ဖေဖော်ဝါရီ-၁၃၊ ၂၀၂၆။ ထားမြတ်/People’s Spring
ကချင်ပြည်နယ်၊ မြစ်ကြီးနားမြို့နယ် ဧရာ၀တီမြစ် တဖက်ကမ်းရှိ တာလောကြီးကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့ကြောင်း ကချင်စစ်ရေးသတင်းရင်းမြစ်တစ်ဦးက ပြောပါတယ်။
မြစ်ကြီးနားအောက်ဘက် ဧရာ၀တီမြစ်တဖက် ကမ်းရှိ ရှမ်းလူမျိုး အများစုနေထိုင်ရာ စန်းကားနဲ့ တာလောကြီးကျေးရွာကို စစ်တပ်က ဒီကနေ့ မနက်မှာ Y12 လေယာဉ်နဲ့ ဗုံးကြဲတိုက်ခိုက်ခဲ့တာလို့ ဆိုပါတယ်။
တာလောကြီးရွာဘက် ဗုံးကြဲတိုက်ခိုက်မှုကို ကြားရကြောင်းကချင်သတင်းရင်းမြစ်က ပြောပြီး ထိခိုက်မှု အခြေအနေတွေမသိရသေးဘူးလို့ ပြောပါတယ်။
Public Service Announcement
အခြားသတင်းရင်းမြစ်တဦးကလည်း တာလောကြီးကျေးရွာ စစ်တပ် ဗုံးကြဲမှုမှာ အရပ်သား တစ်ဦး သေဆုံးကာ အများအပြားဒဏ်ရာရတယ်လို့ လူမှုကွန်ရက်မှာ အသိပေးထားပါတယ်။
ကချင်အမျိုးသမီးအရေးတပ်ကြွလှုပ်ရှားသူဒေါ်နန်ပူကလည်း တာလောကြီးရွာ လေကြောင်း ဗုံးကြဲတိုက်ခိုက်ခံရမှုမှာ တစ်ဦးသေဆုံးပြိး ၇ဦး ဒဏ်ရာရရှိခဲ့တယ်လို့ အသိပေးထားပါတယ်။
စစ်ကောင်စီဟာ ဒီကနေ့မှာ ဝိုင်းမော်မြို့နယ် ကိုလည်း လက်နက်ကြီးပစ်ခတ်တိုက်ခိုက်မှုတွေ ဆက်တိုက်ပြုလုပ်ခဲ့ပါတယ်။
တာလောကြီးရွာ ဗုံးကြဲတာနဲ့ ဝိုင်းမော်မြို့နယ်ကို လက်နက်ကြီး တိုက်ခိုက်တာတွေဟာ ဖေဖော်ဝါရီ ၁၂ရက်မှာ မြစ်ကြီးနားလေဆိပ် အသေခံဒရုန်း တိုက်ခိုက်ခံရတဲ့ ဖြစ်ရပ်နဲ့ ဆက်စပ်နိုင်တယ်လို့ ကချင်စစ်ရေးသတင်းတွေရေးသားဖော်ပြနေသူတွေက သုံးသပ်ထားပါတယ်။
ဒါ့အပြင် မြောက်ပိုင်းတိုင်းစစ်ဌာနချုပ်နဲ့ မြစ်ကြီးနား နန့်ပေါင်လေတပ်တွေဟာ ဧရာ၀တီမြစ်ကို မေးတင်ထိုင်ထားတဲ့ တပ်ဖြစ်ပြီး တဖက်ကမ်း ဘက်ကကျေးရွာတွေကို မကြာခဏ ရမ်းသမ်း ပစ်ခတ်လေ့ရှိပြီး အရပ်သား သေဆုံးထိခိုက်မှုများ မကြာခဏ ဖြစ်ပွားလေ့ရှိကြောင်းလည်း လူမှုကွန်ရက်မှာ ရေးသားထားပါတယ်။
KIAနဲ့ စစ်ကောင်စီတပ်ဟာ ဝိုင်းမော်မြို့နယ်မှာ တိုက်ပွဲတွေပြင်းထန်နေသလို ဗန်းမော်၊ ဖားကန့်၊ အင်းတော်ကြီးဒေသတွေမှာလည်း တိုက်ပွဲတွေဖြစ်ပွားနေပါတယ်။ ဖားကန့်မြို့နယ်မှာလည်း လေကြောင်း လက်နက်ကြီးတိုက်ခိုက်မှုတွေကြောင့် အရပ်သား ပြည်သူထိခိုက်သေဆုံးမှုတွေဖြစ်ပေါ်လျက်ရှိပါတယ်။
(တာလောကြီးကျေးရွာကို စစ်တပ်က ဒီကနေ့ မနက်မှာ ဗုံးကြဲအပြီးတွေ့ရစဉ်။ ဓာတ်ပုံ – Lung Jung LA N)
