KIAလက်နက်ကြီးကြောင့် အရာရှိအပါအဝင် စစ်ကောင်စီ သေဆုံးမှုရှိ
စက်တင်ဘာ−၂၆၊ ၂၀၂၅။ထားမြတ်/People’s Spring
ကချင်ပြည်နယ်၊ ဗန်းမော်မြို့မှာ အာဏာသိမ်းစစ်တပ်က ထပ်မံထိုးစစ်ဆင်လာလို့ တိုက်ပွဲတွေဖြစ်ပွားနေကြောင်း ကချင်စစ်ရေးသတင်းရင်းမြစ်က ပြောပါတယ်။
ပြီးခဲ့သည့် ရက်ပိုင်းတွေကတည်းက စစ်ကောင်စီတပ်က ထိုးစစ်ဆင်လာလို့ တိုက်ပွဲဖြစ်ပွားနေတာလို့ သတင်းရင်းမြစ်က ပြောပြီး စက်တင်ဘာ ၂၅ရက် ညနေပိုင်းတိုက်ပွဲမှာ စစ်တပ် အထိနာခဲ့တယ်လို့ ဆိုပါတယ်။
Public Service Announcement
“မနေ့က ညနေပိုင်း ဗန်းမော်ဘက် ကျနော်တို့ ပစ်လိုက်တဲ့ လက်နက်ကြီးက သူတို့ စခတွေ စုနေတဲ့နေရာမှာ လက်နက်ကြီး ကျည် ၂လုံးကျတယ်”လို့ ကချင်စစ်ရေးသတင်းရင်းမြစ်က ပြောပါတယ်။
လက်နက်ကြီး ထိလို့တပ်ရင်းမှူးလို့ ယူဆရတဲ့ အရာရှိအပါအဝင် စစ်ကောင်စီတပ်ဖွဲ့ဝင် ၁၀ဦး ကျော် သေဆုံးမှုရှိတယ်လို့ သတင်းရကြောင်းလည်း ပြောပါတယ်။ ဒါပေမယ့် အဲဒီသတင်းအချက်နဲ့ပတ်သက်ပြီး လူထုနွေဦးက သီးခြားအတည်မပြုနိုင်ပါဘူး။
“မနေ့က သူတို့ တနေကုန် ထိုးစစ်လုပ်တယ်။ နေ့တိုင်း လေကြောင်း တိုက်ခိုက်မှု သုံးလေးကြိမ်လုပ်တယ်။ အခု ဗန်းမော်ကို ဗိုက်တာနဲ့ လေကြောင်း တိုက်ခိုက်မှုလုပ်နေတယ်။ မြစ်ကြီးနား ဖိုက်တာ ၂စီး။ သူတို့ ဘက်က ထိုးစစ်လုပ်နေတာ ၃ရက်ရှိပြီ” လို့ သတင်းရင်းမြစ်က ပြောပါတယ်။
အာဏာသိမ်းစစ်တပ်ဟာ ဩဂုတ်လဆန်းမှာ ဗန်းမော်မြို့ကို ရေကြောင်းကနေ စက်လက်နက်အင်အားဖြည့်တင်းပြီး မြေပြင်ထိုးစစ်ပြန်လည်ပြုလုပ်ခဲ့လို့ ဩဂုတ်လအတွင်း တိုက်ပွဲတွေ ဆက်တိုက်ပြင်းထန်ခဲ့ပါတယ်။ လေကြောင်း၊ ဒရုန်း အများအပြား အသုံးပြု တိုက်ခိုက်ခဲ့တာကြောင့် ကချင်လွတ်လပ်ရေးတပ်မတော်(KIA) ပူးပေါင်းတပ် သိမ်းထားတဲ့ နေရာအချို့ကိုလည်း လက်လွှတ်ခဲ့ရပါတယ်။
စစ်ကောင်စီဟာ ဝိုင်းမော်မြို့နယ်၊ လမြန်ဒေသနဲ့ ဆော့လော် လန်ဆယ်ဒေသမှာလည်း ထိုးစစ်ဆင်မှုတွေလုပ်နေပေမယ့် KIA ပူးပေါင်းတပ်ရဲ့ တိုက်ခိုက်မှုကြောင့် ရှေ့မတိုးနိုင်ဘဲ အထိနာလျက်ရှိပါတယ်။
ကချင်ဒေသ စစ်ရေးအခြေအနေတွေကို KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံ ဆက်သွယ်မေးမြန်းထားဆဲဖြစ်ပါတယ်။
