီးရာထူးကနေအနားပေးပြီးကြံခိုင်ရေးပါတီဆီစေလွှတ်ခဲ့ရကာအာဏာသိမ်းစစ်တပ်က ဖန်တီးထားတဲ့ လွှတ်တော်မှာ အမျိုးသားလွှတ်တော်ရဲ့ ဥက္ကဋ္ဌ ဖြစ်လာပါတယ်။

အခုကျင်းပတဲ့ ကြံခိုင်ရေးပါတီညီလာခံမှာ ပါတီထိပ်ပိုင်းနေရာရလာမယ့်သူလို့ခန့်မှန်းခံခဲ့ရသူပါ။

ပါတီဥက္ကဋ္ဌမှာဆက်ရှိနေသူဦးခင်ရီဟာ NLD ပါတီ အနိုင်ရခဲ့တဲ့ ၂၀၂၀ အထွေထွေရွေးကောက်ပွဲမှာ မဲမသမာမှုတွေရှိတယ်ဆိုပြီး အကြီးအကျယ်စွပ်စွဲခဲ့သူပါ။

ဒါအပြင် အဲဒီမသမာမှုတွေအတွက် ဘ​ယ်သူကို အားကိုးရမလဲ မသိဘူးဖြစ်နေတယ်ဆိုပြီးသတင်းစာရှင်းလင်းပွဲပြုလုပ်ကာစစ်တပ်ကိုတိုင်တည်ပြောဆိုခဲ့သူတစ်ဦးပါ။

ဒါအပြင် ဒုတိယဥက္ကဋ္ဌဖြစ်လာသူ ဒုတိယဗိုလ်ချုပ်ကြီးဟောင်း ဦးသောင်းအေးဟာဆိုရင်လည်း ၂၀၂၀ အထွေထွေ ရွေးကောက် ပွဲမှာ ကြံခိုင်ရေးပါတီရှုံးရတာ မဲမမာမှုကြောင့်လို့စွပ်စွဲပြီး ” အဓမ္မအားကြီးလာရင် ပိုကြီးတာနဲ့နှိမ်နင်းရမယ်” ဆိုတာ သူရဲ့ဖေ့ဘွတ်ခ်လူမှုကွန်ရက်မှာရေးသားခဲ့သူဖြစ်ပါတယ်။

ပါတီဗဟိုကော်မတီဝင်ကနေ တွဲဖက်အထွေထွေအတွင်းရေးမှုးဖြစ်လာသူ ဦးအောင်စိုးကတော့ဒုတိယဗိုလ်ချုပ်ကြီးဟောင်းဖြစ်ပြီးယခင်က ပြည်ထဲရေးဒုဝန်ကြီး ဖြစ်ခဲ့သူပါ။

အာဏာသိမ်းစစ်ခေါင်းဆောင်ရဲ့လူရင်းတစ်ဦးဖြစ်သူ ကြံခိုင်ရေးပါတီ ဒုတိယဥက္ကဋ္ဌ (၃) ဖြစ်တဲ့ ဒုတိယဗိုလ်ချုပ်ကြီးဟောင်း မျိုးဇော်သိန်းကတော့ ပါတီထိပ်ပိုင်းခေါင်းဆောင်နေရာမှာပြန်မပါလာတာတွေ့ရပါတယ်။သူဟာလက်ရှိ အာဏာသိမ်းခေါင်းဆောင်လက်အောက်မှာ သမဝါယမ ဝန်ကြီးလုပ်နေသူပါ။

စစ်တပ်ကစိတ်ကြိုက်ရေးဆွဲခဲ့တဲ့ ၂၀၀၈ ခုနှစ်အခြေခံဉပဒေမှာ သမ္မတ နဲ့အစိုးရအဖွဲဲ့ဝင်ဝန်ကြီးတွေဟာ တာဝန်ထမ်းဆောင်နေတဲ့သက်တမ်းအတွင်းပါတီ အလုပ်တွေမှာ ဝင်ရောက်လုပ်ကိုင်ခွင့် တားမြစ်ထားတာပါ။

ဒါကြောင့် အာဏာသိမ်းခေါင်းဆောင်လက်အောက်မှာ ဝန်ကြီးနေရာယူထားသူတွေဟာ ပါတီမှာ နေရာပြန်မရတာလို့ ထောက်ပြမှုတွေလည်းရှိနေပါတယ်။

ယခင်စစ်အစိုးရလက်ထက်မှာ လူမှုရေးအသင်းအဖြစ် ဟန်ပြဖွဲ့စည်းခဲ့တဲ့ ကြံခိုင်ရေးဟာ စစ်တပ်က ကျင်းပတဲ့ ၂၀၁၀ ရွေးကောက်ပွဲမတိုင်ခင်မှာ နိုင်ငံရေးပါတီအဖြစ် ပြောင်းလဲခဲ့တာပါ။

တကျော့ပြန်စစ်အာဏာသိမ်းပြီးနောက် အာဏာသိမ်းစစ်တပ်က ပြုလုပ်တဲ့ ၂၀၂၅ ရွေးကောက်ပွဲမှာလည်း အာဏာသိမ်းခေါင်းဆောင်ဟာ ဗိုလ်ချုပ်ကြီးတွေကို ကြံခိုင်ရေးပါတီဆီစေလွှတ်ပြီး ရွေးကောက်ပွဲ ဝင်ပြိုင်စေခဲ့ပါတယ်။

ပါတီမှာ စစ်ဗိုလ်ချုပ်ဟောင်းတွေ ကြီးစိုးမင်းမူခဲ့ပေမယ့်အချင်းချင်းကြား အာဏာ ၊နေရာလုပွဲတွေ ဖြစ်ခဲ့ပြီး အခုလ စက်တင်ဘာ ၁၉ ရက်နဲ့ ၂၀ ရက်တွေမှာကျင်းပတဲ့ ပါတီညီလာခံမတိုင်ခင်မှာလည်း အာဏာသိမ်းခေါင်းဆောင် နဲ့ ဦးခင်ရီဦးဆောင်တဲ့ ပါတီခေါင်းဆောင်ပိုင်းတွေကြား အာဏာလွန်ဆွဲမှုတွေဖြစ်ခဲ့တယ်ဆိုတဲ့သတင်းတွေလည်းထွက်ခဲ့ပါတယ်။