ဖေဖော်ဝါရီ-၂၄၊၂၀၂၆။သတိုး/People’s Spring
ရန်ကုန်မြို့၊မင်္ဂလာဒုံမြို့နယ်မှာခရိုင်ရဲစခန်းက ကင်းပတ်ဖို့ထွက်လာတဲ့ ရဲတွေရဲ့ကားကို မိုင်းခွဲတိုက်ခိုက်ခဲ့တယ်လို့ မြို့ပြကြွက်အဖွဲ့ တာဝန်ရှိသူက ပြောပါတယ်။
“ သူတို့ထွက်လာတဲ့အချိန် ပထမတစ်လုံးခွဲလိုက်တာ ကားကိုထိသွားပြီး ကားပေါ်ကပြေးဆင်းပြီး စခန်းထဲပြန်ဝင်သွားပါတယ်။နောက်ပြန်ထွက်လာတော့ နောက်တစ်လုံးထပ်ခွဲလိုက်တာပါ” လို့ စစ်ဆင်ရေးနဲ့ပတ်သက်ပြီးပြောပါတယ်။
ဖေဖော်ဝါရီ ၂၃ ရက် ည ၁၀နာရီကျော်မှာ စစ်ဆင်ရေးကို လုပ်ဆောင်ခဲ့တာဖြစ်ပြီး ပထမ တိုက်ခိုက်မှုမှာ ကားတိုက်ရိုက်ထိခဲ့သလို ဒုတိယတိုက်ခိုက်မှုမှာတော့ ရဲသုံးဦးလောက် ထိနိုင်တယ်လို့ အထက်ပါတာဝန်ရှိသူကဆိုပါတယ်။
Public Service Announcement
“ အမှန်က ပြန်ပြီးတစ်ခုခုလုပ်ဖို့ထွက်လာကြတာ၊ ထပ်ခွဲခံလိုက်ရတော့ ဘာမှမလုပ်နိုင်ဘူးဖြစ်သွားတာ” လို့ မြေပြင်အခြေအနေကို အထက်ပါတာဝန်ရှိသူက ပြောပါတယ်။
မြို့ပြကြွက်အဖွဲ့အနေနဲ့ ဖေဖော်ဝါရီ ၁၀ရက်ညကလည်း မှော်ဘီမြို့နယ် ရဲစခန်းကနေ အရပ်ဝတ်တွေနဲ့ထွက်လာတဲ့ ရဲနဲ့ ပျုစောထီးတွေကိုလက်လုပ်မိုင်းတွေလက်ပစ်ဗုံးတွေနဲ့ တိုက်ခိုက်ခဲ့ပါတယ်။
“ ပွဲတွေများနေပေမယ့်တော်လှန်ရေးကိုလည်း အာရုံစိုက်ပေးကြပါ” လို့ မြို့ပြကြွက်အဖွဲ့ကပြည်သူတွေကို သတင်းစကားပါးပါတယ်။
ဖေဖော်ဝါရီ ၁၅ရက်ကလည်း မင်္ဂလာဒုံမြို့မရဲစခန်းက ဂိတ်ကင်းမှာ အရက်မူးနေတဲ့ ရဲတပ်ဖွဲ့ဝင်တွေကို ပြင်းအားမြင့်မိုင်းနှစ်လုံးနဲ့ တိုက်ခိုက်ခဲ့တယ်လို့ Yangon Army အဖွဲ့တာဝန်ရှိသူက ပြောပါတယ်။
