သြဂုတ်-၅၊၂၀၂၅။မိထက်/People’s Spring
ဧရာဝတီတိုင်း၊ရေကြည် နှင့် လေးမျက်နှာမြို့နယ်အတွင်းကျေးရွာအချို့တွင် အာရက္ခတပ်တော်(AA)၊PDFပူးပေါင်းတပ်များနှင့် စစ်ကောင်စီတိုက်ပွဲများဖြစ်ပွားနေပြီး စစ်ကောင်စီက လေကြောင်းမှနေ့စဉ် ဗုံးကြဲနေသည်။
ရေကြည်မြို့နယ်၊ သီတာကုန်းပြင်အုပ်စုရှိသရက်ပင်ကြီးစုရွာ နှင့် လေးမျက်နှာမြို့နယ် စက်စက်ယိုကျေးရွာတွင် တိုက်ပွဲဖြစ်ပွားနေခြင်းဖြစ်သည်။
” တိုက်ပွဲက ဟိုးရှေ့ရက်တုန်းကငြိမ်နေခဲ့တာ။ သြဂုတ်လထဲမှာ ပြန်ဖြစ်လာတယ်။ စစ်တပ်ကလည်း လေကြောင်းကနေ ညတိုင်း လာပစ်တယ်။ ပြည်သူတွေကတော့ပြေးလိုက်သွားလိုက်နဲ့”ဟု လေးမျက်နှာမြို့ခံတစ်ဦးကပြောသည်။
Public Service Announcement
သရက်ပင်ကြီးစုရွာတွင် သြဂုတ်လဆန်းကတည်းက တိုက်ပွဲပြင်းထန်ခဲ့ပြီး စက်စက်ယိုကျေးရွာတွင်မူ စစ်ကောင်စီကစစ်ကြောင်းထိုးလာ၍ သြဂုတ်လ၄ရက်မှစတင်ကာ တိုက်ပွဲဖြစ်ပွားနေခြင်းဖြစ်သည်ဟု ဒေသခံသတင်းရင်းမြစ်အချို့ကပြောသည်။
ရေကြည်မြို့အခြေစိုက် သီတာကုန်းပြင်အုပ်စုတွင် ရှိသည့်အမြောက်တပ်(အမတ-၃၄၄)ကို AAနှင့် ပူးပေါင်းတပ်များက ပြီးခဲ့သည့်ဇွန်လကအထိ တိုက်ခိုက်ခဲ့ပြီး ဇူလိုင်လတွင် တိုက်ပွဲများရပ်တန့်ခဲ့သည်။သို့သော်သြဂုတ်လဆန်းမှစ၍ AAက လက်နက်ကြီးများဖြင့်ပစ်ခတ်နေပြီး တိုက်ပွဲပြန်ဖြစ်နေသည်ဟုဒေသခံများကပြောသည်။
ဇွန်လအတွင်းကတိုက်ပွဲများတွင် အမတ-၃၄၄မှ တပ်ဖွဲ့ဝင်ရန်အချို့ထွက်ပြေးခဲ့ပြီး စစ်ကောင်စီကလည်း ထိုနေရာမှအမြောက်များကို ကျုံပျော်မြို့ရှိခလရ(၃၆)သို့ ပြောင်းရွှေ့ခဲ့သည်။
“တိုက်ပွဲတွေကလည်းပြင်းပြင်းထန်ထန်ဖြစ်နေတာကနေ ရပ်လိုက်တော့ စစ်ကောင်စီကအင်အားပြန်ပြီးစုဖွဲ့သွားနိုင်တဲ့အနေအထားတွေ့ရတယ်။ နောက်ပြီးတော့ တိုက်ပွဲဖြစ်မနေရင်တောင်မှပဲစစ်ကောင်စီကလေကြောင်းကနေခဏခဏလာပစ်နေတယ်။ကျတော်တို့သဘောကတော့ ချမယ်ဟေ့ဆိုရင်လည်းပွဲ ပြတ်အောင်ချစေချင်တယ်။ ပြေးရလွှားရတာအရမ်းဒုက္ခရောက်တယ်” ဟု ရေကြည်မြို့နယ်မှဒေသခံတစ်ဦးကပြောသည်။
လေးမျက်နှာမြို့နယ်မှကျေးရွာချို့ကို AAနှင့် PDFက ထိန်းချုပ်ထားနိုင်ပြီး စစ်ကောင်စီက ဟင်္သာတမြို့ဘက်မှနေ၍ အင်အားဖြည့်တင်းနေသည်။
ရေကြည်မြို့နယ်၊ လေးမျက်နှာမြို့နယ်တို့သည် ရခိုင်ရိုးမနှင့်ဆက်စပ်နေသည့်ဒေသများဖြစ်သည်။ ရိုးမအခြေမှကျေးရွာများတွင်စစ်ကောင်စီက အရပ်သားအချို့အား PDFဟု စွပ်စွဲ၍ဖမ်းဆီးသတ်ဖြတ်ခြင်းများ ရှိခဲ့သည်။
အမတ (၃၄၄တပ်စခန်းနှင့်ရေကြည်မြို့နယ်၊ လေးမျက်နှာမြို့နယ်တို့မှလက်လွှတ်ဆုံးရှုံးလိုက်ရသည့် လူနေကျေးရွာများမှ အိမ်ခြေအဆောက်အအုံနှင့် အရပ်သားပြည်သူလူထုအား စစ်ကောင်စီက လေယာဉ်၊ ဒရုန်း၊ လေထီး (Paramotor)၊ လက်နက်ကြီး (မီးလောင်ဗုံး) များဖြင့် ပစ်ခတ်တိုက်ခိုက်ကာစစ်ရာဇဝတ်မှုကျူးလွန်နေကြောင်းအမှတ် (၂၉) နည်းဗျူဟာ၊ ဧရာဝတီPDFက ပြီးခဲ့သည့် ဇူလိုင်လတွင် ထုတ်ပြန်ထားသည်။
