ဟားမားစ် ပြောက်ကျားတွေနဲ့ အပစ်အခတ် ရပ်စဲရေး သဘောတူညီမှု ရသည်ဖြစ်စေ၊ မရသည်ဖြစ်စေ ဂါဇာတောင်ပိုင်းမှာရှိတဲ့ ရာဖားဟ်မြို့ကို အစ္စရေးက သေချာပေါက် မြေပြင်ထိုးစစ် ဆင်နွှဲသွားမယ်လို့ အစ္စရေး ဝန်ကြီးချုပ် ဘင်ဂျမင် နေတန်ညာဟုက ပြောပါတယ်။
လတ်တလောမှာ အစ္စရေးနဲ့ ဟားမားစ်တို့ကြား ယာယီ အပစ်အခတ် ရပ်စဲနိုင်ရေးကိစ္စကို ကြားခံ ညှိနှိုင်းပေးနေတဲ့ နိုင်ငံတွေက အသည်းအသန် ကြိုးစားနေပြီး နှစ်ဖက်စလုံးကိုလည်း နားချနေပါတယ်။ အစ္စရေးရဲ့ အဓိက စစ်မဟာမိတ်ဖြစ်တဲ့ အမေရိကန်ကလည်း ဂါဇာကမ်းမြှောင် တောင်ပိုင်းမှာ ပါလက်စတိုင်း ဒုက္ခသည် သန်းနဲ့ချီ စုဝေးနေတဲ့ ရာဖားဟ်မြို့ကို အစ္စရေးတပ်တွေ မြေပြင်ထိုးစစ် မဆင်နွှဲဖို့ အစဉ်တစိုက် ဖိအားပေး တောင်းဆိုနေပါတယ်။
ဒါပေမဲ့လည်း သဘောထား တင်းမာသူ တစ်ဦးအဖြစ် လူသိများတဲ့ နေတန်ညာဟုကတော့ အောက်တိုဘာ ၇ ရက်နေ့မှာ အစ္စရေးပိုင်နက်ကို ကျူးကျော်ရန်စ တိုက်ခိုက်ခဲ့တဲ့ ဟားမားစ်တွေကို အပြီးတိုင် ချေမှုန်းဖို့ စိတ်ပိုင်းဖြတ်ထားပြီး ဖြစ်ကြောင်းနဲ့ ရာဖားဟ်ကို ထိုးစစ်ဆင်မှု အပါအဝင် အစ္စရေးရဲ့ စစ်ဆင်ရေး ရည်မှန်းချက်အားလုံး အောင်မြင်အောင် ရှေ့ဆက်ဖို့ သံန္နိဋ္ဌာန် ချထားကြောင်း ပြောကြားခဲ့ပါတယ်။
ပါလက်စတိုင်းတွေက အစ္စရေး မြို့ရွာတွေကို ကျူးကျော်ချိန်မှာ ဓားစာခံအဖြစ် ဖမ်းဆီးသွားတာ ခံရသူတွေရဲ့ မိသားစုဝင်တွေနဲ့ တွေ့ဆုံချိန်မှာ နေတန်ညာဟုက အစ္စရေး တပ်တွေဟာ ရာဖားဟ်ကို သေချာပေါက် ဝင်ရောက်ပြီး ဟားမားစ် တပ်ရင်းတပ်ဖွဲ့တွေကို ချေမှုန်းမှာဖြစ်ကြောင်း၊ ဒီအတောအတွင်း အပစ်ရပ် သဘောတူညီမှု တစ်ခုခု ရရ မရရ အဲဒီ အစီအစဉ်ကို ပြောင်းလဲမှာမဟုတ်ကြောင်း မှတ်ချက်ပေးခဲ့ပါတယ်။
Public Service Announcement
လောလောဆယ်မှာတော့ အမေရိကန်၊ အီဂျစ်နဲ့ ကာတာ အစိုးရ ကိုယ်စားလှယ်တွေဟာ အီဂျစ်နိုင်ငံ၊ ကိုင်ရိုမြို့တော်မှာ အပစ်အခတ် ရပ်စဲရေး သဘောတူညီမှု တစ်ခုကို အဆိုပြုပြီး သတိကြီးကြီး ဆွေးနွေးနေပါတယ်။ ဟားမားစ်တွေက အစ္စရေး ဓားစာခံ တော်တော်များများကို ပြန်လွှတ်ပေးရင် အပစ်အခတ် ရက် ၄၀ ရပ်စဲထားရေးဆိုတဲ့ ကိစ္စကို စဉ်းစားနေပြီး တစ်ဖက်မှာလည်း ဟားမားစ် ခေါင်းဆောင်တချို့က အစ္စရေးရဲ့ စစ်ဆင်ရေးတွေ အလုံးစုံ မရပ်တန့်မချင်း ဓားစာခံတွေကို ပြန်လွှတ်ပေးဖို့ ဆန္ဒမရှိကြောင်း တင်းခံထားတဲ့အတွက် ကြားဝင်စေ့စပ်ပေးသူတွေအတွက် အကျပ်ရိုက်စရာ ဖြစ်နေပါတယ်။
အမေရိကန်ကတော့ အစ္စရေးရော၊ ဟားမားစ်ပါ အပြန်အလှန် တင်းတင်းမာမာ တောင်းဆိုနေတာတွေနဲ့ ပတ်သက်လို့ လျှော့သင့်သလောက် လျှော့ပေါ့ပေးပြီး အပစ်အခတ် ရပ်စဲရေးကိစ္စ အထမြောက်အောင် အစဉ်တစိုက် ဖိအားပေးနေတယ်လို့လည်း သိရပါတယ်။
Ref: Reuters
