သာယာဝတီထောင်မှာ နိုင်ငံရေးအကျဉ်းသားတွေ ရိုက်နှက်ခြိမ်းခြောက်ခံနေရ

သြဂုတ် – ၆ ၊၂၀၂၅ ၊ ဆိုင်းမင်း/People’s Spring

ပဲခူးတိုင်း ၊ သာယာဝတီထောင်မှာ နိုင်ငံရေးအကျဉ်းသားတွေကို နှစ်ကြီးသမား ရာဇဝတ်အကျဉ်းသား ပြူးကြီးဆိုသူက ရိုက်နှင် ညှင်းပန်းတာတွေ ပြုလုပ်နေတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM ) က သြဂုတ် ၅ ရက်မှာ ထုတ်ပြန်အသိပေးပါတယ်။

သာယာဝတီထောင် သီးသန့် (က/ခ) တိုက်မှာရှိတဲ့ နိုင်ကျဉ်းတွေကို နှစ်ကြီးအကျဉ်းသားပြူးကြီးဆိုသူက ထောင်ဝန်ထမ်းတွေနဲ့ပေါင်းပြီး ရိုက်နှက်တာ ၊ ခြိမ်းခြောက်တာ ၊အနိုင်ကျင့်တာတွေလုပ်ဆောင်နေတာလို့ PPNM က ဖော်ပြပါတယ်။

“ထောင်ပြောင်းလာတဲ့ နိုင်ငံရေးအကျဉ်းသားတွေကို ရိုက်နှက်တာမျိုး၊ နိုင်ငံရေးအကျဉ်းသားတွေနဲ့ ထောင်အာဏာပိုင်တွေကြားတစ်ခုခုဖြစ်တိုင်း တိုက်ပိတ်မခံရခင် ရိုက်နှက်တဲ့နေရာမှာ အများဆုံးပါဝင်ပတ်သက်ကျူးလွန်နေတာပါ ”လို့ PPNM ရဲ့ ဦးဆောင်ကော်မတီဝင် ကိုသိုက်ထွန်းဦးကပြောပါတယ်။

Public Service Announcement

ဒီအခြေအနေဟာ သာယာဝတီထောင်က နိုင်ကျဉ်းတွေအတွက် စိုးရိမ်စရာဖြစ်တယ်လို့ PPNM က ဆိုထားပါတယ်။

ပြူးကြီးဆိုသူဟာ လူသတ်ဓားပြမှုနဲ့ သေဒဏ်ကျထားသူဖြစ်ပြီး အိုးဘိုးထောင်ကနေ သာယာဝတီထောင် ရောက်လာပြီးနောက် ထောင်ပိုင် ဦးရဲရင့်နိုင်ရဲ့ လက်အောက်ခံ အဖြစ် ထောင်ပြောင်းအကျဉ်းသား ကို လူမဆန်စွာ ရိုက်နှက်တာ ၊ ငွေညှစ်တာတွေ ပြုလုပ်သူလို့ PPNM က အသိပေးပါတယ်။

သူဟာ ပြီးခဲ့တဲ့ ၂၀၂၄ ခုနှစ် ၊ သီးသန့် တိုက် က နိုင်ငံရေးအကျဉ်းသားတစ်ဦးဖြစ်သူကိုလည်း လိင်ပိုင်းဆိုင်ရာ အမြတ်ထုတ်ဖို့ ကြိုးပမ်းသလို ခေါင်းကွဲတဲ့အထိရိုက်နှက်ခဲ့သူလည်းဖြစ်တယ်လို့ သိရပါတယ်။

သာယာဝတီထောင်မှာ လူ့အခွင့်အရေးချိုးဖောက်ခံရမှုတွေအတွက် ထောင်ပိုင် ဦးရဲရင့်နိုင် ၊ ဒုထောင်ပိုင် ဦးဖြိုးဝေဦး ၊ ဦးစီးမှုး ဦးသန်းဝင်းတို့မှာတာဝန်ရှိတယ်လို့ PPNM ကထုတ်ပြန်ထားပါတယ်။

သာယာဝတီထောင်ဟာ ကိုလိုနီခေတ်ကနေ စစ်အာဏာရှင်လက်ထက်အထိ ပုန်ကန်တော်လှန်သူတွေ ၊ နိုင်ငံရေးအကျဉ်းသားတွေကို ဖိနှိပ်ရာမှာ ပုံစံထောင်အဖြစ် နာမည်ဆိုးနဲ့ ကျော်ကြားပါတယ်။