ဧပြီ−၁၀၊ ၂၀၂၆၊ဟာနာဆန်/People’a Spring
မကွေးတိုင်း၊ နတ်မောက်မြို့နယ် ဂွေးချောင်းရွာအနီးမှာ ပျူစောထီးအဖွဲ့ဝင်တွေ တိုက်ခိုက်ခံရပြီး ၂ ဦး သေဆုံးသွားပါတယ်။
ဖြစ်စဉ်ကတော့ ပိတောက်ငုတ် ပျူစောထီးကျေးရွာက ခေါင်းဆောင် ခင်မောင်ဌေးရဲ့ တပည့်တွေဖြစ်တဲ့ အောင်ဌေးလွင် အပါအဝင် ၃ဦးဟာ ဂွေးချောင်းရွာက မင်္ဂလာဆောင်ကို သွားမယ်ဆိုတဲ့ သတင်းကို ငါးပြေမပြောက်ကျားတပ်ဖွဲ့က ကြိုရထားတာပါ။ ဒါကြောင့် ဧပြီ ၈ ရက် နေ့လယ် ၁ နာရီ ၃၀ မိနစ်ခန့်မှာ မင်္ဂလာဆောင်ကအပြန် စောင့်ကြိုပစ်ခတ်ခဲ့တာဖြစ်ပြီး အောင်ဌေးလွင်နဲ့ အေးဇော်တို့ ၂ ဦး နေရာမှာတင် ပွဲချင်းပြီး သေဆုံးသွားကြောင်း သရက်ခရိုင် အမှတ် (၃)တပ်ရင်း (ငါးပြေမပြောက်ကျားတပ်ဖွဲ့)ရဲ့ တာဝန်ရှိသူက ပြောပါတယ်။
တိုက်ခိုက်မှုအတွင်း အသက်(၁၄)နှစ်ခန့်ရှိ ပျူစောထီးအဖွဲ့ဝင် မောင်ဝေယံဟာ ၎င်းရဲ့လွယ်အိပ်အတွင်းရှိ လက်ပစ်ဗုံးနဲ့ ပြန်လည်တိုက်ခိုက်ဖို့ ကြိုးစားခဲ့ပြီး ကာကွယ်ရေးတပ်ဖွဲ့က အချိန်မီ ဖမ်းဆီးထိန်းသိမ်းနိုင်ခဲ့တယ်လို့ ငါးပြေမပြောက်ကျားတပ်ဖွဲ့က ဆိုပါတယ်။
Public Service Announcement
“သေသွားတဲ့နှစ်ယောက်က ပိတောက်ငုတ်ပျူခေါင်းဆောင်ရဲ့ အားကိုးရတဲ့ တပည့်တွေပါ။”လို့ ငါးပြေမပြောက်ကျားတပ်ဖွဲ့ရဲ့ တာဝန်ရှိသူက ပြောပါတယ်။
သူတို့ဆီကနေ ဖုန်း ၃လုံး၊ Laptop ၁လုံးနဲ့ လက်ပစ်ဗုံး ၁လုံးကို သိမ်းဆည်းရမိခဲ့သလို အတူပါလာတဲ့ အသက် ၁၄ နှစ်အရွယ် မောင်ဝေယံကိုတော့ အသက်မပြည့်သေးတာကြောင့် နောက်နောင် စစ်ကောင်စီနဲ့ မပူးပေါင်းဖို့ ဆုံးမပြီး ပြန်လွှတ်ပေးခဲ့တယ်လို့ သိရပါတယ်။
သေဆုံးသွားတဲ့ ပျူစောထီး ၂ ဦးဟာ အတင်းအဓမ္မ ပေါ်တာဆွဲတာ၊ ငွေညှစ်တာနဲ့ ပြည်သူ့အိုးအိမ်တွေကို မီးရှို့ဖျက်ဆီးတဲ့နေရာမှာ ပါဝင်သူတွေဖြစ်တယ်လို့ ငါးပြေမပြောက်ကျားတပ်ဖွဲ့က ထုတ်ပြန်ထားပါတယ်။
နတ်မောက်မြို့နယ်ထဲကို အောင်လံမြို့အခြေစိုက် အမှတ်(၁၇)ကာကွယ်ရေးပစ္စည်းစက်ရုံ (ကပစ−၁၇ )က စစ်ကြောင်းတစ်ကြောင်းနဲ့ နေပြည်တော်ကလာတဲ့စစ်ကြောင်းတွေ ရောက်ရှိနေပြီး ဒေသတွင်းတော်လှန်ရေးအင်အားစုတွေနဲ့ ဧပြီလဆန်းပိုင်းကစပြီး တိုက်ပွဲတွေ ဖြစ်ပွားနေတယ်လို့ ဒေသခံတွေဆီက သိရပါတယ်။
