ဇူလိုင် – ၂၂ ၊၂၀၂၆ /People’s Spring
မန္တလေးအိုးဘိုထောင်မှာထောင်ဒဏ် ၁၆၄ နှစ်အကျဉ်းချခံရတဲ့နိုင်ငံရေး အကျဉ်းသားတစ်ဦးလုံလောက်တဲ့ဆေးဝါးကုသမှုမရရှိတဲ့အတွက် အခုလ ဇူလိုင် ၂၀ ရက်မှာထောင်တွင်းဆုံးပါးသွားအမျိုးသားဒီမိုကရေစီအဖွဲ့ချုပ်ပါတီ(NLD) နဲ့ နီးစပ်သူတွေဆီက သိရပါတယ်။
ထောင်တွင်းဆုံးပါးသွားသူဟာNLD ပါတီဝင်ကိုလှိုင်ဘွားဆိုသူအမျိုးသားဖြစ်ပါတယ်။
သူဟာမန္တလေးတိုင်း NLD ပါတီဝင်တစ်ဦး ဖြစ်ပြီး ၂၀၂၁ ခုနှစ်၊ဖေဖော်ဝါ ရီလ ၁ ရက်စစ်အာဏာသိမ်းမှုကိုဆန့်ကျင်တဲ့ဆန္ဒပြပွဲတွေမှာ တက်တက်ကြွကြွပါဝင်ခဲ့သူလို့ပါတီနဲ့နီးစပ်သူအချို့ဆီကသိရပါတယ်။
Public Service Announcement
“အကိုကျသွားကြားတော့စိတ်မကောင်းဘူး၊ကျန်းမာရေးအင်မတန်ကောင်းတဲ့သူက ဖမ်းခံရပြီးမှအခုလိုတွေဖြစ်သွားတာပါ”လို့ ပါတီနဲ့နီးစပ်သူကပြောပါတယ်။
ကိုလှိုင်ဘွားကို ၂၀၂၃ ခုနှစ်၊ဩဂုတ်လမှာအာဏာသိမ်းစစ်တပ်က ဖမ်းဆီးခဲ့ပြီးအကြမ်းဖက်မှုတိုက်ဖျက်ရေး ဥပဒေပုဒ်မတွေဖြစ်တဲ့ ၅၁(က)၊ ၅၂(ဂ) ၊ ၅၄(က) တွေနဲ့ တရားစွဲဆိုပြီး ထောင်ဒဏ် ၁၆၄ နှစ် ချခဲ့တာပါ။
စစ်တပ်ရဲ့တကျော့ပြန်အာဏာသိမ်းထားတဲ့ငါးနှစ်တာကာလအတွင်းထောင်တွင်းမှာကျန်းမာရေးစောင့်ရှောက်မှု မလုံလောက်တဲ့အတွက် နိုင်ငံရေးအကျဉ်းသား ၁၅၀ နီးပါး အသက်ဆုံးပါးခဲ့ရတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)အဖွဲ့ရဲ့ စာရင်းတွေအရ သိရပါတယ်။
ဆုံးပါးသွားတဲ့ နိုင်ငံရေးအကျဉ်းသားဦးရေထဲမှာ အမျိုးသားဦးရေသေဆုံးမှုမှာ ၈၆ ရာခိုင်နှုန်း နဲ့အများဆုံးဖြစ်ပြီး အမျိုးသမီးနိုင်ငံရေးအကျဉ်းသူ က ၁၃ ရာခိုင်နှုန်း နဲ့ လိင် စိတ်ခံယူမှုကွဲပြားသူ LGBT သေဆုံးမှု တစ်ရာခိုင်နှုန်း ရှိခဲ့တာပါ။
အကျဉ်းထောင်တွေထဲမှာ လူ့အခွင့်အရေးချိုးဖောက်မှု၊ဆိုးရွားတဲ့ ထောင်တွင်းအခြေအနေတွေနဲ့အတူ နိုင်ငံရေးအကျဉ်းသားတွေဟာလုံလောက်တဲ့ကျန်းမာရေးစောင့်ရှောက်မှု ကင်းမဲ့ကာ သေဆုံးမှုနှုန်း မြင့်တက်လာတယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က အသိပေးထားပါတယ်။
