နိုက်ဂျီးရီးယား နိုင်ငံမှာ အထပ်မြင့် တိုက်တစ်လုံး ပြိုကျရာက အနည်းဆုံး လူ ၄ ဦး သေဆုံးပြီး ပျောက်ဆုံးနေသူ တော်တော်များများလည်း ရှိနေကြောင်း သိရပါတယ်။
နိုင်ငံရဲ့ အကြီးဆုံး မြို့ဖြစ်တဲ့ လားဂို့စ်မှာ ၂၂ ထပ်တိုက်တစ်လုံး ပြိုကျခဲ့တာ ဖြစ်ပါတယ်။ လတ်တလောမှာတော့ အလောင်း ၄ ခုကို တွေ့ရှိထားပြီး နောက်ထပ် အသက်ရှင် ကျန်ရစ်သူတွေ၊ ပိတ်မိ သေဆုံးသူတွေကို ကယ်ဆယ်ရေး အဖွဲ့တွေက ညလုံးပေါက် ဖြန့်ကျက် ရှာဖွေနေပါတယ်။
အဲဒီ အဆောက်အအုံဟာ ပြင်ဆင် ဆောက်လုပ်နေဆဲ အချိန်မှာ ပြိုကျသွားတာပါ။ အခင်းဖြစ်တဲ့ နေရာမှာ မြေတူးစက် ယန္တာယားကြီး တစ်ခုပါ ရှိနေပြီး အပျက်အစီးပုံတွေကို ဖယ်ရှားဖို့ စီစဉ်နေပါတယ်။ လောလောဆယ် သေဆုံးသူ ၄ ဦး တွေ့ရှိထားသလို အသက်ရှင် လွတ်မြောက်လာသူ ၄ ဦးလည်း ရှိထားပါတယ်။
အဆောက်အအုံ ပြိုကျရတဲ့ အကြောင်းရင်းကိုရော၊ အပျက်အစီးတွေအောက်မှာ ပိတ်မိနေသူ အရေအတွက်ကိုပါ မသိရသေးပါဘူး။ လားဂို့စ် ရဲတပ်ဖွဲ့ကတော့ ဖြစ်စဉ်နဲ့ ပတ်သက်လို့ စုံစမ်း စစ်ဆေးပြီးရင် ပြည်သူတွေဆီ အမြန်ဆုံး အသိပေးသွားမယ်လို့ ပြောပါတယ်။
Public Service Announcement
သမ္မတရဲ့ အထူးအကြံပေး အရာရှိ ဖီမီ အက်ဒီဆီနာက သေဆုံးသူတွေရဲ့ မိသားစုတွေနဲ့ထပ်တူ သမ္မတကြီး မူဟာမာဒူ ဘူဟာရီ အနေနဲ့ အထူးတလည် ဝမ်းနည်းနေကြောင်း ပြောကြားသွားပါတယ်။ ပြီးတော့ ကယ်ဆယ်ရေး လုပ်ငန်းတွေကို ဖြစ်နိုင်သမျှ အမြန်ဆုံး အရှိန်မြှင့် ဆောင်ရွက်ပေးဖို့ သမ္မတက ညွှန်ကြားထားကြောင်းလည်း အက်ဒီဆီနာက ဆိုပါတယ်။
လားဂို့စ်မှာ ပြီးခဲ့တဲ့ နှစ်ပိုင်းတွေအတွင်း အဆောက်အအုံ ပြိုကျမှုတွေကြောင့် လူအသေအပျောက် သတင်းတွေ ကြားခဲ့ရဖူးပါတယ်။ ၂၀၁၉ ခုနှစ်က ကျောင်းတစ်ကျောင်း ပြိုကျပြီး လူ ၁၀ ဦး သေဆုံးခဲ့သလို ၂၀၁၄ တုန်းကလည်း ၆ ထပ် တိုက်တစ်လုံးမှာ လူစုလူဝေးနဲ့ အခမ်းအနား ကျင်းပနေတုန်း ပြိုကျတဲ့အတွက် လူပေါင်း ၁၁၆ ဦး အသက်ဆုံးရှုံးခဲ့ပါတယ်။
