စက်တင်ဘာ၃၀၊၂၀၂၆။ရောင်နီ/People’s Spring
ရန်ကုန်မြို့ဈေးကွက်မှာ ကြက်သွန်နီ တစ်ပိဿာ ကျပ်တစ်သောင်းကျော်သွားအထိ ဈေးတက်လာပြီး တစ်လအတွင်း ဈေးနှစ်ဆ တက်သွားတာလို့ ဒေသခံတွေက ပြောပါတယ်။
လက်ရှိဈေးကွက်မှာ လက်လီဝယ်ယူသူတွေအနေနဲ့ ကြက်သွန်နီ တစ်ပိဿာ ၁၂၀၀၀ ကျပ် နဲ့ ဝယ်နေရပြီး ပိဿာလိုက်ဝယ်ယူသူတွေအတွက်တော့ ၁၁၀၀၀ ကျပ် နဲ့ ဝယ်နေရတယ်လို့ ပြည်သူတွေက ပြောပါတယ်။
ကြက်သွန်နီဈေးက ပြီးခဲ့တဲ့လတုန်းက တစ်ပိဿာ ၆၀၀၀ကျပ်ဝန်းကျင်သာရှိခဲ့ပြီး တစ်လအတွင်းမှာ ကျပ် ၈၀၀၀ ၊ ၁၀၀၀၀ ကနေ ၁၂၀၀၀ ကျပ် အထိရောက်လာတာလို့ သိရပါတယ်။
Public Service Announcement
ကြက်သွန်နီဈေးတက်တာက လက်ရှိရေကြီးနေတဲ့ ဖြစ်စဉ်တွေကြောင့် ဖြစ်နိုင်ပြီး ဓာတ်မြေဩဇာအပါအဝင် စိုက်ပျိုးရေးစရိတ်နဲ့ သယ်ယူရတဲ့စရိတ်တွေပိုကုန်ကျတာကြောင့် ဈေးတက်တာဖြစ်နိုင်တယ်လို့ ပြည်သူတစ်ဦးကသုံးသပ်ထားပါတယ်။
ဒီကာလရောက်ရင်ကြက်သွန်နီက တောင်သူတွေလက်ထဲမှာ မရှိတော့ပဲ ကုန်သည်တွေရဲ့ လက်ထဲမှာပဲရှိတာကြောင့် ကုန်သည်တွေ ဈေးကစားတာဖြစ်နိုင်တယ်လို့ အခြားပြည်သူတစ်ဦးကလည်း ၎င်းရဲ့ အမြင်ကိုပြောပါတယ်။
ကြက်သွန်နီ အသစ်ပေါ်ဖို့ အချိန်အားဖြင့် တစ်လကျော်လောက် လိုနေသေးပြီး လက်ရှိရေကြီးတဲ့ ဖြစ်စဉ်တွေကြောင့် အဲဒီ့ထက်လည်း နောက်ကျနိုင်တယ်လို့ သိရပါတယ်။
