ဇူလိုင် ၄၊ ၂၀၂၆။ ထားမြတ်/People’s Spring
အာဏာသိမ်းစစ်တပ်က တပ်သား ၁ဦး လက်နက်ယူလာပြီး အလင်းဝင်လာကြောင်း ကရင်အမျိုးသားအစည်းအရုံး(KNU) တပ်မဟာ(၄) မြိတ်ထားဝယ်ခရိုင်က သတင်းထုတ်နြပ်ပါတယ်။
KNU မြိတ်ထားဝယ်ခရိုင် လယ်ဒိုစိုးမြို့နယ်က စစ်ကောင်စီတပ်သား ၁ဦးဟာ ဇူလိုင် ၁ရက်မှာ KNLA တပ်မဟာ(၄) တပ်ရင်း (၁၀)ထံ အလင်းဝင်လာတာလို့ ဆိုပါတယ်။ လယ်ဒိုစိုးမြို့နယ်ဆိုတာဟာ ထားဝယ်မြို့နယ်နဲ့ ရေဖြူမြို့နယ်က နယ်မြေဒေသတွေကို KNUက မြို့နယ်အဖြစ် သတ်မှတ်ထားတာဖြစ်ပါတယ်။
အလင်းဝင်လာသူဟာ ခလရ(၂၈၂)တပ်ရင်းက ဖြစ်ပြီး MA-1(၁)လက်၊ ကျည်ဘောက်(၄)ခုယူလာတယ်လို့ အသိပေးပါတယ်။
Public Service Announcement
မြိတ်ထားဝယ်ခရိုင် တပ်မဟာ(၄)နယ်မြေ အပါအဝင် ခရိုင်နဲ့ တပ်မဟာ ၇ခုနယ်မြေတွေမှာ စစ်တပ်ကို တိုက်ခိုက်နေတဲ့ KNUထံသို့ စစ်ကောင်စီတပ်သားတွေ တစ်ဦးချင်းဖြစ်စေ အဖွဲ့လိုက်ဖြစ်စေ အလင်းဝင်ဘက်ပြောင်းခိုလှုံမှုတွေ မကြာခဏ ရှိခဲ့ပါတယ်။
KNU ညောင်လေးပင်ခရိုင် ကျောက်ကြီးဒေသမှာဆိုရင် ဇွန်လ ၉ရက်က စစ်ကောင်စီတပ်သား ၅ဦး၊ ဇွန် ၁၅ရက်မှာ စစ်ကောင်စီတပ်သား ၁၁ဦး ဟာ KNU တပ်မဟာ(၃) လက်အောက်ခံ တပ်ထံမှာ အလင်းဝင်ရောက်ခဲ့ပါတယ်။
ဒါ့အပြင် ဇွန် နောက်ဆုံးပတ်မှာဆိုရင်လည်း KNU တပ်မဟာ(၅)နယ်မြေ ဖာပွန်ခရိုင်မှာ စစ်ကောင်စီတပ်သားသစ်တဦးဟာ တပ်ရင်းမှူးကို လုပ်ကြံပြီး အခြားတပ်ဖွဲ့ဝင်တွေနဲ့အတူ KNU တပ်မဟာ(၅)ထံ အလင်းဝင်ပူးပေါင်းခဲ့ပါတယ်။
