ဒီဇင်ဘာ-၂၄၊၂၀၂၅၊မိုမို/People’s Spring
တနင်္သာရီတိုင်း၊လောင်းလုံးမြို့နယ်၊ ကျောက်နီမော်ကျေးရွာက စစ်ကောင်စီတပ်စခန်း တိုက်ခိုက်မှုမှာ ထိခိုက်သေဆုံးသူတွေရှိတယ်လို့ လောင်းလုံးသံမဏိလိပ်ပြာတပ်ဖွဲ့ တာဝန်ရှိသူက လူထုနွေဦးကို ပြောပါတယ်။
မနေ့က(ဒီဇင်ဘာ ၂၃ရက်) မနက် ၁၀နာရီမှာ ကျောက်နီမော်ကျေးရွာက မိုင်ခရိုပိတ်တောင်ပေါ်မှာ တပ်စွဲထားတဲ့စစ်ကောင်စီတပ်ကို ဝင်ရောက်တိုက်ခိုက်ခဲ့တာလို့ ဆိုပါတယ်။
မိနစ် ၂၀နီးပါးကြာတဲ့တိုက်ပွဲအတွင်းမှာ စစ်ကောင်စီတပ်က ဒုတပ်ကြပ်တစ်ဦး အပါအဝင်သုံးဦးသေပြီး လေးဦးဒဏ်ရာရခဲ့တယ်လို့ အသိပေးပါတယ်။
Public Service Announcement
“ အကောင်းဆိုးတော့ ကြိုးစားခဲ့ပါတယ် ။ဒါပေမယ့်လိုချင်တဲ့ အနေထားထိတော့မရခဲ့ပါဘူး။လိုအပ်ချက်တွေ ပြန်ပြင်ပြီးဆက်လက်ကြိုးစားမယ်” လို့ အထက်ပါတာဝန်ရှိသူက တိုက်ပွဲ အခြေအနေကို ရှင်းပြပါတယ်။
စစ်ရေးအရှိန်မြင့်နေတဲ့ကာလဖြစ်တာကြောင့် ပြည်သူတွေအနေနဲ့ သတိပြုသွားလာနေထိုင်ကြဖို့လည်း လောင်းလုံးသံမဏိလိပ်ပြာတပ်ဖွဲ့က တိုက်တွန်းပါတယ်။
လောင်းလုံးမြို့နယ်က မောင်းမကန်တပ်စခန်းကို တော်လှန်ရေးတပ်ဖွဲ့တွေသိမ်းပိုက်ပြီးတဲ့နောက် စစ်ကောင်စီက အင်အားဖြည့်ပြီး မြို့နယ်အတွင်း စစ်ကြောင်းထိုးတာတွေ ရှိနေပါတယ်။
နိုဝင်ဘာက လောင်းလုံးမြို့နယ်တောင်ဘက်ခြမ်းက တိုက်ပွဲတွေမှာ နှစ်ဖက်ထိခိုက်သေဆုံးမှုတွေရှိခဲ့ပါတယ်။
လောင်းလုံးမြို့နယ်မှာ စစ်ကောင်စီက ခမရ(၄၀၆)၊ (၄၀၉)တပ်ရင်းနဲ့ ခလရ(၂၆၇)တပ်ရင်းတွေနဲ့ လှုပ်ရှားနေတာ ဖြစ်ပါတယ်။အဲဒီတပ်ရင်းတွေထဲက တပ်သားတချို့က ကာကွယ်ရေးတပ်ဖွဲ့တွေဆီ အလင်းဝင်တာတွေလည်းရှိနေပါတယ်။
