ဧပြီ-၁၄၊၂၀၂၆။မိထက်/People’s Spring
ဧရာဝတီတိုင်း၊ လေးမျက်နှာမြို့နယ်မှာ အာရက္ခတပ်တော်(AA)နဲ့ စစ်ကောင်စီတပ်တို့ တိုက်ပွဲပြင်းထန်နေပြီး စစ်ကောင်စီက လေကြောင်းကနေ ဗုံးကြဲတိုက်ခိုက်နေတယ်လို့ သတင်းရရှိပါတယ်။
လေးမျက်နှာမြို့နယ်မှာ ပြီးခဲ့တဲ့မတ်လဆန်းက တိုက်ပွဲတွေပြင်းထန်ခဲ့ပြီးနောက် စစ်ရေးအခြေအနေငြိမ်သက်နေရာကနေ အခု ဧပြီ ၇ရက်ကစပြီး တိုက်ပွဲပြန်ဖြစ်နေတာပါ။ စစ်ကောင်စီက လေကြောင်းကနေဗုံးကြဲပြီး မြေပြင်ကနေလည်း အင်အားတွေဖြည့်နေတယ်လို့ စစ်ဘေးရှောင်နေကြရတဲ့ ဒေသခံတွေကပြော ပါတယ်။
“တအုန်းအုန်းနဲ့ ချနေတာ။လေယာဉ်က ညဘက်တွေပါ လာကြဲတယ်။ စက်စက်ယိုကျေးရွာဘက်ကိုလည်း လမ်းမတွေပေါ်မှာ လက်နက်ကြီးတွေဆင်ပြီး ပစ်နေတယ်”လို့ ဒေသခံတစ်ဦးက ပြောပါတယ်။
Public Service Announcement
လေးမျက်နှာမြို့နယ်က စက်စက်ယိုကျေးရွာအပါအဝင် စခန်းတချို့ကို AAနဲ့ ပူးပေါင်းတပ်တွေက သိမ်းယူထားတာဖြစ်ပြီး စစ်ကောင်စီက တန်ပြန် စစ်ရေးလှုပ်ရှားလာလို့ တိုက်ပွဲတွေဖြစ်နေတာပါ။စစ်ကောင်စီက လေကြောင်းကနေ ဗုံးကြဲသလို ပုသိမ်-မုံရွာလမ်းနဲ့ ပုသိမ် -ဟင်္သာတလမ်းကနေ အင်အားတွေ ဖြည့်နေပါတယ်။
လေးမျက်နှာနဲ့ ဆက်စပ်နေတဲ့ ဟင်္သာတ၊တလုထ္ထော်၊ အင်္ဂပူ၊ ရေကြည်မြို့နယ်တွေက အဝေးပြေးလမ်းမတွေပေါ်မှာလည်း သဲအိတ်တွေနဲ့ ဘန်ကာတွေ ဆောက်ထားပါတယ်။
” သဲအိတ်တွေကို ရွာထိပ်တွေမှာ လာပုံထားတာ။ လူတော့ မရှိဘူး။ ပြည်သူ့စစ်တွေကို အသေခံခိုင်းဖို့ဖြစ်မယ်”လို့ ရေကြည်မြို့ခံတစ်ဦးက ပြောပါတယ်။
လေးမျက်နှာမြို့နယ်မှာ တိုက်ပွဲဖြစ်ရင် အနီးပတ်ဝန်းကျင်မြို့နယ်တွေမှာ စစ်ကောင်စီက စစ်ဆေးရေးတင်းကြပ်ပြီး စစ်ရေးပြင်ဆင်မှုလည်း လုပ်လေ့ရှိပါတယ်။
” တိုက်ပွဲဖြစ်တဲ့ရက်တွေဆို စစ်ဆေးရေးဂိတ်ကကောင်တွေမျက်နှာသေတွေနဲ့”လို့ ပုသိမ်ကို ပြေးဆွဲနေတဲ့ ယာဉ်မောင်းတစ်ဦးက ပြောပါတယ်။
လေးမျက်နှာမြို့အနီး ဟင်္သာတခရိုင်၊ ကွင်းကောက်မြို့မှာရှ်ိတဲ့ စစ်ကောင်စီရဲ့ တန်းမြင့်လေ့ကျင်းရေးကျောင်း တတက(၅)ကိုလည်း အင်အားအများအပြားဖြည့်းတင်းနေပြီး အဲဒီနေရာကနေတဆင့် စစ်မှုထမ်းသင်တန်းဆင်းတွေကို ရှေ့တန်းကို လွှတ်နေတာတွေ့တယ်လို့ ဒေသခံတွေက ပြောပါတယ်။
