နယူးဇီလန် နိုင်ငံမှာ ၄ နှစ်သား ကလေးငယ် တစ်ဦးဟာ ရဲတပ်ဖွဲ့ရဲ့ အရေးပေါ် ဖုန်းနံပါတ်ကို လှမ်းခေါ်ပြီး သူ့အရုပ် အလန်းစားတွေကို လှမ်းကြွားခဲ့ပါတယ်။
ဒီသတင်းကို ပိုပြီး ချစ်စရာ ကောင်းသွားစေတာကတော့ ကင်းလှည့် ရဲအရာရှိ တစ်ယောက်က ဖုန်းခေါ်တဲ့ အိမ်ကို ရောက်အောင်သွားပြီး ကလေးငယ် ပြောပြတဲ့ အရုပ်တွေအကြောင်း စိတ်ရှည်လက်ရှည် နားထောင်ပေးခဲ့တာ ဖြစ်ပါတယ်။
အင်ဗာဆာဂီလ်မြို့ ရဲတပ်ဖွဲ့ရဲ့ အရေးပေါ် ဖုန်းနံပါတ် ၁၁၁ ကို ဖုန်းခေါ်ဆိုမှုတစ်ခု ရောက်လာလို့ တာဝန်ကျ ရဲဝန်ထမ်း အမျိုးသမီးက လက်ခံ ဖြေကြားခဲ့ပါတယ်။ အဲဒီအခါ ကလေးသံလေး တစ်ခုက သူ့ရဲ့ အလန်းစား အရုပ်တွေကို ရဲတပ်ဖွဲ့ဝင် အန်တီအနေနဲ့ လာကြည့်နိုင်မလားလို့ ယဉ်ယဉ်ကျေးကျေး လှမ်းမေးခဲ့ပါတယ်။
သူတို့နှစ်ယောက် အပြန်အလှန် စကားပြောနေတုန်းမှာပဲ ကလေးရဲ့ ဖခင်ဖြစ်သူက ကြားဝင်လာပြီး သူ့သားက အရေးပေါ် ကိစ္စမဟုတ်ဘဲ ဖုန်းခေါ်ခဲ့တာအတွက် တောင်းပန်ခဲ့ပါတယ်။ ကလေးရဲ့မိခင် နေသိပ်မကောင်းလို့ ပြုစုပေးနေတုန်း ကလေးက အရေးပေါ် ဖုန်းနံပါတ်ကို လှမ်းခေါ်ခဲ့တာလို့ ဖခင်ဖြစ်သူက ရှင်းပြပါတယ်။
Public Service Announcement
အဲဒီနောက် တာဝန်ကျ ရဲဝန်ထမ်း အမျိုးသမီးက ကင်းလှည့်ယူနစ်တွေဆီ ဆက်သွယ်ပြီး ကလေးတစ်ယောက် သူ့အရုပ်တွေ ကြွားချင်နေလို့ သွားနားထောင်ပေးနိုင်မလားဆိုပြီး မေးခဲ့ပါတယ်။ မီဒီယာတွေမှာ ကာ့တ်လို့သာ နာမည် ဖော်ပြထားတဲ့ ရဲအရာရှိ တစ်ဦးက သူ့ရဲကားဟာ ကလေးရဲ့ အိမ်နားမှာ ရှိနေတဲ့အတွက် သွားတွေ့လိုက်မယ်လို့ အကြောင်းပြန်ခဲ့ပါတယ်။
တကယ်လည်း ကာ့တ်က ကလေးငယ်ရဲ့ အိမ်ထိ သွားရောက်ခဲ့ပါတယ်။ စကားပြောဖော် ရှာနေတဲ့ ကလေးက သူ့အရုပ်လေးတွေအကြောင်း ကြွားသမျှကိုလည်း ကာ့တ်က စိတ်ရှည်လက်ရှည် နားထောင်ခဲ့ပါတယ်။ နောက်တော့မှ အရေးပေါ် ဖုန်းနံပါတ် ၁၁၁ ဆိုတာ ဘယ်လို အခြေအနေတွေမှာသာ လှမ်းခေါ်သင့်သလဲ ဆိုတာကို ကလေးငယ် နားလည်အောင် ကာ့တ်က သေချာ ပညာပေး ရှင်းလင်းပြပြီး စခန်းကို ပြန်လာခဲ့ပါတယ်။
အင်ဗာဆာဂီလ်မြို့ ရဲတပ်ဖွဲ့က ကာ့တ်နဲ့ ကလေးငယ်တို့ ရဲကား စက်ဖုံးပေါ်မှာ အတူထိုင်ပြီး တွဲရိုက်ထားတဲ့ ဓာတ်ပုံနဲ့အတူ ကလေးငယ် ဖုန်းခေါ်တဲ့ အသံဖိုင်ကိုပါ လူမှုကွန်ရက် မီဒီယာပေါ်တင်ပြီး ဒီအကြောင်းတွေကို မျှဝေခဲ့ပါတယ်။
ကလေးက ရဲကားပေါ်က မီးတန်းကို ဖွင့်ပြပေးဖို့ တောင်းဆိုလို့ ကာ့တ်က ဖွင့်ပြပေးခဲ့ပါသေးတယ်။ ပြီးတော့ ကလေးငယ်မှာ ရှိနေတဲ့ အရုပ်တွေက သူပြောသလိုပဲ တကယ်လည်း အရမ်းလန်းတယ်လို့ ရဲအရာရှိက မှတ်ချက် ပေးသွားခဲ့ပါတယ်။
