စစ်တပ်ကျူးလွန်တဲ့ အုတ်တွင်းနဲ့ဖြူးမြို့နယ်က စစ်ရာဇဝတ်မှု‌တွေ

နိုဝင်ဘာ၂၇၊၂၀၂၅။အိမ်သွင်/People’s Spring

ပဲခူးတိုင်း၊ အုတ်တွင်း၊ဖြူး၊ပေါင်းတည်နဲ့ နတ်တလင်းမြို့နယ်မှာ တိုက်ပွဲတွေဖြစ်နေပြီး စစ်ကောင်စီတပ်တွေက အမျိုးသမီးအချို့ကို အဓမ္မပြုကျင့်သတ်ဖြတ်ခဲ့မှုအပါအဝင် အရပ်သား ၁၈ဦးကို သတ်ဖြတ်သွားတယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ပြည်သူ့ကာကွယ်ရေးတပ်မတော်၊အမှတ်_၂စစ်ဆင်ရေးနယ်မြေ၊ပဲခူးတိုင်းစစ်ဌာနဗျူဟာ(၂၂)က သတင်းထုတ်ပြန်ပါတယ်။

ဖြူးနဲ့အုတ်တွင်းမြို့နယ်မှာပါတဲ့ ပဲခူးရိုးမပေါ်ကကျေးရွာတွေမှာ စစ်ကောင်စီတပ်စစ်ကြောင်းတွေကျူးလွန်ခဲ့တာတွေနဲ့ ဒေသတွင်း စစ်ရေးအခြေအနေကို ဒီနေ့ နိုဝင်ဘာ၂၇ရက်ညနေပိုင်းမှာ ထုတ်ပြန်တာဖြစ်ပါတယ်။

ပြီးခဲ့တဲ့သြဂုတ် ၇ရက်က ရန်ကုန်-မန္တလေးအမြန်လမ်း (၁၁၅)မိုင်အနီးက ဘုတရာဘုရားအနီးကိုစစ်ကြောင်းထိုးလာတဲ့စစ်ကောင်စီတပ်တွေက ကျီးမနိုးကျေးရွာမှာ ကိုယ်ဝန်ဆောင် မိခင်နှစ်ဦးအပါအဝင် ဒေသခံ ၁၁ဦးကို ဖမ်းဆီးသတ်ဖြတ်ခဲ့တယ်လို့ ဆိုပါတယ်။ အဲ့ဒီအပြင် ဌာနေကရင်လူမျိုး သားအမိနှစ်ဦးကိုလည်း အဓမ္မပြုကျင့် သတ်ဖြတ်သွားတယ်လို့ ထုတ်ပြန်ထားပါတယ်။

Public Service Announcement

နိုဝင်ဘာ ၁၅ရက်ကလည်း အုတ်တွင်းမြို့နယ်က ကျေးရွာတွေကိုစစ်ကြောင်းထိုးလာတဲ့စစ်ကောင်စီတပ်တွေက ဒရုန်းနဲ့ဗုံးကြဲတာတွေ၊ မီးရှို့ဖျက်ဆီးတာတွေကြောင့် ကျွန်းစိုက်ခင်း လုပ်သားမိသားစုငါးဦးသေဆုံးခဲ့တယ်လို့ ထုတ်ပြန်ထားပါတယ်။

လက်ရှိစစ်ရေးအခြေနေကြောင့် ဒေသခံပြည်သူတစ်ထောင်ကျော်စစ်ဘေး ရှောင်နေကြရတယ်လို့ သိရပါတယ်။ အဲ့ဒီ စစ်ဘေးရှောင်တွေကို ပြည်သူ့ကာကွယ်ရေးတပ်ဖွဲ့တွေက စောင့်ရှောက်ပေးထားပြီး အကူအညီတွေလည်းလိုအပ်နေတယ်လို့ ပဲခူးခရိုင်တပ်ရင်း (၃၇၀၁) တပ်ရင်းမှူး ရဲဘော်မင်းခေါင်က အသိပေးထားပါတယ်။

ဒီနေ့ မနက်ပိုင်းမှာလည်း အုတ်တွင်းမြို့နယ် ဘုတလင်ရွာမှာ တိုက်ပွဲတွေပြင်းထန်ပြီး ဒေသခံတွေဟာ တောင်ငူမြို့ပေါ်ကိုထွက်ပြေးလာကြပါတယ်။

ဒါ့အပြင် မနေ့က နိုဝင်ဘာလ၂၆ရက်ကလည်းနတ်တလင်းနဲ့ ပေါင်းတည်မြို့မှာ စစ်ကောင်စီတပ်တွေကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်ခဲ့ပါတယ်။

နတ်တလင်းမြို့နယ် ရှားဖြူကုန်ကျေးရွာက စစ်ကောင်စီ စစ်ဆေးရေးဂိတ်ကို ပဲခူးတိုင်းစစ်ဌာန၊ ဗျူဟာ၂၂ ကွပ်ကဲမှုအောက်ရှိ သာယာဝတီခရိုင် အမှတ် ၃၈၀၁ တပ်ရင်း တပ်ခွဲ (၆) နဲ့ နတ်တလင်းမြို့နယ်ပကဖက တိုက်ခိုက်ခဲ့တာမှာ စစ်ကောင်စီတပ်ဖွဲ့ဝင်နှစ်ဦးသေဆုံးပြီး ဒဏ်ရသူတွေလည်းရှိတယ်လို့ ထုတ်ပြန်ထားပါတယ်။

ပေါင်းတည်မြို့နယ် ပန်းသင်းပင်ကျေးရွာမှာလည်း စစ်ကောင်စီတပ်စစ်ကြောင်းကို မိုင်းဆွဲတိုက်ခိုက်မှုမှာ တစ်ဦးသေဆုံးပြီး တစ်ဦး ဒဏ်ရာရတယ်လို့ ထုတ်ပြန်ထားပါတယ်။

အထက်ပါမြို့နယ်တွေမှာ တိုက်ပွဲတွေဖြစ်နေပေမယ့် စစ်ကောင်စီက ၎င်းတို့ထိန်းချုပ်ထားနိုင်တဲ့မြို့ပေါ်တွေမှာ ရွေးကောက်ပွဲပြုလုပ်ဖို့ကြိုးစားနေတယ်လို့ ဒေသခံတွေကပြောပါတယ်။

စစ်ကောင်စီတပ်ကို အားပေးအားမြှောက်ပြုနေပြီး အတုအ‌ယောင်ရွေးကောက်ပွဲကျင်းပနိုင်ဖို့လှုံ့ဆော်သူတွေ၊ အားပေးကူညီသူတွေကို ပြင်းပြင်းထန်ထန် အရေးယူသွားမယ်လို့လည်းပဲခူးတိုင်းစစ်ဌာနဗျူဟာ၂၂က သတိပေးထားပါတယ်။