အောက်တိုဘာ – ၁၃ ၊၂၀၂၆
အာဏာသိမ်းမြန်မာစစ်တပ်ရဲ့လက်အောက်ခံတပ်ဖြစ်တဲ့ကိုးကန့်နယ်ခြားစောင့်တပ်ခေါင်းဆောင်အပါအဝင်ကိုးကန့် ဝေမိသားစုဝင်သုံးဦးကို ကျားဖြန့်အမှုနဲ့တရုတ်တရားရုံးကဒီနေ့ (အောက်တိုဘာလ ၁၃ ရက်)မှာ သေဒဏ်ချလိုက်ပါတယ်။
အွန်လိုင်းကနေငွေကြေးလိမ်လည်မှု (ကျားဖြန့်)နဲ့တရားမဝင် လောင်း ကစားလုပ်ငန်းတွေကို ကြိုးကိုင်နေတယ်ဆိုတဲ့စွဲချက်နဲ့ မြန်မာနိုင်ငံ အခြေစိုက်ကိုးကန့်ဝေမိသားစုရဲ့ခေါင်းဆောင်ပိုင်းသုံးဦးကို တရုတ်က သေဒဏ်အမိန့်ချလိုက်တာပါ။
စီရင်ချက်တွေကိုချွန်ကျိုးမြို့အလတ်တန်း ပြည်သူ့တရားရုံးနဲ့ နန်အန်းမြို့ ပြည်သူ့တရားရုံးတို့က အသီးသီး ချမှတ်ခဲ့တာ ဖြစ်ပါတယ်။
Public Service Announcement
သေဒဏ်ချခံရသူတွေဟာဝေစန်း ၊ ကောင်းမင် နဲ့လျိုကျင်းဖန်းတို့ ဖြစ်ပါတယ်။
တရုတ်ရဲ့ စွဲချက်မှာတော့ ကျားဖြန့် လုပ်ပြီး တရုတ်နိုင်ငံသားတွေဆီကနေ ယွမ်ငွေ ၂၄ ဘီလီယံကျော်ကိုလိမ်လည်တာ၊ တရုတ်နိုင်ငံသား နှစ်ဦးကို သေဆုံးစေတဲ့အမှုတွေ ပါဝင်တယ်လို့ဆိုထားတာပါ။
ဝေစန်းဟာစစ်တပ်ရဲ့လက်အောက်ခံကိုးကန့် ပြည်သူ့စစ်အဖွဲ့ ရဲ့ခေါင်း ဆောင်ဖြစ်သလို ကြံခိုင်ရေးပါတီရဲ့ ကိုးကန့်ဒေသ ၊ကုန်းကြမ်းမြို့နယ်ပြည်သူ့လွှတ်တော်ကိုယ်စားလှယ်တစ်ဦးပါ။
မြန်မာဘက်ခြမ်းကိုးကန့်ဒေသမှာ ကျားဖြန့်လုပ်ငန်းတွေကိုလုပ်ကိုင်ပြီး တရုတ်နိုင်ငံသားတွေကို ပစ်မှတ်ထားလိမ်လည်မှုကြောင့် ကိုးကန့်မိသားစုကြီးလေးစုဖြစ်တဲ့ ပယ်၊ဝေ၊မြီနဲ့လျို မိသားစု တွေကိုတရုတ်အစိုးရက ဝရမ်းထုတ်ခဲ့တာပါ။
ကျားဖြန့်မလုပ်ဖို့အဲဒီမိသားစုကြီးတွေကိုတွေ့ဆုံဆွေးနွေးဖျောင်းဖျပေမယ့် နားမထောင်ခဲ့ဘူးဆိုတာကို ပြီးခဲ့တဲ့ ရက်ပိုင်းက ကိုးကန့်ဒေသ ကျားဖြန့်ဖြိုခွင်းမှုမှတ်တမ်းကိုတရုတ်အစိုးရပိုင် CCTV က ထုတ်လွှင့်ရာမှာထည့်သွင်းဖော်ပြခဲ့ပါတယ်။
အဲဒီမိသားစုတွေထဲမှာခေါင်းဆောင်ပိုင်းတွေဟာသစ္စာခံတွေဖြစ်ပေမယ့် မြန်မာအာဏာသိမ်းစစ်တပ်ကနေပြည်တော်ကနေတရုတ်လက်ထဲအပ်ခဲ့တာပါ။
အဲလို တရုတ်လက်အပ်ခံရသူတွေထဲမှာ ဒီနေ့သေဒဏ်ချခံရတဲ့ ကိုးကန့် ပြည်သူ့စစ်ခေါင်းဆောင် ဝေစန်းလည်းပါဝင်ခဲ့ပါတယ်။
အခုနှစ်ဇန်နဝါရီလ ကုန်ပိုင်းမှာတော့ မြီမိသားစုရဲ့ သားဖြစ်သူ၊ မြေးမ အပါအဝင် ၁၁ ဦးကို တရုတ်တရားရုံးက သေဒဏ်ပေးပြီး ကွပ်မျက်ခဲ့ပါတယ်။
ကိုးကား – China News
