မြန်မာစစ်တပ် လုပ်ရပ်ကို ပြတ်ပြတ်သားသား တုံ့ပြန်ဆောင်ရွက်ဖို့ ကုလအတွင်းရေးမှူးချုပ်တိုက်တွန်း

မြန်မာနိုင်ငံမှာ လုံခြုံရေးတပ်ဖွဲ့များက ကလေးများနဲ့ လူငယ်များအပါအဝင် အရပ်သားများကို ဒါဇင်နှင့်ချီ၍ သတ်ဖြတ်ခဲ့ခြင်းကို ကုလသမဂ္ဂအထွေထွေအတွင်းရေးမှူးချုပ်က အပြင်းထန်ဆုံး ရှုတ်ချလိုက်ပါတယ်လို့ ဒီကနေ့ ထုတ်ပြန်လိုက်ပါတယ်။

စစ်အာဏာသိမ်းမှုကို ကန့်ကွက်ဆန္ဒပြမှုများ ယခင်လမှ စတင်ခဲ့သည့်နောက်ပိုင်း နေ့စဉ်လူသေဆုံးမှုများ ရှိခဲ့ပြီး ယနေ့မှာ သေဆုံးသူအရေအတွက် အများဆုံး ဖြစ်ခဲ့သည်။ ထိုသို့ စစ်တပ်၏ အကြမ်းဖက်ဖြိုခွင်းမှုများ ဆက်တိုက်ပြုလုပ်နေမှုမှာ လုံးဝလက်သင့်ခံနိုင်စရာ မရှိသည့်အတွက် နိုင်ငံတကာက တစ်စုတစည်းတည်း ခိုင်ခိုင်မာမာ ပြတ်ပြတ်သားသား တုံ့ပြန်ဆောင်ရွက် ကြရန် တောင်းဆိုလိုက်ပါတဘ်လို့လည်း ပါရှိပါတယ်။ ဤအကျပ်အတည်းအခြေအနေအား အဆောတလျင်အဖြေရှာကြရန် အလွန်ပင် အရေးကြီးနေပြီလို့ ကုလအတွင်းရေးမှူးချုပ်က ထပ်မံအသိပေးထားပါတယ်။

ဒါ့အပြင် အထွေထွေအတွင်းရေးမှူးချုပ်က စစ်တပ်အား အကြမ်းဖက်မှုများနဲ့ ဖိနှိပ်မှုများ မပြုလုပ်ရန် အရေးတကြီး တောင်းဆိုထားပြီးဖြစ်ကာ ယခုနောက်ထပ်တစ်ကြိမ် ထပ်မံတောင်းဆိုလိုက်တယ်လို့ ထုတ်ပြန်ထားပါတယ်။ မြန်မာနိုင်ငံမှာ ကျူးလွန်နေတဲ့ ဆိုးရွားသောလူ့အခွင့်အရေး ချိုးဖောက်မှုများအတွက် တာဝန်ရှိသူများကို တာဝန်ခံစေရန် လုပ်ဆောင်ရမယ်လို့လည်းဆိုပါတယ်။