မတ်−၄၊ ၂၀၂၆။ ထားမြတ်/People’s Spring
ကရင်အမျိုးသားအစည်းအရုံး(KNU) ကျောက်ကြီးမြို့နယ်မှာ အာဏာသိမ်းစစ်တပ်ရဲ့ လက်နက်ကြီးနဲ့ ဒရုန်းတိုက်ခိုက်မှုကြောင့် အမျိုးသား ၂ဦး ဒဏ်ရာရခဲ့ကြောင်း KNU ဗဟိုက သတင်းထုတ်ပြန်ပါတယ်။
KNU အုပ်ချုပ်နယ်မြေသတ်မှတ်ချက်အရ လယ်ဒို(ကျောက်ကြီး)မြို့နယ်က အရပ်သားပြည်သူနေထိုင်ရာကို စစ်ကောင်စီက မတ်လ ၂ရက်မှာ တိုက်ခိုက်မှု ဆက်လက်လုပ်ဆောင်ခဲ့တာပါ။
စစ်ကောင်စီပစ်ခတ်တဲ့ လက်နက်ကြီးဟာ ကျောက်ကြီးမြို့နယ် ကညင်ကမန်းကျေးရွာအတွင်း ကျရောက်ပေါက်ကွဲခဲ့လို့ (၂၇)နှစ်အရွယ် အမျိုးသား တစ်ဦး ဒဏ်ရာရခဲ့ပြီး ကျွန်းကြီးကျေးရွာကိုလည်း စစ်ကောင်စီက ဒရုန်းနဲ့ ဗုံးသီးကြဲလို့ အသက်(၂၈)နှစ်အရွယ် အမျိုးသား တစ်ဦး ဒဏ်ရာရခဲ့တယ်လို့ ဆိုပါတယ်။
Public Service Announcement
စစ်ကောင်စီဟာ ကျောက်ကြီးမြို့နယ်အပါအဝင် KNU အုပ်ချုပ်နယ်မြေတွေက အရပ်သား ပြည်သူလူထုတွေကို ပစ်မှတ်ထားတဲ့ တိုက်ခိုက်မှုတွေ ဆက်တိုက်ပြုလုပ်ခဲ့လို့ အရပ်သား ပြည်သူသေဆုံးမှု မကြာခဏ ဖြစ်ခဲ့ပါတယ်။
အာဏာသိမ်းစစ်ကောင်စီဟာ လက်လွတ်ဆုံးရှုံးထားရတဲ့နယ်မြေဒေသတွေက ပြည်သူလူထုတွေကို ပစ်မှတ်ထား တိုက်ခိုက်မှုတွေ ပိုမိုပြုလုပ်လာနေပြီး အရပ်သားပြည်သူ အစုလိုက်၊ အပြုံလိုက် သေဆုံးထိခိုက်ခဲ့ရတဲ့ ဖြစ်စဉ်တွေမကြာခဏ ဖြစ်ပေါ်လျက်ရှိပါတယ်။
စစ်ကောင်စီရဲ့ လေကြောင်းတိုက်ခိုက်မှုရန်ကို ပိုသတိထားပြီး လေကြောင်းရန် ကာကွယ်ရေး ဆိုင်ရာ အချက်တွေကိုလိုက်နာဖို့ စစ်ရေးအရှိန်မြင့်လာနိုင်တဲ့ အခြေအနေမှာ စစ်ရေးသတိရှိဖို့ တော်လှန်ရေးတပ်ဖွဲ့တွေက တိုက်တွန်းနှိုးဆော်ထားပါတယ်။
