ဧပြီ-၂၀၊၂၀၂၆/People’s Spring
လက်ရှိနွေဦးတော်လှန်ရေးရဲ့ ဖြစ်ပေါ်တိုးတက်မှုအခြေအနေတွေအပါအဝင် ပူးပေါင်းဆောင်ရွက်နိုင်ဖို့အတွက် ချင်းရက္ခိုင်အမျိုးသားအဖွဲ့ချုပ်/အာရက္ခတပ်တော်(AA)ခေါင်းဆောင်တွေနဲ့ တွေ့ဆုံဆွေးနွေးခဲ့တယ်လို့ ချင်းပြည်သူ့အစည်းအရုံး/ချင်းပြည်သူ့တပ်မတော်က ဒီကနေ့ ဧပြီ ၂၀ရက်မှာ ထုတ်ပြန်ပါတယ်။
ရက္ခိုင်အမျိုးသားအဖွဲ့ချုပ်ရဲ့ ဖိတ်ကြားမှုနဲ့ ချင်းပြည်သူ့အစည်းအရုံး ဗဟိုအလုပ်အမှုဆောင် ကော်မတီဝင်တွေဟာ ပြီးခဲ့တဲ့ ဖေဖော်ဝါရီမှာ အာရက္ခဒေသသို့ သွားရောက်ခဲ့တာလို့ အသိပေးပါတယ်။
အဲဒီတွေ့ဆုံဆွေးနွေးမှုမှာ လက်ရှိနွေဦးတော်လှန်ရေးရဲ့ ဖြစ်ပေါ်တိုးတက်မှု အခြေအနေတွေနဲ့ ချင်းပြည်သူလူထုနဲ့ အာရက္ခပြည်သူတွေအကြား အိမ်နီးချင်းကောင်းများပီသစွာ ရေရှည် အပြန်အလှန်အကျိုးပြုဖို့တို့အတွက် ဆွေးနွေးတိုင်ပင်ခဲ့ပြီး ရှေ့ဆက်ပူးတွဲလုပ်ဆောင်မယ့် လုပ်ငန်းစဉ်တွေကိုလည်း ချမှတ် နိုင်ခဲ့တယ်လို့ ထပ်မံ ဖော်ပြထားပါတယ်။
Public Service Announcement
ရက္ခိုင်အမျိုးသားအဖွဲ့ချုပ်ဟာ ချင်းပြည်သူ့အစည်းအရုံးရဲ့ ဗဟိုအလုပ်အမှုဆောင်ကော်မတီဝင်တွေကို နွေးထွေးလှိုက်လှဲစွာ ကြိုဆိုဧည့်ခံခဲ့ပြီး အာရက္ခဒေသတွင်းရှိ အထင်ကရနေရာတွေကိုလည်း လိုက်လံပြသပို့ဆောင်ပေးခဲ့တယ်လို့ ဖော်ပြထားပါတယ်။
ရက်သတ္တပတ် (၂) ပတ်ခန့် ကြာမြင့်ခဲ့တဲ့ အဲဒီခရီးစဉ်ဟာ ချင်းပြည်သူ့အစည်းရုံး/ ချင်းပြည်သူ့တပ်မတော်အတွက် လေ့လာသင်ယူစရာတွေနဲ့ အလွန်တရာ အကျိုးရှိတဲ့ ခရီးစဉ်ဖြစ်ခဲ့ပြီး ချင်းပြည်သူ့အစည်းအရုံးအနေနဲ့ ရက္ခိုင်အမျိုးသားအဖွဲ့ချုပ်ကို လှိုက်လှိုက်လှဲလှဲ ကျေးဇူးတင်ရှိတယ်လို့လည်း ဖော်ပြထားပါတယ်။
ထုတ်ပြန်ထားတဲ့ ဓာတ်ပုံတွေမှာ AAစစ်ဦးစီးချုပ် ဗိုလ်ချုပ်ထွန်းမြတ်နိုင်လည်း တွေ့ဆုံနေတာကို တွေ့ရပါတယ်။
ချင်းပြည်နယ် မင်းတပ်၊ ကန်ပက်လက်၊ မတူပီနဲ့ ပလက်၀မြို့နယ်တွေက ချင်းဒေသကာကွယ်ရေးတပ်(CDF) လေးဖွဲ့ကို ချင်းပြည်သူ့အစည်းအရုံး/ချင်းပြည်သူ့တပ်မတော် Chin People’s Union/Chin People Army(CPU/CPA) အဖြစ် ပေါင်းစည်းထားတာ ဖြစ်ပါတယ်။
ချင်းညီနောင်အဖွဲ့ဝင်တွေဖြစ်တဲ့ CDF မင်းတပ်၊ CDF ကန်ပက်လက်နဲ့ CDF မတူပီတို့အပြင် ချင်းညီနောင်အဖွဲ့ဝင် မဟုတ်သေးတဲ့ ပလက်၀မြို့နယ်က Daai Regional Council/CDF Daai စတဲ့ တပ်ဖွဲ့ ၄ခုကို CPU/CPA အဖြစ် စုဖွဲ့ခဲ့တာလို့ ဆိုပါတယ်။
