ကျောက်တံခါးမှာ စစ်တပ်ကလက်နက်ကြီးနဲ့ပစ်၊ ဒရုန်းနဲ့ဗုံးကြဲလို့တစ်မိသားစုတည်းလေးဦးသေဆုံး

■ မိသားစုထဲက သုံးလသားအရွယ်​ယောကျာ်းလေးငယ်တဦးသာအသက်ရှင်​

မတ်-၁၄၊၂၀၂၆။ဒလပန်း/People’s Spring

ပဲခူးတိုင်း၊ကျောက်တံခါးမြို့နယ်မှာစစ်တပ်က လက်နက်ကြီးနဲ့ပစ် ၊ဒရုန်း နဲ့ ဗုံးကြခဲ့တာကြောင့်မိသားစုတစ်စုထဲက မိခင်၊ဖခင်နဲ့ ကလေးငယ် ၂ ဦး စုစု​ပေါင်း​လေးဦးသေဆုံးခဲ့တယ်လို့ ဒေသခံတွေက​ပြောပါတယ်။

မတ်လ၁၃ရက် ည ၉ နာရီကျော်အချိန်မှာ ပဲနွယ်ကုန်းမြို့၊ ရွှေဝါကျေးရွာ အခြေစိုက် အမှတ်(၃၀၇)​ခြေမြန်တပ်ရင်း (ခမရ ၃၀၇ )မှ စစ်သား​တွေကသဲဖြူရွာသစ် ကျေးရွာအတွင်းကို လက်နက်ကြီး ၂ လုံး၊ ဒရုန်းဗုံးသီး ၄ လုံးနဲ့ ပစ်ခတ်တိုက်ခိုက်ခဲ့ပါတယ်။

Public Service Announcement

ပစ်ခတ်မှုကြောင့်သဲဖြူရွာသစ်ကျေးရွာမှ အသက် ၄၀ နှစ်အရွယ်ကိုဝင်းဇော် ၊ ဇနီးဖြစ်တဲ့ အသက် ၃၈ နှစ်အရွယ် မမာလာဝင်း ၊ သားဖြစ်သူ နဲ့ သမီးဖြစ်တဲ့ က​လေးငယ် ၂ ဦးစုစုပေါင်း မိသားစုဝင် ၄ ဦးသေဆုံးခဲ့ပါတယ်။မိသားစုထဲမှာ ၃ လသားအရွယ် ​​ယောကျာ်းလေးငယ်တဦးပဲအသက်ရှင်လွတ်​မြောက်ခဲ့တယ်လို့ ​ဒေသခံ​တွေက ​ပြောပါတယ်။

“ဘာတိုက်ပွဲမှ မရှိဘူး။ အကြောင်းမဲ့ လာပစ်တာ။ သေဆုံးသွားတဲ့ ၄ ဦးက တစ်မိသားစုထဲ။ လသားအရွယ်ကလေးတစ်ယောက်ပဲအသက်ရှင်တယ်” လို့ ဒေသခံတစ်ဦးက ပြောပါတယ်။

​သေဆုံးခဲ့သူ​တွေဟာအိပ်​နေတုန်း ​အိပ်ယာထဲမှာသေဆုံးခဲ့တာကို သတင်းဓါတ်ပုံ​တွေမှာ​တွေ့ရပါတယ် ။

ပြီးခဲ့တဲ့ ဖေဖော်ဝါရီ ၂၃ ရက်မှာလည်း သမင်အင်းကုန်းကျေးရွာအတွင်းကို စစ်တပ်က ဒရုန်းနဲ့ ဗုံးကြဲချမှုကြောင့် နေအိမ်သုံးလုံး မီးလောင်ပျက်စီးခဲ့ပါတယ်။

ပဲနွယ်ကုန်းမြို့၊ ရွှေဝါကျေးရွာ အခြေစိုက် ခမရ ၃၀၇ တပ်ရင်း၊ ပိန်းဇလုတ်အခြေစိုက် ခမရ ၂၆၄ တပ်ရင်း နဲ့ ကျောက်တံခါးမြို့မှာတပ်စွဲထားတဲ့ စစ်တပ်တပ်ဖွဲ့ဝင်တွေဟာ ကျောက်တံခါးမြို့နယ်အတွင်းက ကျေးရွာတွေအပါအဝင် စစ်တောင်းမြစ်တစ်လျှောက်က ကျေးရွာတွေကို လက်နက်ကြီးပစ်ခတ်တာတွေ နေ့စဥ်နီးပါးလုပ်ဆောင်နေကြတာလည်းဖြစ်ပါတယ်။