ရုရှား-ယူကရိန်း စစ်ပွဲမှာ တရုတ်ရဲ့ ရပ်တည်ချက်က မှန်ကန်ခဲ့တယ်ဆိုတာ သမိုင်းက သက်သေပြသွားလိမ့်မယ်လို့ တရုတ် နိုင်ငံခြားရေး ဝန်ကြီးက ပြောကြားလိုက်ပါတယ်။
ယူကရိန်း နိုင်ငံကို ရုရှားက ကျူးကျော် တိုက်ခိုက်ခဲ့တဲ့ ကိစ္စကို ရှုတ်ချတဲ့ ကုလသမဂ္ဂ အစည်းအဝေးမှာ တရုတ်က ကြားနေဖို့ ဆုံးဖြတ်ခဲ့ပါတယ်။ စစ်ပွဲ ရပ်တန့်ဖို့အတွက် စေ့စပ် ဆွေးနွေးရေး လမ်းကြောင်းကိုပဲ ရွေးချယ်သင့်တယ်လို့ တရုတ်က တွင်တွင်ပြောနေပေမယ့် လက်တွေ့မှာတော့ ရုရှားကို အကူအညီပေးဖို့ လိုလားနေကြောင်း အမေရိကန်က စွပ်စွဲထားပါတယ်။
ဝန်ကြီး ဝမ်ယီကတော့ တရုတ် အနေနဲ့ ကိုယ်ပိုင် ဆုံးဖြတ် ရွေးချယ်မှုနဲ့ ပတ်သက်လို့ ဘယ်လို ပြည်ပ စွက်ဖက်မှု၊ ဖိအားပေးမှု၊ စွပ်စွဲမှုတွေကိုမှ လက်ခံမှာ မဟုတ်ကြောင်း အမေရိကန်ကို တုံ့ပြန်ခဲ့ပါတယ်။
အခုသီတင်းပတ်ထဲမှာ ယူကရိန်း ကိစ္စနဲ့ ပတ်သက်လို့ အမေရိကန် သမ္မတ ဂျိုးဘိုင်ဒန်နဲ့ တရုတ် သမ္မတ ရှီကျင့်ဖျင်တို့လည်း ဖုန်းဆက် ဆွေးနွေးခဲ့ကြပါသေးတယ်။ တရုတ်ရဲ့ မူဝါဒဟာ စစ်ပွဲကို ဆန့်ကျင်ပြီး ငြိမ်းချမ်းရေးကိုပဲ အမြဲတမ်း အားပေး ထောက်ခံမှာဖြစ်ကြောင်း၊ တရုတ်ဟာ ကမ္ဘာ့ငြိမ်းချမ်းရေး တည်ဆောက်မှုမှာ ပါဝင်ကူညီတဲ့ အင်အားစု တစ်ခုအနေနဲ့ပဲ အမြဲ ရပ်တည်ကြောင်း ရှီက ဘိုင်ဒန်ဆီ အသိပေးခဲ့တယ်လို့လည်း ဝမ်က ဆိုပါတယ်။
Public Service Announcement
တရုတ်ရဲ့ ရည်မှန်းချက်နဲ့ ရပ်တည်မှုတွေက မျှတကြောင်း၊ ယူကရိန်း အရေးမှာလည်း တရုတ်ဟာ မှန်ကန်တဲ့ ရွေးချယ်မှုမျိုးနဲ့ ရပ်တည်ခဲ့တယ်ဆိုတာ သမိုင်းက မှတ်ကျောက် တင်သွားမှာဖြစ်ကြောင်း ဝမ်က ပြောကြားသွားပါတယ်။
ဝမ်က တရုတ်ဟာ စစ်ကို ဆန့်ကျင်တဲ့ နိုင်ငံအဖြစ် ရည်ညွှန်းသွားပေမယ့် လက်တွေ့မှာတော့ လိုအပ်လာရင် ထိုင်ဝမ်ကျွန်းကို စစ်အင်အားသုံးပြီး သိမ်းယူဖို့ တွန့်ဆုတ်နေမှာ မဟုတ်ကြောင်း တရုတ် အစိုးရက အစဉ်တစိုက် ခြိမ်းခြောက်ထားပါတယ်။
