မီးတောင်ပေါက်ကွဲမှုကြောင့် အင်ဒိုနီးရှား နိုင်ငံရဲ့ ကမ္ဘာကျော် အပန်းဖြေကျွန်း ဘာလီဆီ ပျံသန်းပြေးဆွဲတဲ့ လေယာဉ် ခရီးစဉ် အများအပြား ဆိုင်းငံ့ထားရကြောင်း သိရပါတယ်။
နိုဝင်ဘာ ၁၃ ရက်နေ့မှာတော့ ဩစတြေးလျ၊ ဟောင်ကောင်၊ အိန္ဒိယ၊ မလေးရှား၊ စင်ကာပူတို့ကနေ ဘာလီကျွန်းဆီ ပျံသန်းပြေးဆွဲတဲ့ ခရီးစဉ် အားလုံး အသွားရော၊ အပြန်ပါ ရပ်ဆိုင်းထားဖို့ အဲဒီနိုင်ငံ အသီးသီးရဲ့ လေကြောင်းလိုင်းတွေက ဆုံးဖြတ်ခဲ့ကြပါတယ်။
အကြောင်းကတော့ ဘာလီကျွန်းနားက မီးတောင်တစ်ခု ပေါက်ကွဲပြီး ကောင်းကင်အထက် ကီလိုမီတာ အများအပြားထိ မြင့်မားတဲ့ ချော်ပြာတွေကို မှုတ်ထုတ်နေတာကြောင့် ဖြစ်ပါတယ်။ ဩစတြေးလျရဲ့ Jetstar၊ Qantasနဲ့ Virgin Australia လေကြောင်းလိုင်းတွေဟာ အခုသီတင်းပတ်မှာ လျူဝိုတိုဘီ လာကီလာကီ မီးတောင်ပေါက်ကွဲမှုကြောင့် ဘာလီကို အသွားအပြန် ပြေးဆွဲမှု ခရီးစဉ်အားလုံး ရပ်နားထားမယ်လို့ ကြေညာခဲ့ပါတယ်။
Public Service Announcement
Jetstarက ဘာလီကို အသွားအပြန် ခရီးစဉ် အားလုံးကို အနည်းဆုံး နိုဝင်ဘာ ၁၄ ရက်နေ့ ညပိုင်းထိ ရပ်နားထားပြီး အခြေအနေ စောင့်ကြည့်မယ်လို့ ဆိုပါတယ်။ တခြား ဩစတြေးလျ လေကြောင်းလိုင်းတွေနဲ့ အာရှနိုင်ငံ တချို့ရဲ့ ခရီးသည်တင် လေကြောင်းလိုင်းတွေကလည်း လုံခြုံရေး ကဏ္ဍကို အလေးထားပြီး ခရီးစဉ်တွေ ဆိုင်းငံ့ထားဖို့ အသီးသီး ဆုံးဖြတ်ခဲ့ကြတာ ဖြစ်ပါတယ်။
လျူဝိုတိုဘီ လာကီလာကီ မီးတောင်ဟာ ပြီးခဲ့တဲ့ သီတင်းပတ်တွေအတွင်း မကြာခဏ ပေါက်ကွဲမှုတွေ ဖြစ်ပွားခဲ့ပါတယ်။ ၁၇၀၃ မီတာမြင့်ပြီး ထိပ်ဝနှစ်ခုနဲ့ မီးတောင် ပေါက်ကွဲမှုတွေကြောင့် လူ ၉ ဦး သေဆုံးခဲ့ပြီး ၃၁ ဦး ဒဏ်ရာရခဲ့သလို ၁၁၀၀၀ ကျော်ကို အရေးပေါ် ရွှေ့ပြောင်းပေးခဲ့ရကြောင်း အင်ဒိုနီးရှား အရေးပေါ် ကယ်ဆယ်ရေး ဌာနက ထုတ်ပြန်ထားပါတယ်။
မီးတောင်ပေါက်ကွဲမှုတွေဟာ အနီးတဝိုက် လေပိုင်နက်ထဲ လေယာဉ်ပျံသန်းမှုတွေကို ကြီးကြီးမားမား အနှောင့်အယှက် ဖြစ်စေပြီး ချော်ပြာတွေ လေယာဉ်အင်ဂျင်ထဲ ဝင်ရောက်ခြင်းက အန္တရာယ် ကြီးလွန်းသလို လေယာဉ်ရဲ့ လေကာမှန်တွေကို မှုန်ဝါးပြီး မြင်ကွင်း မရှင်းမလင်း ဖြစ်စေတဲ့ ပြဿနာမျိုးလည်း ရှိနေကြောင်း သိရပါတယ်။
ကိုးကား: EPA
