အောက်တိုဘာ – ၂၁ ၊၂၀၂၅ ၊ နိုင်ပကောင်း /People’s Spring
ကရင်ပြည်နယ်၊ကော့ကရိတ်မြောက်ပိုင်းကကျေးရွာတွေထဲကို မနေ့ (အောက်တိုဘာ ၂၀ ရက် ) ညနေပိုင်းက စစ်ကောင်စီလေတပ်က ဗုံးကြဲတိုက်ခိုက်တာကြောင့် နေအိမ် နဲ့ အဆောက်အဦးအချို့ မီးလောင်ပျက်စီးသွားခဲ့တယ်လို့ ကရင်သတင်းရင်းမြစ်က ပြောပါတယ်။
မနေ့ ညနေပိုင်း ၄ နာရီခန့်က ကော့ကရိတ်မြောက်ပိုင်းက ထီဖိုးစံ၊ မိဖာလယ်၊ ကော့ဖန်ရပ် ကျေးရွာတွေကို Y-12 လေယာဉ်နှစ်စီး ဗုံးကြဲတိုက်ခိုက်ခဲ့ပြီး ထီးဖိုးစံရွာထဲက နေအိမ်တချို့ ဗုံးထိမှန်ပျက်စီးသွားခဲ့တယ်လို့ ကရင်သတင်းရင်းမြစ်ဆီက သိရပါတယ်။
” ဗုံးကြဲတာထိတာက ထီဖိုးစံဘုန်းကြီးကျောင်းနားပေါ့၊ ဘုန်းကြီးကျောင်းဝင်းထဲလည်း ကျတာရှိတယ်၊ စာသင်ကျောင်း အုတ်တံတိုင်းထိခိုက်တာရှိတယ်၊ နေအိမ်လည်းထိတယ်” လို့ ကရင်သတင်းရင်းမြစ်က ပြောပါတယ်။
Public Service Announcement
အောက်တိုဘာလ အစောပိုင်းက ကော့ကရိတ်မြောက်ဘက်ပိုင်းမှာရှိတဲ့ နဘူး-(တံတားကျိုး)ကော့ကရိတ်လမ်းပိုင်းကို စစ်ကောင်စီတပ်က ပြန်လည်ထိန်းချုပ်လိုက်နိုင်ပြီးနောက် ကော့ကရိတ်မြောက်ပိုင်းက ကျေးရွာတွေထဲကို ဆက်ပြီးစစ်ကြောင်းထိုးလာခဲ့ရာ KNU ပူးပေါင်းတပ်နဲ့ တိုက်ပွဲတွေဖြစ်ပွားခဲ့တာပါ။
ကော့ကရိတ်မြောက်ပိုင်း တိုက်ပွဲကြောင့် မြပတိုင်၊ နန်းကော်တေး၊ လန်ခိုဘိုင်း၊ နောင်းမီ၊ ကော့ဖန်ရပ်၊ ထီဖိုးစံ၊ မိဖာလယ် စတဲ့ကျေးရွာတွေက ဒေသခံတွေဟာ ဘေးလွတ်ရာနေရာဒေသတွေဆီ ထွက်ပြေးတိမ်းရှောင်နေခဲ့ရပါတယ်။
ကော့ကရိတ်မြောက်ပိုင်းက ကျေးရွာတွေနဲ့ ဒေါနတောင်ပေါ်လမ်းဟောင်းတို့ကို ပြန်လည်ထိန်းချုပ်နိုင်ဖို့အတွက် စစ်ကောင်စီတပ်က ကရင်နယ်ခြားစောင့်တပ်(BGF)၊ ခွဲထွက် DKBA အဖွဲ့တို့နဲ့ ပူးပေါင်းပြီး စစ်ကြောင်းထိုးတိုက်ခိုက်နေတာပါ။
