သင်္ကြန်နောက်ဆုံးနေ့မှာ စစ်တပ်က ပေါက်မြို့နယ် လေကြောင်းတိုက်ခိုက်၊ ပြည်သူ၂ဦး သေဆုံးပြီး ၅ဦးဒဏ်ရာရ

ဧပြီ-၁၆၊၂၀၂၆၊ဟာနာဆန်၊ရှိန်း/ People’s Spring

သင်္ကြန်ပွဲတော်နောက်ဆုံးနေ့ အတက်နေ့မှာ စစ်တပ်က မကွေးတိုင်း၊ပေါက်မြို့နယ်က ဝန်လဲ (အောက်စု)ကျေးရွာကို စစ်တပ်ကလေကြောင်းတိုက်ခိုက်ရာ ပြည်သူနှစ်ဦး သေဆုံးပြီး ၅ဦးထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

ဒီကနေ့ ဧပြီ ၁၆ ရက် နေ့လယ် ၂ နာရီခွဲခန့်က ပေါက်မြို့နယ်၊ ဝန်လဲရွာကို မိတ္ထီလာ ရှမ်းတဲလေတပ်ကနေ တက်လာတဲ့ ဂျက်ဖိုက်တာနဲ့ ပေါင် ၅၀၀ ဗုံးဖြင့် ရွာလယ်တည့်တည့် လေကြောင်းတိုက်ခိုက်မှု ပြုလုပ်ခဲ့တာပါ။

အဆိုပါလေကြောင်းတိုက်ခိုက်မှုကြောင့် ပြည်သူ ၂ ဦး နေရာတင် သေဆုံးပြီး ထိခိုက်ဒဏ်ရာရရှိသူ ၅ ဦးအနက် ၂ ဦးစိုးရိမ်ရကြောင်း ပေါက်မြို့နယ် လူသားစာနာဌာနက အသိပေးပါတယ်။

Public Service Announcement

ထိခိုက်သေဆုံးသူတွေထဲမှာ အမျိုးသမီးတွေပါ ပါဝင်နေကြောင်း ပေါက်မြို့နယ် လူသားစာနာဌာနရဲ့ ဓာတ်ပုံမှတ်တမ်းတွေအရ သိရပါတယ်။

“နေအိမ်အတွင်းမှာ ရှိနေတဲ့ ​ပြည်သူနှစ်ဦးသေဆုံးပြီး ခြောက်ဦးထိခိုက်ဒါဏ်ရာ များရရှိတယ်လို့သိရပါတယ် ။လူနေအိမ်ခြောက် လုံး ပျက်စီးတယ်လို့လည်း သိရပါတယ်။”လို့ အညာမြေအရပ်အဖွဲ့အစည်း-မြိုင်က တာဝန်ရှိသူက ပြောပါတယ်။

အဆိုပါကျေးရွာဟာ အိမ်ခြေ ၅၀ ခန့်သာရှိပြီး သင်္ကြန်ရက် ရေကစား ပျော်ပါး ကခုန်နေခြင်းမရှိဘဲ လေကြောင်းတိုက်ခိုက်သွားတာဖြစ်ကြောင်း ပေါက်မြို့နယ် လူသားစာနာဌာနက ထပ်မံအသိပေးပါတယ်။

သင်္ကြန်တွင်းမှာ စစ်ကောင်စီဟာ ရန်ကုန်၊ မန္တလေးအပါအဝင် မြို့ကြီးတွေမှာ သင်္ကြန်ပွဲကို စည်ကားအောင်ပြုလုပ်နေပေမဲ့ တော်လှန်ဒေသအသီးသီးက ကျေးရွာတွေမှာတော့ လေကြောင်းတိုက်ခိုက်မှုတွေ၊ စစ်ကြောင်းထိုးမီးရှို့တာတွေ ဆက်တိုက်ပြုလုပ်နေပါတယ်။