ဘဏ်ပြိုလဲမှုနဲ့ ဆက်စပ်ပြီး ပါရာဂွေး သမ္မတ ရာထူးကနေ နုတ်ထွက်

သူနဲ့ အဆက်အစပ်ရှိတဲ့ ဘဏ်တစ်ခု ပြိုလဲမှုအပြီး ပါရာဂွေး သမ္မတဟာ ရာထူးကနေ နုတ်ထွက်သွားခဲ့ပါတယ်။

Ueno ဘဏ်ရဲ့ ပြိုလဲမှုဟာ ပါရာဂွေး အစိုးရ အဖွဲ့ထဲမှာ နိုင်ငံရေးအရ ရှုပ်ထွေးတဲ့ သက်ရောက်မှုတွေ ဖြစ်ပေါ်စေခဲ့ပါတယ်။ အဲဒီဘဏ်ရဲ့ လုပ်ငန်းလည်ပတ်မှုတွေဟာ ဖြေရှင်းလို့ မရတော့တဲ့ အခြေအနေမျိုးထိ ရောက်နေပြီး ဘဏ်လုပ်ငန်း အားလုံး ရပ်တန့်နေပါတယ်။

အတိုက်အခံ လွှတ်တော်အမတ်တွေက သမ္မတ ဆန်တီယေဂို ပီညာဟာ အဲဒီဘဏ်နဲ့ ပတ်သက်ပြီး အကျိုးစီးပွား ရှုပ်ထွေးမှု အဆက်အစပ်တွေ ရှိခဲ့ကြောင်း စွပ်စွဲခဲ့ပြီး ပီညာကတော့ ငြင်းဆိုထားပါတယ်။ သူဟာ ဘဏ်ကို ပိုင်ဆိုင်တဲ့ ကုမ္ပဏီ တစ်ခုမှာ မနှစ်ကထိ အဓိက ရှယ်ယာရှင်တစ်ယောက် ဖြစ်ခဲ့ပါတယ်။

နိုဝင်ဘာ ၅ ရက်နေ့မှာတော့ ပီညာက သမ္မတ အဖြစ်ကနေ နုတ်ထွက်ကြောင်း လူမှုကွန်ရက်ပေါ်မှာ ဗီဒီယို တစ်ခုတင်ပြီး ပြောကြားခဲ့ပါတယ်။

Public Service Announcement

သူ့ဖက်က တစ်ခုခု ပျက်ကွက်ခဲ့တာရှိရင် နစ်နာရသူ အားလုံးကို တောင်းပန်ကြောင်း၊ လူတွေရဲ့ ယုံကြည်မှုကို ချိုးဖောက်ဖို့ သူဘယ်တုန်းကမှ မရည်ရွယ်ခဲ့ကြောင်း ပီညာက ပြောဆိုထားပါတယ်။

ပါရာဂွေး အောက်လွှတ်တော်က သမ္မတကို စွပ်စွဲအပြစ်တင်မှုတစ်ခု အစပြုဖို့ အဆိုကို မဲခွဲ အတည်ပြုပြီးတဲ့နောက် ပီညာဟာ ရာထူးကနေ နုတ်ထွက်သွားတာ ဖြစ်ပါတယ်။ ပီညာက ရာထူးကနေ နုတ်ထွက်ကြောင်း ကြေညာပေမယ့် စွပ်စွဲအပြစ်တင်မှု ကိစ္စအတွက် နိုဝင်ဘာ ၆ ရက်မှာ စုံစမ်းစစ်ဆေးဖို့အတွက် သူ့ရဲ့ နုတ်ထွက်စာကို လွှတ်တော်ကို ဆိုင်းငံ့ထားပါတယ်။

ပီညာကတော့ သမ္မတ အဖြစ်ကနေ နုတ်ထွက်လိုက်တာဟာ တည်ငြိမ်မှု၊ လူမှုငြိမ်းချမ်းရေးနဲ့ ဒီမိုကရေစီ စံနှုန်းတွေကို ကာကွယ်ဖို့ဖြစ်ကြောင်း ပြောပါတယ်။ Ueno ဘဏ်ဟာ ဖောက်သည်ပေါင်း ၃ သန်းလောက်နဲ့ ချိတ်ဆက် အလုပ်လုပ်နေတဲ့ အထင်ကရ ဘဏ်ကြီးပါ။ အဲဒီ အရေအတွက်ဟာ ပါရာဂွေး နိုင်ငံရဲ့ အရွယ်ရောက်ပြီး လူဦးရေ ၆၀ ရာခိုင်နှုန်းလောက်နဲ့ ညီမျှပါတယ်။

ပြီးတော့ ပင်စင်အကောင့်တွေ၊ အများပြည်သူနဲ့ဆိုင်တဲ့ ရန်ပုံငွေ အကောင့်တွေ အများအပြားလည်း ဘဏ်စာရင်း ဖွင့်ပေးထားပါတယ်။ အခုသီတင်းပတ် အစောပိုင်းမှာ ဘဏ်ရဲ့ လုပ်ငန်း လည်ပတ်မှုတွေ ရပ်တန့်သွားတဲ့အခါ သန်းနဲ့ချီတဲ့ ဖောက်သည်တွေဟာ သူတို့ရဲ့ ဘဏ်အကောင့်တွေကို သုံးလို့ မရတော့ဘဲ ဖြစ်နေပါတယ်။

လောလောဆယ်တော့ ဗဟိုဘဏ်က ဒစ်ဂျစ်တယ် စနစ်နဲ့ ငွေကြေး ချေးယူမှုတွေကို ဝင်ရောက် ထိန်းညှိပေးထားပြီး မြို့တော် ဆန်တီယေဂို အပါအဝင် မြို့ကြီးတချို့မှာတော့ ပီညာ နုတ်ထွက်ပေးဖို့ ချီတက် ဆန္ဒပြမှုတွေ ပေါ်ပေါက်လာပါတယ်။

ပီညာဟာ ၂၀၂၃ ရွေးကောက်ပွဲတုန်းက အာဏာရ ကွန်ဆာဗေးတစ် ကော်လိုရာဒို ပါတီကို ကိုယ်စားပြု အနိုင်ရခဲ့ပြီး သမ္မတ ဖြစ်လာခဲ့ပါတယ်။ သူ့ရဲ့ နုတ်ထွက်မှုအပြီးမှာတော့ လုပ်ထုံးလုပ်နည်းအရဆိုရင် ဒုတိယ သမ္မတ ပက်ဒရို အေလီယာနာက သမ္မတ နေရာကို ဆက်ခံဖွယ် ရှိနေပါတယ်။

ကိုးကား: BBC