နိုဝင်ဘာ ၂၆၊ ၂၀၂၅။ ပုရစ်၊မိုမို/People’s Spring
ပဲခူးတိုင်း၊ နတ်တလင်းမြို့နယ်က စစ်တပ်ဂိတ်စခန်းတိုက်ခိုက်ခဲ့သလို ပေါင်းတည်မြို့နယ်က စစ်တပ် ဆိုင်ကယ်ယာဥ်တန်းကို မိုင်းဆွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်မတော်(PDF) အမှတ်(၂) စစ်ဆင်ရေးနယ်မြေက သတင်းထုတ်ပြန်ပါတယ်။
ပဲခူးတိုင်း၊ သာယာဝတီခရိုင်၊ နတ်တလင်းမြို့နယ်၊ ရှားဖြူကုန်းကျေးရွာရှိ စစ်တပ်ဂိတ်စခန်းကို နိုဝင်ဘာ ၂၆ရက် ဒီကနေ့(နိုဝင်ဘာ ၂၆ရက်) မနက်မှာ တိုက်ခိုက်ခဲ့တာဖြစ်ပြီး စစ်ကောင်စီတပ်ဖွဲ့ဝင် ၂ဦးသေဆုံးကာ ကျန်သူတွေ ဂိတ်စခန်းကို စွန့်ခွာထွက်ပြေးသွားတယ်လို့ အသိပေးပါတယ်။
စစ်တပ်ဂိတ်စခန်းက စစ်ကောင်စီတပ်ဖွဲ့ဝင်တွေအသုံးပြုတဲ့ ဆိုင်ကယ်နဲ့ အခြားစစ်သုံးပစ္စည်းတွေ သိမ်းရတယ်လို့ ဖော်ပြထားပါတယ်။
Public Service Announcement
တိုက်ခိုက်မှုများအတွင်း စစ်တပ်ထံက သိမ်းရသော လက်နက်ခဲယမ်းနဲ့ ပစ္စည်းတွေ၊ ဓာတ်ပုံ – အမှတ် -၂ စစ်ဆင်ရေးနယ်မြေ 
တိုက်ခိုက်မှုများအတွင်း စစ်တပ်ထံက သိမ်းရသော လက်နက်ခဲယမ်းနဲ့ ပစ္စည်းတွေ၊ ဓာတ်ပုံ – အမှတ် -၂ စစ်ဆင်ရေးနယ်မြေ 
တိုက်ခိုက်မှုများအတွင်း စစ်တပ်ထံက သိမ်းရသော လက်နက်ခဲယမ်းနဲ့ ပစ္စည်းတွေ၊ ဓာတ်ပုံ – အမှတ် -၂ စစ်ဆင်ရေးနယ်မြေ
အဲဒီ စစ်ဆင်ရေးကို အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ (၂၂)၊ အမှတ်(၃၈၀၁) တပ်ရင်း၊ တပ်ခွဲ(၆)၊ နတ်တလင်းမြို့နယ်ပကဖ တို့ပူးပေါင်းဆောင်ရွက်ခဲ့တာဖြစ်ပါတယ်။
ဒါ့အပြင် သာယာဝတီခရိုင်၊ ပေါင်းတည်မြို့နယ်၊ ပန်းသင်းပင်ကျေးရွာကနေ ဆိုင်ကယ်တွေနဲ့ ထွက်လာတဲ့ စစ်ကောင်စီတပ်ဖွဲ့တွေကိုလည်း အမှတ်(၃၈၀၁) တပ်ရင်းရုံး ရဲဘော်တွေက ဒီကနေ့ မနက်ပိုင်းမှာ မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁ဦးသေဆုံးကာ ၁ဦး ဒဏ်ရာရခဲ့ကြောင်း ထုတ်ပြန်ထားပါတယ်။
တိုက်ခိုက်မှုအပြီး တော်လှန်ရေးရဲဘော်တွေ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်းလည်း အသိပေးထားပါတယ်။
ပြီးခဲ့တဲ့ နိုဝင်ဘာ ၂၃ရက်ကလည်း ပဲခူးတိုင်းစစ်ဌာန ဗျူဟာ (၂၂)တပ်ရင်း(၃၈၀၂) တပ်ခွဲ(၄) ရဲဘော်တွေဟာ သာယာ၀တီခရိုင် ကြို့ပင်ကောက်မြို့အဝင် စစ်ကောင်စီတပ် ဂိတ်စခန်းကို တိုက်ခိုက်ခဲ့ရာ ဒုရဲအုပ်ကျော်ဇင်ထွန်း အပါအဝင် စစ်ကောင်စီတပ်ဖွဲ့ဝင် ၅ဦးသေဆုံးကာ ၂ဦးထက်မနည်း ဒဏ်ရာရခဲ့ပြီး လက်နက်အချို့ သိမ်းရခဲ့တယ်လို့ အမှတ်(၂) စစ်ဆင်ရေးနယ်မြေက အသိပေးထားပါတယ်။
ဒါ့အပြင် ပေါင်းတည်မြို့နယ်မှတ်တိုင်နယ်မြေရဲစခန်းက ကျောက်ကြီးတောင် အထိုင်တပ်စခန်းကို အင်အားဖြည့်တင်းဖို့ စစ်ကောင်စီတပ်ဖွဲ့ဝင် ၃၀ ဦးခန့်တင်လာတဲ့ ကားကို ဗျူဟာ (၂၁) PDF တပ်ရင်း(၃၆၀၁) တပ်ခွဲ(၅)က မိုင်းဆွဲတိုက်ခိုက်ခဲ့တယ်လို့ ထုတ်ပြန်ထားပါတယ်။
နိုဝင်ဘာ ၂၂ရက်ကလည်း သာယာ၀တီခရိုင် ဇီးကုန်းမြို့နယ် KTV တခုမှာ မူးရူးနေတဲ့ စစ်တပ်လက်အောက်ခံ ရဲနဲ့ ပြည်သူ့စစ်တွေကို ဗျူဟာ (၂၂) တပ်ရင်း(၃၈၀၁) တပ်ရင်းက တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅ဦးသေဆုံးကာ လက်နက်အချို့ သိမ်းရခဲ့ကြောင်း အမှတ်(၂) စစ်ဆင်ရေးနယ်မြေက ထုတ်ပြန်ထားပါတယ်။
