ချက်ဒ်နိုင်ငံက တရားမဝင် ရွှေမိုင်းတွင်း တစ်ခုမှာ လုပ်သား အချင်းချင်း တိုက်ခိုက် သတ်ဖြတ်ကြတာကြောင့် လူပေါင်း ၁၀၀ ဝန်းကျင် သေဆုံးခဲ့ကြောင်း သိရပါတယ်။
နိုင်ငံ မြောက်ပိုင်းက တောင်ထူထပ်ရာ ကူရီ ဘူဂူဒီ ဒေသမှာ ခိုးတူးနေတဲ့ ရွှေမိုင်းတွင်းက လုပ်သားနှစ်ယောက် ရန်ဖြစ်ရာက အခုလို အစုလိုက် အပြုံလိုက် သေဆုံးရတဲ့ ပဋိပက္ခမျိုးကြီး ဖြစ်တဲ့အထိ ကျယ်ပြန့်သွားခဲ့တာလို့ အာဏာပိုင်တွေက ပြောပါတယ်။
လစ်ဗျားနိုင်ငံနဲ့ နယ်နိမိတ်နားမှာ တည်ရှိတဲ့ ရွှေမိုင်းတွင်းက ဖြစ်ရပ်နဲ့ ပတ်သက်ပြီး စုံစမ်းမှုတွေ ဆက်လက် ဆောင်ရွက်နေတယ်လို့ ကာကွယ်ရေး ဝန်ကြီး ဒါအုတ် ယာယာ ဘရာဟင်က ဆိုပါတယ်။ ကနဦး သတင်းတွေအရ လူ ၁၀၀ လောက် သေပြီး ဒဏ်ရာရသူ ၄၀ လောက် ရှိခဲ့ကြောင်း သိရပါတယ်။
အဲဒီ သွေးမြေကျ ရန်ပွဲကြီးဟာ ပြီးခဲ့တဲ့ သီတင်းပတ် ကတည်းက ပေါ်ပေါက်ခဲ့ပေမယ့် အသေးစိတ် အချက်အလက်တွေကိုတော့ အခုအချိန်မှ အာဏာပိုင်တွေက ထုတ်ပြန်ခဲ့တာပါ။ တချို့ကလည်း တကယ့် အသေအပျောက် ကိန်းဂဏန်းဟာ အစိုးရ ကြေညာထားတာထက် ပိုများတယ်လို့ ပြောနေကြပါတယ်။
Public Service Announcement
ချက်ဒ် အစိုးရဟာ အထူးစုံစမ်း စစ်ဆေးရေး မစ်ရှင်တစ်ဖွဲ့ကိုလည်း အခင်းဖြစ်တဲ့ နေရာဆီ စေလွှတ်လိုက်ပါတယ်။ အဲဒီ နေရာဟာ မြို့တော် အန်ဂျမီနာနဲ့ ကီလိုမီတာ ၁၀၀၀ လောက် ကွာဝေးပါတယ်။
ရွှေတွင်းက ပဋိပက္ခဟာ အနီးအနားက လူနေ ဧရိယာတွေထိ ပျံ့နှံ့ခဲ့ပေမယ့် အခုတော့ စစ်တပ်က ထိန်းချုပ်ထားလိုက်နိုင်ပြီလို့ ဝန်ကြီး ဘရာဟင်က ပြောပါတယ်။ ရန်ပွဲမှာ မော်ရီတာနီရာနဲ့ လစ်ဗျားက လာရောက်တဲ့ တရားမဝင် ရွှေတူးသမားတွေလည်း ပါဝင်ခဲ့ကြတယ်လို့ သူက ဆိုပါတယ်။
တစ်ချိန်တည်းမှာပဲ ချက်ဒ် လုံခြုံရေး တပ်ဖွဲ့ဝင်တွေဟာ နယ်မြေ တည်ငြိမ် အေးချမ်းရေး ပြန်လည် ရရှိဖို့အတွက် ဆူပူသူတွေကို ပစ်သတ်ခဲ့ကြောင်း စွပ်စွဲချက်တွေ ထွက်ပေါ်နေပေမယ့် အာဏာပိုင်တွေက ငြင်းဆိုထားပါတယ်။ လောလောဆယ်တော့ ဒေသတွင်းက ရွှေတူးဖော်ရေး လုပ်ငန်း အားလုံးကို ရပ်ဆိုင်းထားစေကြောင်းလည်း သိရပါတယ်။
