တိုင်ဖွန်းမုန်တိုင်းတစ်ခု ချဉ်းကပ်လာနေတဲ့ အခြေအနေကြောင့် ထိုင်ဝမ်ဟာ နှစ်စဉ် ကျင်းပလေ့ရှိတဲ့ စစ်ရေးလေ့ကျင့်မှု အစီအစဉ်ကို ပယ်ဖျက်လိုက်ရပါတယ်။
စစ်ရေးလေ့ကျင့်မှု အစီအစဉ် ဖျက်သိမ်းတဲ့ ဆုံးဖြတ်ချက်ကို ဇူလိုင် ၂၅ ရက်မှာ အာဏာပိုင်တွေက ကြေညာခဲ့ပြီး မုန်တိုင်းဒဏ် ကာကွယ်ရေး အစီအမံတွေကို ပိုမို အာရုံစိုက်သွားမယ်လို့ ပြောပါတယ်။ တိုင်ဖွန်းမုန်တိုင်း ဒေါ့ဆူရီဟာ ကျွန်းနိုင်ငံငယ်အတွက် ၄ နှစ်တာ ကာလအတွင်း အကြမ်းတမ်းဆုံး ကြုံရတဲ့ တိုင်ဖွန်းမုန်တိုင်း ဖြစ်လာနိုင်တယ်လို့ ဆိုပါတယ်။
ထိုင်ဝမ်ဟာ တိုင်ဖွန်းမုန်တိုင်းတွေနဲ့ မစိမ်းလှတဲ့ နိုင်ငံတစ်ခုပါ။ ဒါပေမဲ့ ၂၀၁၉ နောက်ပိုင်း ထိုင်ဝမ်တည့်တည့်ကို တိုင်ဖွန်းမုန်တိုင်း ဝင်ရောက်တာမျိုး မရှိခဲ့သေးပါဘူး။ အခုတော့ ဒေါ့ဆူရီက ထိုင်ဝမ်ဆီ ဦးတည် ရွေ့လျားလာနေတာကြောင့် ပြည်သူလူထုကို နိုးကြား သတိရှိနေကြဖို့ အာဏာပိုင်တွေက တိုက်တွန်းနေပါတယ်။
ဒေါ့ဆူရီဟာ Category 4 အဆင့် စူပါတိုင်ဖွန်း တစ်ခုအဖြစ် အားကောင်းလာနိုင်ပြီး ထိုင်ဝမ်နဲ့ ဖိလစ်ပိုင်ကြားက ဘာရှီ ရေလက်ကြားကို ဖြတ်သန်းမယ်လို့ ယူဆရပါတယ်။ အဲဒီလမ်းကြောင်းအရ မုန်တိုင်းရဲ့ ပြင်းထန်မှုဟာ ထိုင်ဝမ်အပေါ် သေသေချာချာ သက်ရောက်ထိခိုက်စေမယ့် သဘောပါပဲ။
Public Service Announcement
ထိုင်ဝမ် ကာကွယ်ရေး ဝန်ကြီးဌာနက ဇူလိုင် ၂၅ ရက်မှာ စတင်မယ့် ဟန်ကွမ် စစ်ရေးလေ့ကျင့်မှုရဲ့ ကနဦး အဆင့်တွေကို ပြုလုပ်တော့မှာ မဟုတ်ကြောင်း အတည်ပြုခဲ့ပြီး မုန်တိုင်းရဲ့ အခြေအနေအရ လုံခြုံရေးအတွက် စိုးရိမ်ရတာတွေ ရှိနေပြီး ပိုမို အလေးထား ပြင်ဆင်မှုတွေ လိုအပ်နေကြောင်း ကြေညာထားပါတယ်။
ထိုင်ဝမ်ဟာ ရက်ပေါင်း ၁၄၀၀ ကျော်လောက် ကြာတဲ့ထိ တိုင်ဖွန်းမုန်တိုင်းတစ်ခု တိုက်ရိုက် ဝင်ရောက်တာနဲ့ မကြုံခဲ့ရကြောင်း၊ ဒါကြောင့် ပေါ့လျော့မှုတွေ၊ လစ်ဟာမှုတွေ ရှိနေနိုင်ပြီး သက်ဆိုင်ရာ ဌာနအသီးသီးက ကြိုတင် ပြင်ဆင်မှုတွေကို မလစ်ဟင်းရအောင် အစွမ်းကုန် အာရုံစိုက်စေလိုကြောင်း ဝန်ကြီးချုပ် ချန်ချိန်ဂျန်က ပြောကြားခဲ့ပါတယ်။ ပြီးတော့ ပြည်သူတွေ အနေနဲ့လည်း တိုင်ဖွန်းရဲ့ အန္တရာယ်ကို လျှော့မတွက်ကြဖို့ သူက အလေးအနက် သတိပေးခဲ့ပါတယ်။
ထိုင်ဝမ်အနေနဲ့ မုန်တိုင်းကြောင့် ဖျက်သိမ်းခဲ့တဲ့ စစ်ရေးလေ့ကျင့်မှု အစီအစဉ်ကို အခွင့်သာတဲ့ နောက်တစ်ချိန်ချိန်မှာ ပြန်လည် စတင်မလား ဆိုတာကိုတော့ တိတိကျကျ မသိရသေးပါဘူး။ ထိုင်ဝမ်ဟာ တရုတ်ရဲ့ အစဉ်တစိုက် ခြိမ်းခြောက်မှုကို ကြုံနေရတာကြောင့် ကာကွယ်ရေး စွမ်းရည် မြှင့်တင်မှု အစီအမံတွေဟာ နိုင်ငံရဲ့ လုံခြုံရေး ကဏ္ဍမှာ အရမ်းအရေးကြီးနေပါတယ်။
တရုတ်က ထိုင်ဝမ်ကျွန်းကို ပိုင်နက်နယ်မြေ တစ်ခုအဖြစ် သတ်မှတ်ထားပြီး လိုအပ်လာရင် စစ်အင်အားသုံး တိုက်ခိုက်သိမ်းယူဖို့ တွန့်ဆုတ်နေမှာ မဟုတ်ကြောင်း သတိပေးထားပါတယ်။ ဒီမိုကရေစီစနစ် ထွန်းကားတဲ့ ထိုင်ဝမ်နိုင်ငံကတော့ တရုတ်ရဲ့ လွှမ်းမိုးလိုမှုကို ငြင်းပယ်ပြီး အချုပ်အခြာ အာဏာပိုင် နိုင်ငံတစ်ခု အနေနဲ့သာ ရပ်တည်ဖို့ လိုလားနေပါတယ်။
