မတ်-၁၂၊၂၀၂၆။ ထားမြတ်/People’s Spring
ရခိုင်ပြည်နယ်၊ အမ်းမြို့နယ်၊ ဒါးလက်ချောင်းဒေသမှာရှိတဲ့ စစ်သုံ့ပန်းစခန်းကို အာဏာသိမ်းစစ်တပ်က လေကြောင်းဗုံးကြဲတိုက်ခိုက်ခဲ့တာဟာ စစ်ခေါင်းဆောင်တွေက လက်အောက်ငယ်သားစစ်သည်တွေကို ခြိမ်းခြောက်တဲ့ လုပ်ရပ်ဖြစ်ပြီး သူတို့အတွက် အသေခံမတိုက်သူတွေကို အပြတ်ရှင်းမယ်ဆိုတဲ့ သတင်းစကားပေးတာလို့ ပြည်သူ့ပန်းတိုင်က သုံးသပ်ထားပါတယ်။
မတ်လ ၈ ရက်မှာ စစ်ကောင်စီဟာ အမ်းမြို့နယ် ဒါးလက်ချောင်းဒေသက အာရက္ခတပ်တော်(AA) ရဲ့ အကျဉ်းစခန်းနေရာကို လေကြောင်းတိုက်ခိုက်ခဲ့ရာ AAက ဖမ်းဆီးထားတဲ့ စစ်ကောင်စီတပ်ဖွဲ့ဝင် ၁၀၀ ကျော်သေဆုံးခဲ့ပြီး ၃၀ ကျော်ဒဏ်ရာရခဲ့ပါတယ်။
“သုံးနာရီခွဲနီးပါးအကြာ လေကြောင်းကနေ အငြှိုးတကြီးနဲ့ ကိုယ့်လူကိုယ် ဗုံးကြဲသတ်ဖြတ်ခဲ့တာကြောင့် (ကနဦးစာရင်းအရ) စစ်သုံ့ပန်း ၁၁၆ ဦး သေဆုံးခဲ့ရပြီး ၃၂ ဦး အပြင်းအထန် ဒဏ်ရာရရှိခဲ့ကြောင်း AA Info Desk ရဲ့ ယနေ့ထုတ်ပြန်ချက်အရ သိရှိရပါတယ်။ ဒီဖြစ်စဉ်ကို ကြည့်ခြင်းအားဖြင့် စစ်ခေါင်းဆောင်တွေဟာ သူတို့အတွက် အသေခံပြီး မတိုက်သူတွေကို အပြတ်ရှင်းပစ်ခြင်းနည်းလမ်းနဲ့ (မနိုင်လို့) လက်နက်ချသူအောက်ခြေစစ်သည်တွေကို တိုက်ရိုက်ခြိမ်းခြောက်လိုက်တာလို့ ဆိုနိုင်ပါတယ်” ပါတယ်လို့ ပြည်သူ့ပန်းတိုင်က မနေ့က မတ်လ ၁၁ရက်မှာ ထုတ်ပြန်ထားပါတယ်။
Public Service Announcement
ဒါ့အပြင် တဖက်မှာလည်း စစ်ကောင်စီရဲ့ စစ်ရာဇဝတ်မှု၊ လူမျိုးတုံး သတ်ဖြတ်မှုတွေအတွက် လူသက်သေတွေကို တမင်တကာ လက်စတုံး ဖျောက်ဖျက်ပစ်နေတာဖြစ်တယ်လို့ ယူဆနိုင်ကြောင်းလည်း ပြည်သူ့ပန်းတိုင်က ရေးသားထားပါတယ်။
AAက ဖမ်းမိထားတဲ့ အနောက်ပိုင်းတိုင်း စစ်ဌာနချုပ် ဒုတိုင်းမှူး ဗိုလ်မှူးချုပ် သောင်းထွန်းဟာလည်း စစ်ကောင်စီက အကျဉ်းစခန်းကို လေကြောင်း လာတိုက်တဲ့အချိန် ကိုယ်တိုင် ကြုံတွေ့ခဲ့ရာတာတွေကို အခုလို ထုတ်ဖော်ပြောဆိုထားပြီး ဒါဟာ ရည်ရွယ်ချက်ရှိရှိ လုပ်ဆောင်ခြင်းဖြစ်တယ်လို့ မှတ်ချက်ပြုထားပါတယ်။ စစ်ကောင်စီဟာ လေကြောင်းမတိုက်ခိုက်မီ မတ်လ ၆ရက်မှာ လေကြောင်း ကင်းထောက်ခဲ့ပြီး ထောင်ဆိုတာ သိသာတဲ့နေရာလို့ ပြောပါတယ်။
” လေကြောင်းလည်း ကင်းထောက်ထားတယ်ဆိုတော့ မသိစရာတော့ မရှိဘူး လို့ ကျနော်ထင်တယ်။ သိသိကြီးနဲ့ ကြဲပစ်လိုက်တဲ့သဘော ပဲပေါ့။ ရက်စက်တဲ့ သဘောဖြစ်သွားတာပေါ့” လို့ ဗိုလ်မှူးချုပ် သောင်းထွန်းက ပြောပါတယ်။
လေကြောင်း တိုက်ခိုက်မှုကြောင့် အရာရှိတွေ အများအပြားလည်းသေဆုံးခဲ့ကြောင်း ဗိုလ်မှူးချုပ် သောင်းထွန်းက ပြောပါတယ်။
“ဗိုလ်မှူးချုပ်မြင့်ရွှေကတော့ မီးလောင်တဲ့အဆောင်ထဲမှာ သူရှိပါတယ်။ ဗိုလ်မှူးချုပ်မြင့်ရွှေပါသွားတယ်။ နောက် ဗိုလ်မှူးအဆင့်တွေ ပါသွားတယ်။ နောက် ကျနော်တို့ကို ထိန်းသိမ်းထားတဲ့ဘေးမှာရှိတဲ့ဆေးခန်းပေါ့ ဆေးခန်းကျနော်တို့ စစ်သည်တွေထဲကနေပြီးတော့မှ တချို့ အရာရှိ ဆရာဝန် လေးတွေ ပါသွားတယ်။ တချို့ ဆရာဝန်တချို့ လည်းပါတာပေါ့။ နောက် CMA တွေ ပါသွားတာတွေရှိတယ်။ တချို့ဆိုရင် စစ်ဦးစီးမှူး ဒုတိယတန်းအဆင့် ဗိုလ်မှူးအဆင့်နှစ်ယောက်သုံးယောက် လောက် ပါသွားတာ ကျနော်သိရပါတယ်”လို့ AA ဆီမှာ စစ်သုံ့ပန်းဖြစ်နေတဲ့ နပခဒုတိုင်းမှူး ဗိုလ်မှူးချုပ်သောင်းထွန်းက ပြောပါတယ်။
