ဖေဖော်ဝါရီ-၁၂၊၂၀၂၆။အိမ်သွင်/People’s Spring
မိုးမိတ်မြို့ရောက်နေတဲ့ စစ်ကောင်စီတပ်ဖွဲ့တွေက ကားဝယ်စီးဖို့ ဒေသခံတွေဆီ ငွေတောင်းပြီး ဝယ်ခိုင်းနေလို့ အိမ်ထောင်စုအလိုက် ငွေစုပေးနေရတယ်လို့ မြို့ခံအချို့က ပြောပါတယ်။
မိုးမိတ်မြိုကို စစ်ကောင်စီရဲ့ တပ်မ(၅၅)နဲ့တပ်မ(၉၉)လက်အောက်ခံ တပ်ရင်းတွေရောက်နေတာပါ။ တပ်ရင်းမှူးတွေနဲ့ တခြားအရာရှိတွေ စီးဖို့ဆိုပြီး ကားဝယ်ဖို့ ငွေတောင်းနေတာဖြစ်ပါတယ်။
” စစချင်းက ဒေသခံတွေကားကို ချောဆွဲပြီးစီးတာ။ စီးပြီး ဆီကုန်ရင် ကုန်တဲ့နေရာထားခဲ့တာ။ ပိုင်ရှင်တွေက လိုက်ရှာရတယ်။ အခုကျတော့ သူတို့ စီးဖို့ကားဖိုး ကောက်နေတယ်။ အိမ်တိုင်းပေးရတယ်။ သောင်းဂဏန်းရနေ သိန်းဂဏန်းအထိ” လို့ မိုးမိတ်မြို့ခံတစ်ဦးက ပြောပါတယ်။
Public Service Announcement
တအာင်းတပ်မတော်(TNLA)က မိုးကုတ်နဲ့မိုးမိတ်မြို့ကို စစ်ကောင်စီထံ ၂၀၂၅ အောက်တိုဘာမှာ ပြန်ပေးခဲ့တာပါ။ စစ်ကောင်စီတပ် စစ်ကြောင်းတွေက မိုးမိတ်မြို့အတွင်းကို ၂၀၂၅ အောက်တိုဘာ နှောင်းပိုင်းမှာ ပြန်လည်ဝင်ရောက်လာတာဖြစ်ပါတယ်။
အဲဒီနောက်ပိုင်း မြို့အနီးမှာ တိုက်ပွဲတွေဖြစ်ခဲ့ပြီး စစ်ကောင်စီအုပ်ချုပ်ရေးယန္တရားလည်း လည်ပတ်နိုင်ခြင်းမရှိသေးပါဘူး။
မြို့ပေါ်ရပ်ကွက်က ဒေသခံအများစုက တခြားနေရာတွေမှာ ခိုလှုံနေဆဲဖြစ်ပြီး မြို့ပေါ်မှာ အိမ်ထောင်စု ၇၀၀နီးပါး ရှိနေတယ်လို့ သိရပါတယ်။ ပိုင်ရှင်မနေတဲ့ တိုက်အိမ်တချို့မှာ စစ်ကောက်စီတပ်တွေ တပ်စွဲထားပြီး မြို့ထဲက အိမ်တွေကိုလည်း ဖောက်ထွင်းခိုးယူတာတွေ ရှိနေတယ်လို့ မြို့ခံအချို့က ပြောပါတယ်။
” သူခိုးတွေကို ဒလန်လုပ်ခိုင်းပြီး စစ်တပ်ကပါ ခိုးနေတာ။ အိမ်တော်တော်များများ အဖောက် ခံထားရတယ်” လို့ စစ်ရှောင်တစ်ဦးက ပြောပါတယ်။
စစ်ကောင်စီတပ်တွေက မိုးမိတ်မြို့နဲ့ (၂)မိုင်ခန့် အကွာက အုန်းကြောကျေးရွာအထိပဲ ထိန်းချုပ်ထားနိုင်ပြီးတိုက်ပွဲတွေ ကြိုကြားကြိုကြားဆက်ဖြစ်နေပါတယ်။
မိုးမိတ်မြို့နယ် ရွှေဇာလီကျေးရွာမှာရှိတဲ့ စစ်ကောင်စီလက်နက်ခဲယမ်းတွေ သိုလှောင်ထားတဲ့ အဆောက်အအုံကို PDF ပူးပေါင်းတပ်တွေက ပြီးခဲ့တဲ့ ဖေဖော်ဝါရီ ၃ရက်ညမှာ ဗုံးကြဲဖျက်ဆီးခဲ့ပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ် – မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာ ၉ရက်မှာ စတင်ဖွဲ့စည်းခဲ့ပြီး စစ်ကောင်စီစစ်ကြောင်းတွေကို နိုဝင်ဘာ ၃၀ရက်ကစပြီး တိုက်ခိုက်ခဲ့ပါတယ်။စစ်ကောင်စီတပ်တွေရဲ့ အုပ်ချုပ်မှု၊ ကွပ်ကဲမှု၊ ထောက်ပံ့မှု ရပ်ဝန်းတွေကို အထူးစစ်ဆင်ရေးဖော်ဆောင်ပြီး အဆက်မပြတ် တိုက်ခိုက်နေတယ်လို့ MODက အသိပေးထားပါတယ်။ မိုးမိတ်မြို့နယ်နဲ့ မိုးကုတ်မြို့နယ်ကြားထဲက ကျေးရွာတချို့မှာလည်း ယခုရက်ပိုင်းတိုက်ပွဲတွေဆက်ဖြစ်နေပါတယ်။
