ဇူလိုင်-၃၁၊၂၀၂၅။ရဲခေါင်/People’s Spring
ရှမ်းပြည်နယ်တောင်ပိုင်း၊ ရွာငံမြို့နယ်တွင် စစ်ကောင်စီတပ်က အင်အား ရာချီသုံး၍စစ်ကြောင်းထိုးလာကြောင်း ဓနုပြည်နယ်အမျိုးသားကာကွယ်ရေးတပ်တော်(DSNDA)တာဝန်ရှိသူက လူထုနွေဦး သို့ ပြောသည်။
ရွာငံမြို့နယ်သည် စစ်ကောင်စီက ရွေးကောက်ပွဲအတွက် ကြိုတင်ကာကွယ်ခြင်းမျိုးဟု အထက်ပါတာဝန်ရှိသူက သုံးသပ်သည်။
ထို့ကြောင့် ရွာငံမြို့နယ်၏ အနောက်တောင်ခြမ်းရှိ ကျေးရွာများကို အင်အား ၂၀၀ကျော်ဖြင့် စစ်ကြောင်းထိုးလာ၍ ဇူလိုင်၂၇ ရက်က တောင်ဦးရွာနှင့် ရနဲကျေးရွာကြားတွင် တိုက်ပွဲဖြစ်ခဲ့ကြောင်း DSNDAက ဆိုသည်။
Public Service Announcement
မိုင်းများ၊လက်နက်ငယ်များအပြင် မိုင်းကွင်းထဲရောက်ချိန်တိုက်ခိုက်မှုကြောင့် စစ်ကောင်စီတပ်စစ် ကြောင်းမှ ၁၀ဦးထက်မနည်းသေဆုံးကြောင်း ဖော်ပြသည်။
တိုက်ပွဲဖြစ်ပွားပြီးနောက်သေဆုံးအလောင်းနှင့် ဒဏ်ရာရသူတွေကို စစ်ကောင်စီတပ်က ရနဲရွာသို့ကားဖြင့်သယ်သွားခဲ့ပြီး လက်ရှိအချိန်ထိ ရနဲရွာတွင်အင်အား ၂၀၀ကျော်တပ်စွဲထားကြောင်း အသိပေးသည်။
ရနဲရွာအနီးတွင်ရှိသော တောင်ပို့ခေါင်း၊ဂွေးပင် ၊ဆပ်ခြံ တောင်ဦးနှင့် တဲ့လုရွာတို့တွင်လည်း တပ်စွဲထားပြီး လက်နက်ကြီးများဖြင့်ပစ်ခတ်နေပြီး ပြည်သူအချို့ ဖမ်းဆီးရိုက်နှက်ခံရမှုလည်း ရှိကြောင်းသိရသည်။
“လက်ရှိ ရွာငံမှာ အင်အား ၅၀၀ကျော်တယ်။ တပ်တွင်းက သတင်းအရဆို ရွာငံကို အင်အားတစ်ထောင်ထိ ဆင်းမယ်လို့ သိရတယ်။တပ်မ (၅၅)နဲ့ နယ်မြေခံပျူတွေ။တရားမဝင်ရွေးကောက်ပွဲလုပ်နိုင်အောင် နယ်မြေရှင်းတဲ့သဘော”ဟု DSNDA တာဝန်ရှိသူက စစ်ကောင်စီတပ်၏ ထိုးစစ်ဆင်လာမှုအပေါ် ရှင်းပြသည်။
လက်ရှိရွာငံမြို့နယ်တွင် စစ်ရေးတင်းမာမှုများကြောင့် စစ်ကောင်စီနှင့်သက်ဆိုင်သမျှ အနီးကပ် နေထိုင်ခြင်းမလုပ်ရန် နှင့် အသွားအလာသတိရှိကြရန် DSNDAက တိုက်တွန်းသည်။
