မတ်-၂၅၊၂၀၂၆။ကဖေး/People’s Spring
ကသာမြို့မှာခြေမြန်တပ်ရင်း ခမရ(၃၀၉)ကို စစ်ကူနဲ့ လက်နက်ခဲယမ်းလာပို့တဲ့ စစ်တပ်ရဟတ်ယာဉ်၁စီးကိုတော်လှန်ရေးပူးပေါင်းတပ်တွေကပစ်ခတ်လို့ ထိမှန်ပြီး အရေးပေါ် ဆင်းသက်လိုက်ရတယ်လို့ သတင်းရရှိပါတယ်။
အဆိုပါဖြစ်စဥ်ဟာ ဒီကနေ့ (မတ်လ ၂၅ ရက်နေ့) ညနေ ၄ နာရီခန့်မှာ ဖြစ်ပွားခဲ့တာလို့ စစ်ရေးသတင်းရင်းမြစ်ကပြောပါတယ်။
“ညနေက Mi17 ၃ စီးဆင်းဖို့ကို ဖိုက်တာတွေ ပတ်ပျံပေးတာ။ပြန်အတက်မှာ ၂ စီးမြောက်ရဟတ်ယာဉ်ကို ထိတယ်။အဲ့ဒီအစီးက ငအိုးမှာ အရေးပေါ်ဆင်းရတယ်”လို့ အထက်ပါသတင်းရင်းမြစ်ကပြောပါတယ်။
Public Service Announcement
မတ်လ ၂၅ရက် ညနေ ၃နာရီ ၃၀မိနစ်နဲ့ ၄နာရီကြားမှာ မိတ္ထိလာ၊ တံတားဦး၊ ဟုမ္မလင်းလေဆိပ်တက် ဂျက်ဖိုက်တာ ၅စီးက ခမရ(၃၀၉)အနီးနဲ့ ကသာမြို့နယ်အတွင်း ပတ်ပျံပြီး ရဟတ်ယာဉ် ၃စီးက ၃၀၉ တပ်ရင်းထဲကို ဆင်းသက်ခဲ့တယ်လို့ဆိုပါတယ်။
ရဟတ်ယာဉ်၃စီးက စစ်ကောင်စီတပ်ဖွဲ့ဝင်တွေနဲ့ လက်နက်ခဲယမ်းတွေချပြီး ပြန်တက်စဉ် PDF ပူးပေါင်းတပ်တွေကပစ်ခတ်တိုက်ခိုက်ခဲ့တယ်လို့ ဆိုပါတယ်။ ဒုတိယမြောက်အစီးကို ထိမှန်ပြီး မဘိမ်းမြို့နယ်၊ငအိုးဘောလုံးကွင်းထဲကို အရေးပေါ်ဆင်းသက်ခဲ့ရတယ်လို့ နောက်ထပ်သတင်းရင်းမြစ်တစ်ဦးကပြောပါတယ်။
ခမရ(၃၀၉)ကနေတက်လာတဲ့ Mi-17 ရဟတ်ယာဉ်၃စီးအနက် ၁ စီးက ညနေ ၄ နာရီ၁၅မိနစ်ခန့်မှာ ငအိုးဘောလုံးကွင်းထဲကို ဆင်းသက်ခဲ့ပြီး နောက်ထပ် ၂စီးက ညနေ ၄နာရီ၄၅မိနစ်ခန့်မှာသပိတ်ကျင်းမြို့ အခြေစိုက် တွင်းငယ် အမှတ် (၁၃)တန်းမြင့်လေ့ကျင့်ရေး သင်တန်းကျောင်းထဲကို ဆင်းသက်သွားတယ်လို့လေကြောင်းရန်စောင့်ကြည့်သတိပေး ရေး တယ်လီဂရန်ချန်နယ်A.R.P (AIR RAID PRECAUTIONS) က လည်းဖော်ပြထားပါတယ်။
လက်ရှိမှာ ကသာမြို့အနီး တိုက်ပွဲတွေဖြစ်ပွားနေတယ်လို့သိရပါတယ်။ ကသာမြို့က စစ်ကောင်စီတပ်စွဲထားတဲ့နေရာတွေကို ၂၀၂၅ ခုနှစ် ဒီဇင်ဘာလ၂၈ရက်မနက်အစောပိုင်းမှာ ပြည်သူ့ကာကွယ်ရေးတပ်ဖွဲ့တွေကတိုက်ခိုက်ပြီး မြို့သိမ်းတိုက်ပွဲ ဖော်ဆောင်ခဲ့ပါတယ်။ စစ်တပ်က မြို့ကို ဗုံးကြဲလို့ တောိလှန်ရေးတပ်တွေပြန်ဆုတ်ခွာထားစဉ် ဒေသခံတွေ မြို့ထဲမှာပြန်လာနေဖို့ စစ်ကောင်စီက ဖိအားပေးခဲ့ပြီး စာသင်ကျောင်းတွေကိုလည်းအတင်းအကြပ်ပြန်ဖွင့်ခိုင်းခဲ့ပါတယ်။
မတ်လ ၂၀ရက်မနက်မှာတော့ တော်လှန်ရေးတပ်တွေက စစ်ကောင်စီတပ်စွဲထားတဲ့နေရာတချို့ကို ပြန်လည်တိုက်ခိုက်ခဲ့ပါတယ်။ အဲဒီနေ့မနက်မှာပဲ စစ်ကောင်စီက မြို့ပေါ်ကို ပစ်မှတ်ထားဗုံးကြဲခဲ့ပါတယ်။မတ်လ ၂၀ရက် နေ့လယ်မှာ ကသာမြို့ ရပ်ကွက်(၃)ထဲကစစ်ဘေးရှောင်တွေ ခိုလှုံနေတဲ့ ဘုန်းကြီးကျောင်းကို လေကြောင်းကနေ ဗုံးကြဲလို့ သံဃာတော်အချို့နဲ့ စစ်ဘေးရှောင်တွေအပါအဝင် ၈၀ဦးခန့်အထိ သေဆုံးထိခိုက်သေဆုံးမှုတွေရှိခဲ့ပါတယ်။ အဲဒီနောက်ပိုင်း စစ်တပ်က ပြည်သူတွေထွက်မရအောင် မြို့ပေါ်ရပ်ကွက်တွေကိုပိတ်ဆို့ထားပြီး လေကြောင်းကနေလည်းဗုံးကြဲနေတယ်လို့သိရပါတယ်။
မတ် ၂၅ ရက်မနက်ပိုင်းနဲ့ညနေပိုင်းမှာ စစ်ကောင်စီက ကသာ၊ ထီးချိုင့်၊ ကောလင်း၊ပင်လည်ဘူးမြို့တွေကိုဗုံးကြဲလို့ အရပ်သားထိခိုက်သေဆုံးမှုတွေရှိနေပါတယ်။
