စစ်တပ်လေကြောင်းတိုက်ခိုက်မှုကြောင့် ၁ရက်တည်း ကလေးငယ် ၄ ဦးသေဆုံး၊ ၇ ဦးထက်မနည်း ဒဏ်ရာရ

ဇူလိုင် ၁၆၊ ၂၀၂၆ ဟာနာဆန်/People’s Spring

အာဏာသိမ်းစစ်တပ် လေကြောင်းတိုက်ခိုက်မှုတွေကြောင့် ဇူလိုင် ၁၄ ရက် ၁ရက်တည်း ကလေးငယ် ၄ ဦး သေဆုံးပြီး ၇ ဦးထက်မနည်း ဒဏ်ရာရခဲ့ပါတယ်။

ဇူလိုင် ၁၄ ရက်က နေ့လယ် ၁နာရီခန့်က မကွေးတိုင်း၊ နတ်မောက်မြို့နယ်၊ ကန်လေးကုန်းရွာ စာသင်ကျောင်းကို အာဏာသိမ်းစစ်တပ်က လေကြောင်းတိုက်ခိုက်ခဲ့ရာ ၁၃ နှစ်အရွယ် ကျောင်းသား ၁ဦးသေဆုံးကာ ၇ ဦး ဒဏ်ရာရရှိခဲ့ကြောင်း ဒေသခံတွေက ပြောပါတယ်။

သေဆုံးသူဟာ အသက် ၁၃ နှစ်အရွယ် ၇ တန်းကျောင်းသား မောင်ဖြိုးဝေဦးဖြစ်ပြီး အခြားကျောင်းသားတွေဖြစ်တဲ့ မောင်ကောင်းပြည့်ဇော်၊ မောင်အောင်ပြည့်ဇော်၊ မောင်သော်ဇင်ဖြိုး (ခ) အာကျယ်၊ မောင်ဇေရဲထက်၊ မောင်နေခန့်ပိုင်၊မောင်ဇင်လင်းကို၊ မောင်စိုင်းမင်းလတ်တို့ ထိခိုက်ဒဏ်ရာတွေ ရရှိခဲ့ကြောင်း ဒေသခံတွေက ပြောပါတယ်။

Public Service Announcement

“ကလေးတစ်ယောက်က ပေါင်ပြတ်သွားတယ်”လို့ ဒေသခံတစ်ဦးက ပြောပါတယ်။

ဇူလိုင် ၁၄ရက် ညနေ ၄ နာရီခန့်ကလည်း မုံရွာမြို့ ၊အနောက်မြောက်တိုင်းစစ်ဌာနချုပ်(နမခ)ကနေ ဂျိုင်ရို ကော်ပတာ ၃ စီးဟာ အရာတော်မြို့နယ်၊ ကံရင်းရွာက လက်ဖက်ရည်ဆိုင်ကို လေကြောင်းတိုက်ခိုက်ရာ ၈လသား သမီးလေးအပါအဝင် ၄ ဦးသေဆုံးခဲ့ကြောင်း ဒေသခံတွေက ပြောပါတယ်။

ဒါအပြင် ဇူလိုင် ၁၄ ရက် ညပိုင်းမှာတော့ ခေါင်လန်ဖူးမြို့နယ်၊ မီကူဆာကျေးရွာကို စစ်တပ်နဲ့ လက်အောက်ခံ ပြည်သူ့စစ်တွေက ဒရုန်းတွေနဲ့ ဗုံးကြဲတိုက်ခိုက်ရာ ကျေးရွာအတွင်းမှ ကလေးငယ် ၂ ဦးအပါအဝင် ၃ ဦးထက်မနည်း မိသားစုလိုက် သေဆုံးခဲ့ကြောင်း ဒေသခံတွေဆီက သိရပါတယ်။

စစ်တပ်ရဲ့ လေကြောင်းတိုက်ခိုက်မှုကြောင့် ဇူလိုင် ၁၄ ရက် ၁ရက်တည်းမှာပဲ ကလေးငယ် ၄ ဦးသေဆုံးပြီး ၇ ဦးထက်မနည်း ဒဏ်ရာရခဲ့တာပါ။

စစ်တပ်အာဏာသိမ်းပြီး​နောက်ပိုင်း နိုင်ငံတစ်ဝန်းဗုံးကြဲလို့ ​သေဆုံးခဲ့တဲ့အ​ရေအတွက်ဟာ ​ထောင်​ပေါင်းများစွာရှိ​နေပြီဖြစ်ပါတယ် ။ကုလသမဂ္ဂလူ့အခွင့်အရေးဆိုင်ရာ မဟာမင်းကြီးရုံး (OHCHR)ရဲ့ အစီရင်ခံစာအရ ၂၀၂၅ တစ်နှစ်ထဲမှာပဲ စစ်တပ်ဗုံးကြဲလို့​သေဆုံးခဲ့တဲ့ ပြည်သူ ၉၈၂ ဦးရှိတယ်လို့​ဖော်ပြထားပါတယ်။

ဒါ့အပြင် စစ်တပ်​ရွေး​ကောက်ပွဲကာလ ၂၀၂၅ သြဂုတ်က​နေ ၂၀၂၆ ဇန်နဝါရီအထိ စစ်တပ်​အကြမ်းဖက်သတ်ဖြတ်လို့​ သေဆုံးရတဲ့ ပြည်သူ အနည်းဆုံး ၇၀၂ ဦးရှိပြီး ဗုံးကြဲခံရလို့ ​သေဆုံးသူ ၅၀၅ ဦးပါဝင်တယ်လို OHCHR က ထုတ်ပြန်ပါတယ်။

စစ်တပ်အာဏာသိမ်းမှု ၅ နှစ်ကျော် ကြာကာလအတွင်း ဒီကနေ့အထိ နိုင်ငံတစ်ဝန်းမှာ စစ်တပ်ရဲ့ လေကြောင်းတိုက်ခိုက်မှုတွေနဲ့ စစ်ကြောင်းထိုးမှုတွေကြောင့် အပြစ်မဲ့ အရပ်သားပြည်သူပေါင်းများစွာ နေ့စဉ်နဲ့အမျှ အသက်အိုးအိမ် စည်းစိမ်များ ဆုံးရှုံးနေရဆဲ ဖြစ်ပါတယ်။

နိုင်ငံ​ရေးအကျဥ်းသားများကူညီ​စောင့်​ရှောက်​ရေးအသင်း(AAPP)ရဲ့စု​ဆောင်းထားတဲ့အချက်အလက်​တွေအရလည်း စစ်အုပ်စုဟာအာဏာသိမ်းပြီး​နောက်ပိုင်း ပြည်သူ​ပေါင်းအနည်းဆုံး ၁၃,၀၀၀ ​ကျော်ကိုသတ်ဖြတ်ထားပါတယ် ။ အဲဒီထဲမှာ က​လေးငယ်​ပေါင်း ၁၀၈၇ ဦးပါဝင်ပါတယ် ။