ယူကရိန်းဆီ တင့်ကားတွေ ပေးပို့မယ့် အမေရိကန်ရဲ့ ဆုံးဖြတ်ချက်နဲ့ ပတ်သက်လို့ မြောက်ကိုရီးယား အစိုးရက ဝေဖန် ရှုတ်ချသွားခဲ့ပါတယ်။
မြောက်ကိုရီးယားခေါင်းဆောင် ကင်မ်ဂျုံအန်းရဲ့ ဩဇာထက်မြက်တဲ့ ညီမဖြစ်သူ ကင်မ်ယိုဂျောင်က အမေရိကန်ဟာ ယူကရိန်းဆီ သံချပ်ကာ တင့်ကားတွေ ပေးပို့ခြင်းအားဖြင့် ရုရှား-ယူကရိန်း ပဋိပက္ခမှာ သွယ်ဝိုက်စစ်ပွဲတစ်ခု ဆင်နွှဲလိုက်တာ ဖြစ်တယ်လို့ ပြောကြားသွားပါတယ်။
အမေရိကန် အစိုးရဟာ ရုရှားကို တိုက်ရိုက် ထိုးနှက်ဖို့ ပြောင်ပြောင်တင်းတင်း လုပ်ဆောင်နေတာဖြစ်ပြီး မကျော်သင့်တဲ့ စည်းတစ်ခုကို ကျော်လိုက်ပြီလို့ ကင်မ်ယိုဂျောင်က ဆိုပါတယ်။ ယူကရိန်းအတွက် မြေပြင် ထိုးစစ် ဆင်နွှဲရာမှာ အရေးပါတဲ့ စစ်လက်နက် ယန္တရားတွေ ပေါ်ပေါ်ထင်ထင် ထောက်ပံ့တဲ့ အမေရိကန်ရဲ့ လုပ်ရပ်ကြောင့် တင်းမာမှုတွေ ဆိုးသထက် ဆိုးလာမှာ စိုးရိမ်မိကြောင်း ကင်မ်ယိုဂျောင်က မြောက်ကိုရီးယား အစိုးရ ကိုယ်စား သဘောထား မှတ်ချက် ပေးပါတယ်။
နောက်ပြီး အမေရိကန်ရဲ့ လုပ်ရပ်ဟာ ရုရှားရဲ့ လုံခြုံရေး ကဏ္ဍကို မဟာဗျူဟာကျကျ ခြိမ်းခြောက် စိန်ခေါ်လိုက်တာဖြစ်ပြီး ဒေသ တစ်ခုလုံးကို ဆိုးရွားလှတဲ့ အန္တရာယ် ချောက်ကမ်းပါးဆီ တွန်းပို့တာနဲ့ မခြားဘူးလို့လည်း ကင်မ်ယိုဂျောင်က ဆက်ပြီး ပြောသွားခဲ့ပါတယ်။ သူက မြောက်ကိုရီးယားဟာ ရုရှားနဲ့အတူ အမြဲတမ်း တစ်သားတည်း ရပ်တည်မယ်လို့လည်း ဆိုပါတယ်။
အမေရိကန် အစိုးရဟာ ယူကရိန်းအတွက် M1 Abrams တင့်ကား စုစုပေါင်း ၃၁ စီး ပေးပို့သွားမယ်လို့ ကတိပြုထားပါတယ်။ အလားတူ ဂျာမနီနဲ့ ဗြိတိန်တို့ကလည်း သူတို့ရဲ့ တိုက်ပွဲဝင် တင့်ကားတွေ ယူကရိန်း စစ်တပ်ဆီ ထောက်ပံ့ဖို့ အသီးသီး ကတိပြုထားပြီး တခြား အနောက်မဟာမိတ် နိုင်ငံတွေပါ အဲဒီလမ်းစဉ်နောက် လိုက်လာဖွယ် ရှိနေပါတယ်။
မြောက်ကိုရီးယားဟာ ယူကရိန်းအပေါ် ကျူးကျော်စစ် ဆင်နွှဲခဲ့တဲ့ ရုရှားရဲ့ လုပ်ရပ်ကို ကာကွယ် ရပ်တည်ခဲ့ပြီး အမေရိကန်ရဲ့ ကြားဝင် သွေးထိုးမှုတွေကြောင့် ရုရှားဟာ ကိုယ့်နိုင်ငံ အချုပ်အခြာ အာဏာ တည်တံ့ လုံခြုံရေးအတွက် လုပ်သင့် လုပ်ထိုက်တာကို လုပ်ခဲ့ရုံသာ ဖြစ်တယ်လို့ ပြောကြားထားပါတယ်။
တစ်ဖက်မှာလည်း အမေရိကန် အစိုးရက မြောက်ကိုရီးယားဟာ ရုရှားအတွက် လက်နက်ကြီး ကျည်ဆန်တွေနဲ့ တခြား ခဲယမ်းမီးကျောက်တွေ ပေးပို့နေကြောင်း စွပ်စွဲထားပြီး မြောက်ကိုရီးယားကတော့ ငြင်းဆိုထားပါတယ်။
