ဩဂုတ်-၆၊ ၂၀၂၅။ ထားမြတ်/People’s Spring
ကချင်လွတ်လပ်ရေးအဖွဲ့(KIO/KIA) ဌာနချုပ်နယ်မြေ လိုင်ဇာဒေသ ရေဘေးကြောင့် ကလေးငယ်အပါအဝင် ၆ဦးသေဆုံးကာ နေအိမ် ၁၀၀ကျော် ပျက်စီးမှုရှိခဲ့ကြောင်း KIO/KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
မိုးသည်းထန်စွာ ရွာသွန်းမှုကြောင့် ဩဂုတ် ၄ရက် မနက်အစောက ပြင်းထန်သည့် ရေကြီးမှုဖြစ်ခဲ့ရာ ဂျေယန်းစစ်ရှောင်စခန်း အပါအဝင် ဒေသတွင်းနေပြည်သူများ ရေဘေးကြုံခဲ့ရသည်။
“တချို့တွေက တအိမ်လုံးပါသွားတာပေါ့။ တချို့တွေက မီးဖိုချောင်တို့ နည်းနည်းပါးပါး ထိခိုက်တာတွေရှိတယ်”ဟု ဗိုလ်မှူးကြီးနော်ဘူက ပြောသည်။
Public Service Announcement
ရေဘေးကြောင့် အမျိုးသမီး တစ်ဦး၊ အမျိုးသား လေးဦး၊ကလေးငယ် တစ်ဦး သေဆုံးခဲ့ရကြောင်း ပြောသည်။
“သူတို့ ပြေးရင်းနဲ့ ပါသွားတာပေါ့”ဟု ဗိုလ်မှူးကြီးနော်ဘူက ပြောသည်။
ရေဘေးကြောင့် လမ်းပန်းဆက်သွယ်ရေး ပြတ်တောက်မှုများ ရှိခဲ့၍အချို့ဒေသ၌ စာရင်းကောက်ယူမှု ဆက်လက်ပြုလုပ်လျက်ရှိကြောင်း အသိပေးသည်။ ထို့ကြောင့် ထိခိုက်ပျက်စီးမှု အရေအတွက် ပိုတိုးလာနိုင်ဟု ဆိုသည်။
မိုးသည်းထန်စွာရွာသွန်းမှုကြောင့် ၀ တပ်ဖွဲ့(UWSA) နယ်မြေ မိုင်းပေါက်ဒေသ၌လည်း လူသေဆုံးထိခိုက်မှု ရှိခဲ့သည်။
ကရင်အမျိုးသားအစည်းအရုံး(KNU)နယ်မြေများ၌လည်း ရေဘေးကြောင့် ကျေးရွာပေါင်း ၁၀၀ကျော် ရေဘေးကြုံနေရပြီး နေအိမ်ပျက်စီးမှု၊ လယ်ဧက သောင်းချီရေနစ်မြုပ်မှု ဖြစ်ပေါ်လျက်ရှိသည်။
ပဲခူးတိုင်းအရှေ့ပိုင်းဒေသ ဖြူး၊ ရေတာရှည်၊ အုတ်တွင်း၊ ညောင်လေးပင်၊ကျောက်တံခါး ထန်းတပင် စသည့် မြို့နယ်များ၌လည်း ပြည်သူသောင်းချီရေဘေးကြုံနေရကြောင်း အမျိုးသားညီညွတ်ရေးအစိုးရက အသိပေးထားသည်။
