ဧပြီ – ၁၆ ၊၂၀၂၆ ၊ နိုင်ပကောင်း/People’s Spring
ကရင်ပြည်နယ်၊ ဖာပွန်ခရိုင် ၊ KNU တပ်မဟာ (၅) နယ်မြေကို သင်္ကြန်ကာလအတွင်း စစ်ကောင်စီလေတပ်က နေ့စဉ်နီးပါး ဗုံးကြဲ တာကြောင့် သုံးရက်အတွင်းအရပ်သား လေးဦး သေဆုံးခဲ့ရတယ်လို့ တပ်မဟာ (၅)ပြောရေးဆိုခွင့်ရှိသူ ဗိုလ်မှုးကြီးစောကလယ်ဒိုက ပြောပါတယ်။
သင်္ကြန်အကျနေ့ ဧပြီလ ၁၄ ရက် ည ၁၀ နာရီခန့်က မူတြော်(ဖာပွန်)ခရိုင်၊တပ်မဟာ (၅)နယ်မြေက ကောလိပ်ကျောင်းတစ်ကျောင်း နဲ့ အထက် တန်းကျောင်း တစ်ကျောင်း ဗုံးကြဲခံရပြီး အဆောက်အဦးတွေ ထိခိုက်ကုန်တယ််လို့ ဗိုလ်မှုးကြီးစောကလယ်ဒိုက ဆိုပါတယ်။
KNU လက်အောက်ခံ ကရင်ပညာရေးနဲ့ ယဉ်ကျေးမှုဌာန(KECD)ကလည်း ဧပြီလ ၁၄ရက်က ဖာပွန်ခရိုင် ၊ မူတြော်ဂျူနီယာကောလိပ်(MTJC) လေကြောင်းတိုက်ခိုက်ခဲ့ရပြီး ထိခိုက်ပျက်စီးမှုကို မှတ်တမ်းဓာတ်ပုံနဲ့တကွ ထုတ်ပြန်ထားပါတယ်။
Public Service Announcement
ဒါအပြင် အနီးအနားရှိ ကျေးရွာတွေကိုလည်း ဗုံးကြဲရာမှာ လူထိခိုက်မှုမရှိပေမယ့် နေအိမ်အများအပြား ထိခိုက်ပျက်စီးခဲ့ရတယ်လို့ ဗိုလ်မှုးကြီးစောကလယ်ဒိုက အသိပေးပါတယ်။
သင်္ကြန်အကြတ်နေ့ ဧပြီလ ၁၅ ရက် နေ့ခင်း ၃ နာရီအချိန်မှာ မူတြော်(ဖာပွန်)ခရိုင်၊ လူသောမြို့နယ်၊ ဟဲပါကျေးရွာအုပ်စု၊ ဟဲပါရွာကို တိုက်လေ ယာဉ် နှစ်စီး ၊ Y -12 နှစ်စီးတို့နဲ့ ဗုံးကြဲတာကြောင့် ရွာလုံးကျွတ်နီးပါး မီးလောင်ပျက်စီးပြီး အရပ်သား လေးဦး သေဆုံးကာ ၁၃ ဦး ထိခိုက်ဒဏ်ရာရတယ်လို့ ဗိုလ်မှုးကြီးစောကလယ်ဒိုက ဆိုပါတယ်။
“ရွာလုံးကျွတ်မီးလောင်သွားတယ်လေ၊ အိမ်ခြေအနည်းအကျဉ်းပဲကျန်တယ်၊ မီးလောင်သွားတာများတယ်လေ” လို့ ဗိုလ်မှုးကြီးစောကလယ်ဒိုက ပြောပါတယ်။
ဒီနေ့ သင်္ကြန်အတက်နေ့ ဧပြီလ ၁၆ ရက် မနက် ၁၀ နာရီဝန်းကျင်မှာလည်း ဟဲပါရွာထဲကို ထပ်မံဗုံးကြဲတယ်လို့သိရပါတယ်။
သင်္ကြန်မတိုင်ခင်ရက်ပိုင်းတွေကလည်း ဖာပွန်ခရိုင်အတွင်း စစ်ကောင်စီလေတပ်က ဗုံးကြဲတိုက်ခိုက်မှုတွေ လုပ်ဆောင်ခဲ့ရာ အရပ်သား နှစ် ဦး ထိခိုက်ဒဏ်ရာရရှိခဲ့ပြီး ဆေးခန်းအဆောက်အဦးနှစ်လုံး ထိခိုက်ပျက်စီးခဲ့ပါတယ်။
