ကျောက်တော်မြို့ကို စစ်တပ်က လေယာဉ် ၈စီးနဲ့ ထပ်မံ ဗုံးကြဲ

အောက်တိုဘာ ၂၊ ၂၀၂၆။ ထားမြတ်/People’s Spring

အာဏာသိမ်းစစ်တပ်က ရခိုင်ပြည်အနှံ့ စစ်ရေးပစ်မှတ်မဟုတ်တဲ့ နေရာတွေကို ဆက်တိုက်ဗုံးကြဲကာ စစ်ရာဇဝတ်မှုများကို ပြောင်ပြောင်တင်းတင်းဆက်လက်ကျူးလွန်နေလို့ သံဃာနဲ့ စစ်ရှောင်တွေအပါအဝင် ပြည်သူလူထု သေဆုံးထိခိုက်မှုများ ရှိခဲ့ကြောင်း အာရက္ခတပ်တော်(AA)က ထုတ်ပြန်ပါတယ်။

စက်တင်ဘာ ၂၈ရက်မှာ စစ်တပ်က ကျောက်တော်မြို့ကို လေကြောင်းကနေ ဗုံးကြဲခဲ့လို့ ပြည်သူ ၅၀ဦး သေဆုံးကာ ၅၇ ဦး ဒဏ်ရာရရှိခဲ့ရာ အဲဒီ ဖြစ်စဉ်အပြီးမှာ စစ်တပ်က ကျောက်တော်၊ ပုဏ္ဏားကျွန်း၊ သံတွဲ၊ ရသေ့တောင်၊ ပေါက်တော မြို့နယ်တွေကို လေကြောင်းဆက်လက် ဗုံးကြဲနေတဲ့ အခြေအနေကို အသိပေးခဲ့တာပါ။

စက်တင်ဘာ ၃၀ရက်ညပိုင်းက ပုဏ္ဏားကျွန်းမြို့ကို စစ်တပ် ဗုံးကြဲလို့ ၄နှစ်အရွယ် ကလေးငယ် အပါအဝင် စစ်ရှောင် ၃ဦး ဒဏ်ရာရရှိခဲ့သလို အဲဒီညမှာပဲ ရသေ့တောင်မြို့နယ် ကူတောင်ကျေးရွာအနီး လေကြောင်းဗုံးကြဲမှု ဖြစ်စဉ်မှာလည်း အမျိုးသား ၁ဦးသေဆုံးကာ သူ့ရဲ့ ဇနီး ဒဏ်ရာရရှိခဲ့ပါတယ်။

Public Service Announcement

စက်တင်ဘာ ၃၀ရက်ညသန်းခေါင်မှာ စစ်တပ်က ပေါက်တောမြို့ပေါ်နဲ့ ကျေးရွာအချို့ကို Y12နဲ့ ဗုံး အလုံးရေ ၃၀ ခန့် ကြဲချတိုက်ခိုက်ခဲ့ရာ အမျိုးသမီး ၃ဦး ဒဏ်ရာရရှိကာ ဘုန်းကြီးကျောင်းနဲ့လူနေအိမ်တွေ ပျက်စီးခဲ့ကြောင်း AAက ထုတ်ပြန်ပါတယ်။

အောက်တိုဘာ ၁ရက်မှာလည်း စစ်တပ်ဟာ ကျောက်တော် ကို လေကြောင်းတိုက်ခိုက်မှု ထပ်မံ ပြုလုပ်ခဲ့ရာ သကြားစက်ကျေးရွာ ကျောင်းထိုင်ဆရာတော် ထိခိုက်ဒဏ်ရာရရှိပြီး ဘုန်းကြီးကျောင်းပျက်စီးခဲ့ရပါတယ်။ စစ်ကောင်စီတပ်ဟာ ကျောက်တော် သစ်တစ်ပုံဆည်အနီးဝန်းကျင်နဲ့ သကြားစက်ကျေးရွာ ဘုန်းကြီးကျောင်းအနီးဝန်းကျင်ကို ဂျက်တိုက်လေယာဉ် (၇) စီး၊ Y-12 လေယာဉ်တစ်စီးတိုနဲ့ ဗုံးအလုံးရေ ၄၀ ခန့်ကြဲချခဲ့တာလို့ ထုတ်ပြန်ပါတယ်။

အောက်တိုဘာ ၁ရက်မှာပဲ စစ်တပ်ဟာ သံတွဲမြို၊ အမှတ် (၆) ရပ်ကွက်၊ ဗောဓိကုန်းဈေးအနီးကို တိုက်လေယာဉ်နဲ့ ဗုံးကြဲခဲ့ရာ ပြည်သူ ၂ဦး ဒဏ်ရာရရှိခဲ့ပါတယ်။

ဒီကနေ့ အောက်တိုဘာ ၂ရက် မနက်အစောမှာလည်း စစ်တပ်က ပုဏ္ဏားကျွန်းမြို့နယ် အောင်ဖြူပြင်ကျေးရွာမှ ကားဝပ်ရှော့ကို တိုက်လေယာဉ်နဲ့ဗုံးကြဲခဲ့ရာ ကားဝပ်ရှော့ပိုင်ရှင်ရဲ့ ဇနီးနဲ့ လုပ်သား အချို့ အပါအဝင် ၃ဦး ဒဏ်ရာရရှိခဲ့ပါတယ်။

စစ်တပ်ရဲ့လေကြောင်းဗုံးကြဲမှုတွေကြောင့် ပြည်သူတွေ အစုလိုက်၊ အပြုံလိုက်သေဆုံးထိခိုက်ခဲ့ရတဲ့ ကျောက်တော်မြို့ ဗုံးကြဲတိုက်ခိုက်မှု လုပ်ရပ်အပေါ် ပြည်တွင်းပြည်ပက ကန့်ကွက်ရှုတ်ချမှုတွေရှိနေတဲ့ ကြားက စစ်တပ်ဟာ ရခိုင်ပြည်နယ်က မြို့တွေကို နေ့စဉ်ရက်ဆက် လေကြောင်း တိုက်ခိုက်နေတာဖြစ်ပါတယ်။