ကာတာရဲ့ မြို့တော်ဆီ ရောက်နေတဲ့ ဟားမားစ် အရာရှိတွေကို အစ္စရေး လေကြောင်းကနေ တိုက်ခိုက်

ကာတာနိုင်ငံရဲ့ မြို့တော် ဒိုဟာမှာ ရှိနေတဲ့ ဟားမားစ် ခေါင်းဆောင်ပိုင်းတွေနဲ့ အရာရှိတွေကို ပစ်မှတ်ထားပြီး လေကြောင်းကနေ တိုက်ခိုက်ခဲ့ကြောင်း သိရပါတယ်။

အစ္စရေး စစ်တပ်က အဲဒီ တိုက်ခိုက်မှု လုပ်ဆောင်ခဲ့တာကို အတည်ပြုခဲ့ပြီး ဟားမားစ် ခေါင်းဆောင်တွေ ရှိနေတဲ့ အဆောက်အအုံတွေကို ပစ်မှတ်ထားခဲ့တာလို့ ပြောပါတယ်။ ဒါပေမဲ့ ဘယ်အဆောက်အအုံတွေကို တိုက်ခိုက်ခဲ့တာလဲ ဆိုတာကိုတော့ တိတိကျကျ မသိရသေးပါဘူး။

ကာတာဟာ အစ္စရေးနဲ့ ပါလက်စတိုင်း ပြောက်ကျားအဖွဲ့ ဟားမားစ်တို့ကြား အပစ်အခတ် ရပ်စဲရေး ဆွေးနွေးမှုတွေ အထမြောက်အောင် အဓိက ကြားဝင် စေ့စပ်ပေးနေတဲ့ နိုင်ငံတစ်ခု ဖြစ်ပါတယ်။ အစ္စရေးက ဟားမားစ်တွေ အနေနဲ့ လက်နက်ချ အညံ့ခံမလား၊ အပြီးတိုင် ချေမှုန်းသုတ်သင် ခံရမယ့် ကံကြမ္မာဆိုးကို ရင်ဆိုင်မလားလို့ ရာဇသံပေးခဲ့ပြီး ၂ ရက်အတွင်းမှာ အခု တိုက်ခိုက်မှုကို လုပ်ဆောင်ခဲ့တာပါ။

အစ္စရေးဟာ ဟားမားစ် နိုင်ငံရေးဗျူရို အဖွဲ့ဝင်တချို့ ရှိနေတဲ့ အဆောက်အအုံတွေကို တိုက်ခိုက်ခဲ့တာလို့ ကာတာ အစိုးရက ပြောပါတယ်။ ဟားမားစ် အရာရှိ တစ်ယောက်က ဂါဇာကမ်းမြှောင်ဒေသမှာ အစ္စရေးနဲ့ ဟားမားစ်ကြား အပစ်အခတ် ရပ်စဲရေး ဆွေးနွေးဖို့ ဒိုဟာကို ရောကနေတဲ့ ညှိနှိုင်းရေး အဖွဲ့ကို အစ္စရေးက ပစ်မှတ်ထားခဲ့တာလို့ ပြောပါတယ်။

Public Service Announcement

ကာတာ နိုင်ငံခြားရေး ဝန်ကြီးဌာနက အစ္စရေးရဲ့ တိုက်ခိုက်မှုဟာ နိုင်ငံတကာ စည်းမျဉ်း ဥပဒေတွေကို ပြောင်ပြောင်တင်းတင်း ချိုးဖောက်မှုလို့ စွပ်စွဲခဲ့ပြီး အခုလို အဆင်ခြင်မဲ့တဲ့ လုပ်ရပ်မျိုးကို ကာတာဖက်က သည်းခံနေမှာ မဟုတ်ဘူးလို့ ကြေညာခဲ့ပါတယ်။

အစ္စရေး စစ်တပ်ရဲ့ ထုတ်ပြန်ချက်မှာတော့ ၂၀၂၃ ခုနှစ်၊ အောက်တိုဘာ ၇ ရက်နေ့က အစ္စရေး ပိုင်နက်ထဲ ဟားမားစ် တပ်ဖွဲ့တွေ အလစ်ကျူးကျော်ပြီး လူပေါင်း ၁၂၀၀ ကျော်ကို သတ်ဖြတ်၊ ၂၅၀ လောက်ကို ဓားစာခံအဖြစ် ဖမ်းဆီးသွားခဲ့တဲ့ လုပ်ရပ်မှာ အဓိက တာဝန်ရှိသူတွေကို ဦးတည်တဲ့ တိတိကျကျ ချေမှုန်းတိုက်ခိုက်မှု တစ်ခုကို လုပ်ဆောင်ခဲ့တယ်လို့ ထုတ်ပြန်ခဲ့ပါတယ်။

လွန်ခဲ့တဲ့ နှစ်ပတ်လောက်က အစ္စရေးဟာ ပြည်ပရောက် ဟားမားစ် ခေါင်းဆောင်တွေကို ရှာဖွေ ချေမှုန်းသွားမယ်လို့ သတိပေးခဲ့ပါတယ်။ အစ္စရေးစစ်တပ် အကြီးအကဲ အီယဲလ်ဇာမားက ဟားမားစ် ခေါင်းဆောင်ပိုင်း အများစုဟာ ပြည်ပမှာ နေထိုင်နေကြကြောင်း၊ အဲဒီလို အေးအေးလူလူ ရှိနေတဲ့ ဟားမားစ် ထိပ်သီး ခေါင်းဆောင်တွေဆီ အစ္စရေးရဲ့ လက်တံတွေ ရောက်ရှိလာမှာဖြစ်ကြောင်း ပြောကြားခဲ့ပါတယ်။

ဟားမားစ်ရဲ့ ညှိနှိုင်းရေး အဖွဲ့ဟာ ဒိုဟာမှာပဲ ရှိနေပေမယ့် ဇူလိုင်လနောက်ပိုင်း အစ္စရေးနဲ့ တိုက်ရိုက် ဆွေးနွေးတာမျိုး အထမမြောက်ခဲ့ပါဘူး။

ဒိုဟာမှာ အစ္စရေးရဲ့ လေကြောင်းတိုက်ခိုက်မှု ဖြစ်ပွားပြီးတဲ့နောက် ကာတာနိုင်ငံဆိုင်ရာ အမေရိကန် သံရုံးက ဒိုဟာရောက် အမေရိကန် နိုင်ငံသားတွေအားလုံး ဘေးကင်းလုံခြုံတဲ့ နေရာတွေမှာ ယာယီ ခိုလှုံနေကြဖို့လည်း သတိပေးချက် ထုတ်ပြန်ခဲ့ပါတယ်။

ကိုးကား: Independent