စဉ့်ကူးမြို့နယ် စစ်တပ်ဗုံးကြဲမှု သံဃာ ၃ပါးဒဏ်ရာရ၊ ဘုန်းကြီးကျောင်းဆောင် ပျက်စီး

အောက်တိုဘာ-၂၁၊၂၀၂၅၊ ရှိန်း/People’s Spring

မန္တလေးတိုင်း၊စဉ့်ကူးမြို့နယ်ကို စစ်ကောင်စီတပ်က ဗုံးကြဲတိုက်ခိုက်ခဲ့လို့ သံဃာ ၃ပါးထိခိုက်ဒဏ်ရာ တွေရခဲ့တယ်လို့ ဒေသခံတွေက ပြောပါတယ်။

အောက်တိုဘာ ၁၉ ရက် ည၁၁နာရီကျော်မှာ စဉ့်ကူးမြို့နယ်က လက်ပန်လှကျေးရွာကို ဗုံးကြဲ တိုက်ခိုက်ခဲ့တယ်လို့ သိရပါတယ်။

အဲဒီနောက် မိနစ်ပိုင်းအကွာမှာပဲ ဆီဆုံကျေးရွာကို ထပ်မံဗုံးကြဲခဲ့လို့ ဦးဇင်းတပါးနဲ့ ကိုရင် နှစ်ပါး ဗုံးစံမှန် ဒဏ်ရာတွေရခဲ့ပြီး ဘုန်းကြီးကျောင်းဆောင်တွေလည်း ပျက်စီးခဲ့တယ်လို့ သိရပါတယ်။

Public Service Announcement

“လက်ပန်လှကတော့ ရွာနောက်အစွန်ကိုချသွားတာ။အထိခိုက်မရှိဘူး။ဆီဆုံကတော့ အစမှန်တွေ ရှိတယ်။မစိုးရိမ်ရဘူးလို့ သိရပါတယ်”လို့ ဒေသခံတဦးက ပြောပါတယ်။

ယခုရက်ပိုင်းအတွင်း စစ်‌‌ကောင်စီတပ်က စဉ့်ကူးမြို့နယ်အတွင်းကို လေကြောင်းတိုက်ခိုက်မှုတွေဆက်တိုက်လုပ်နေပြီး အောက်တိုဘာ ၁၂ ရက်ကလည်း စဉ့်ကူးမြို့နယ်၊ထုံးကြီးကျေးရွာကို လေကြောင်းတိုက်ခိုက်ခဲ့ပါတယ်။

စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် စဉ့်ကူးမြို့နယ်အတွင်း Starlink အင်တာနက်အသုံးပြုမှုတွေလည်း ကန့်သတ်ထားတယ်လို့ သိရပါတယ်။