ဧပြီ-၁၉၊၂၀၂၆။People’s Spring
နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို ခြွင်းချက်မရှိ ချက်ချင်း ပြန်လွှတ်ပေးဖို့ ကုသလမဂ္ဂ လူ့အခွင့်အရေးဆိုင်ရာ မဟာမင်းကြီး ဗိုလ်ကာ တာ့ခ်က တောင်းဆိုလိုက်ပါတယ်။
၂၀၂၁ နှစ်ဆန်းပိုင်းမှာ စစ်တပ် အာဏာသိမ်းချိန် ကတည်းက ဖမ်းဆီး ခံထားရပြီး မတရား ပုဒ်မအမျိုးမျိုးအောက်မှာ အကျဉ်းချ ခံထားရတဲ့ ဒေါ်အောင်ဆန်းစုကြည်ရဲ့ ထောင်ဒဏ် ၂၇ နှစ် ပြစ်ဒဏ်ထဲက ၄ နှစ်ခွဲကို လျှော့ချပေးကြောင်း ဧပြီ ၁၇ ရက်နေ့မှာ အာဏာသိမ်းစစ်တပ်က ကြေညာခဲ့ပါတယ်။ အဲဒီနေ့မှာ နိုင်ငံတော် သမ္မတ ဦးဝင်းမြင့်က လွတ်ငြိမ်းချမ်းသာခွင့်နဲ့ လွတ်မြောက်လာပေမယ့်ဒေါ်အောင်ဆန်းစုကြည်ကိုတော့ပြစ်ဒဏ်တစ်စိတ်တစ်ပိုင်းလောက်သာ လျှော့ချပေးခဲ့တာ ဖြစ်ပါတယ်။
ဒေါ်အောင်ဆန်းစုကြည်ဟာ ထောင်ဒဏ်အစား နေအိမ်အကျယ်ချုပ်အဖြစ် ပြစ်ဒဏ်ပြောင်းလဲ ကျခံရမယ်ဆိုတဲ့ သတင်းတွေလည်း ထွက်ပေါ်ခဲ့ပေမယ့် သီးခြားအတည်မပြုနိုင်သေးပါဘူး။
Public Service Announcement
မြန်မာ့ဒီမိုကရေစီ လှုပ်ရှားမှုရဲ့ဦးဆောင်ပြယုဂ်အဖြစ်သတ်မှတ်ခံရတဲ့ဒေါ်အောင်ဆန်းစုကြည် ဦးဆောင်နေတဲ့ အစိုးရဆီက စစ်တပ်က အဓမ္မ အာဏာသိမ်းခဲ့ချိန်ကစပြီး မြန်မာနိုင်ငံဟာ ဆိုးရွားတဲ့ နိုင်ငံရေး အကျပ်အတည်းတွေ၊ မတည်ငြိမ်မှုတွေနဲ့ ရင်ဆိုင်နေရပြီး ပြည်တွင်းစစ်မီးလည်း အပြင်းအထန် တောက်လောင်လာခဲ့ပါတယ်။
တာ့ခ်ကတော့ အခုအခါ အသက် ၈၀ ရှိနေပြီဖြစ်တဲ့ ဒေါ်အောင်ဆန်းစုကြည်ကို ချက်ချင်း ပြန်လွှတ်ပေးဖို့ လူမှုကွန်ရက် မီဒီယာ Xကနေ တောင်းဆိုခဲ့ပါတယ်။
ဒေါ်အောင်ဆန်းစုကြည် အပါအဝင် အာဏာသိမ်းမှုကတည်းက မမျှမတ ဖမ်းဆီးခံထားရသူ အားလုံးကို ချက်ချင်း၊ ခြွင်းချက်မရှိ ပြန်လွှတ်ပေးဖို့ လိုအပ်ကြောင်း သူက ရေးသားခဲ့ပါတယ်။ မြန်မာပြည်သူတွေအပေါ် အတောမသတ်နိုင်တဲ့ အကြမ်းဖက်မှုတွေလည်း ရပ်တန်းကရပ်ဖို့ လိုနေပြီလို့တာ့ခ်က ဆိုပါတယ်။
သူက နိုင်ငံတော် သမ္မတ ဦးဝင်းမြင့်နဲ့ တခြား တရားလက်မဲ့ ဖမ်းဆီးထိန်းသိမ်းခံထားရတဲ့ အကျဉ်းသားတွေ ပြန်လွတ်လာတဲ့ အတွက်တော့ စိတ်သက်သာရာ ရမိတယ်လို့ ဝန်ခံခဲ့ပါတယ်။
ကုလသမဂ္ဂ အကြီးအကဲ အန်တိုနီယို ဂူတာရက်စ်ရဲ့ ပြောရေးဆိုခွင့်ရ အရာရှိကလည်း ဂူတာရက်စ် အနေနဲ့ မြန်မာနိုင်ငံမှာ မတရား ထိန်းသိမ်းခံထားရသူအားလုံး ပြန်လည် လွတ်မြောက်နိုင်ရေးအတွက် အဓိပ္ပါယ်ပြည့်ဝတဲ့ အားထုတ်မှုတွေ တွေ့မြင်လိုနေကြောင်း ပြောကြားသွားပါတယ်။
ဒေါ်အောင်ဆန်းစုကြည်ကို အဂတိမှု၊ နိုင်ငံတော် လျှို့ဝှက်ချက် ပေါက်ကြားစေမှုစတဲ့ စွပ်စွဲချက်တွေနဲ့ စစ်တပ်က ထောင် ၂၇ နှစ် ချမှတ်ထားပေမယ့် နိုင်ငံတကာ လူ့အခွင့်အရေး အဖွဲ့အစည်းတွေကတော့ ဒါဟာ နိုဘယ်လ် ငြိမ်းချမ်းရေးဆုရှင်အပေါ် နိုင်ငံရေးအရ လုပ်ကြံ အပုပ်ချမှု သက်သက်သာဖြစ်ကြောင်း ဝေဖန်ထားကြပါတယ်။
ကိုးကား: AFP
