ဘန်ကောက် ​ဈေးဝယ်စင်တာမှာ မလေးရှာလူငယ် နှစ်ဦးကို ထိုင်းအမျိုးသားတစ်ဦးက မီးရှို့

သြဂုတ်-၉၊၂၀၂၅။People’s Spring

ထိုင်းနိုင်ငံ၊ ဘန်ကောက်မြို့က​ဈေးဝယ်စင်တာမှာ မလေးရှား ကမ္ဘာလှည့် ခရီးသည် နှစ်ဦးကို မီးရှို့ခဲ့တဲ့ အမျိုးသားကို ရဲတွေက ဖမ်းဆီးထားကြောင်း သိရပါတယ်။

ဩဂုတ် ၇ ရက်နေ့က ဘန်ကောက်မြို့လယ်၊ Big C စျေးဝယ်စင်တာလှေကားနားမှာမလေးရှား နိုင်ငံသား အသက် ၂၆ နှစ်အရွယ် အမျိုးသားအွန်ယစ်လောင်နဲ့ အသက် ၂၇ နှစ်အရွယ် အမျိုးသမီး နဲဂန်ရှောင်ဇန်တို့ကို ထိုင်းအမျိုးသားကတိုက်ခိုက်တာလို့ ထိုင်းမီဒီယာတွေက ဖော်ပြခဲ့ပါတယ်။

သူတို့နှစ်ဦးကို အသက် ၃၀ အရွယ် ဗာရာကောင် ပူထိုင်ဆောင်ဆိုတဲ့ အမျိုးသားက အနောက်ဖက်ကနေ တင်နာရည်နဲ့ လောင်းချခဲ့ပါတယ်။ နှစ်ယောက်သား ကြောက်လန့်တကြား ထွက်ပြေးချိန်မှာ အဲဒီ အမျိုးသားက အနောက်ကနေ ပြေးလိုက်ပြီး မီးရှို့ခဲ့တာလို့ သိရပါတယ်။

Public Service Announcement

ကမ္ဘာလှည့်ခရီးသွား နှစ်ယောက်ရဲ့ ဒဏ်ရာတွေက ပြင်းထန်ပေမယ့် အခြေအနေ တည်ငြိမ်နေတယ်လို့ ထိုင်းနိုင်ငံဆိုင်ရာ မလေးရှားသံရုံး တာဝန်ခံ ဘွန်ယစ်ခ်ဂျူးကပြောပါတယ်။အွန်ကထိုင်းရဲတပ်ဖွဲ့ အထွေထွေဆေးရုံရဲ့အထူးကြပ်မတ်ကုသဆောင်ကိုရောက်နေပြီးအမျိုးသမီးတစ်ဦးဖြစ်တဲ့ဂန်ကတော့ ချူလာလောင်ကွန်းဘုရင်ဆေးရုံမှာ​ဆေးကုသမှု ခံယူနေပါတယ်။

ကျူးလွန်သူ ဗာရာကောင်ကို စွဲချက်တင်ဖို့အတွက် နစ်နာသူ နှစ်ဦးဆီက ထွက်ချက်နဲ့တခြားအချက်အလက်တွေ ရယူဖို့ စောင့်ဆိုင်းနေကြောင်း ဘန်ကောက်မြို့၊ လွမ်ပီနီ ရဲတပ်ဖွဲ့ အကြီးအကဲ ယင်ယော့စ် ဆူဝန်နိုက ပြောပါတယ်။

ဗာရာကောင်က သူဟာ အလုပ်ပြုတ်လာတာကို စိတ်ဆိုးပြီး မဆီမဆိုင်လူငယ်နှစ်ယောက်ကို တိုက်ခိုက်ခဲ့တာလို့ ရဲတွေဆီထွက်ဆိုထားပါတယ်။ သူဟာ လက်ဝှေ့သမားဟောင်း တစ်ဦးဖြစ်ပြီး လုံခြုံရေး အစောင့်အဖြစ်က အလုပ်ပြုတ်လာခဲ့တာလို့ ဆိုပါတယ်။

သူဟာ တိုက်ခိုက်မှုအပြီး ထွက်ပြေးဖို့ ကြိုးစားပေမယ့် အနီးတဝိုက်မှာ ရှိနေသူတွေက ဝိုင်းဖမ်းပေးခဲ့ပါတယ်။ဗာရာကောင်ကို လွမ်ပီနီ ရဲစခန်းမှာ ထိန်းသိမ်းထားပြီး စုံစမ်းစစ်ဆေးနေဆဲလို့သိရပါတယ်။

ကိုးကား-Bangkok Post