အိန္ဒိယ နိုင်ငံမှာ တောဆင်ရိုင်းအုပ်ကို ရထားက ဝင်တိုက်မိခဲ့တာကြောင့် ဆင် ၇ ကောင် သေဆုံးခဲ့ကြောင်း သိရပါတယ်။
အိန္ဒိယနိုင်ငံ အရှေ့မြောက်ပိုင်းက ရထားလမ်းဖြတ် တစ်နေရာကို ဆင်အုပ်က ဖြတ်ကူးနေတဲ့အချိန် အရှိန်နဲ့ ခုတ်မောင်းလာတဲ့ ခရီးသည်တင် ရထားက ဝင်တိုက်ခဲ့တာ ဖြစ်ပါတယ်။
ဒီဇင်ဘာ ၂၀ ရက်နေ့ မနက်ပိုင်းက အာသံပြည်နယ်၊ ဟိုဂျိုင်ခရိုင်မှာ ဖြစ်ပွားခဲ့တဲ့ မတော်တဆမှုကြောင့် သေဆုံးခဲ့တဲ့ အာရှဆင်တွေထဲမှာ ဆင်သားပေါက် တချို့လည်း ပါဝင်ခဲ့ပါတယ်။
ရထားမောင်းသူဟာ ကောင်ရေ ဒါဇင်တချို့ပါတဲ့ ဆင်အုပ်ကို မြင်မြင်ချင်း အရေးပေါ် ဘရိတ်ဆွဲခဲ့ပေမယ့်လည်း ကံမကောင်းစွာပဲ တချို့ တိရစ္ဆာန်တွေကိုတော့ ဝင်တိုက်မိခဲ့တာ ဖြစ်တယ်လို့ အရှေ့မြောက် နယ်စပ် မီးရထားလိုင်းက ထုတ်ပြန်ပါတယ်။
Public Service Announcement
ဆင်အုပ်နဲ့ ဝင်တိုက်ခဲ့တာကြောင့် ရထားတွဲ ၅ ခု လမ်းချော်သွားခဲ့ပေမယ့် လူအထိအခိုက်တော့ မရှိခဲ့ပါဘူး။ ရထားဟာ အိန္ဒိယရဲ့ မြို့တော် ဒေလီဆီကို ဦးတည် ခုတ်မောင်းနေခဲ့တာ ဖြစ်ပါတယ်။
ရထားမတော်တဆမှုအပြီး အဲဒီဒေသမှာ ရထားပြေးဆွဲမှု တော်တော်များများကို ပယ်ဖျက်တာ၊ လမ်းကြောင်းပြောင်းစေတာတွေ လုပ်ခဲ့ရပါတယ်။
သေဆုံးခဲ့တဲ့ တောဆင်ရိုင်းတွေကို တိရစ္ဆာန်ဆေးကု ဆရာဝန်တွေက သေမှုသေခင်း စစ်ချက်ယူပြီး အဲဒီနေ့မှာပဲ မြေမြှုပ် သင်္ဂြိုဟ်ပေးခဲ့ပါတယ်။
အာသံပြည်နယ်ဟာ အိန္ဒိယမှာ ဆင်ကောင်ရေ အများဆုံး ရှိနေတဲ့ ဒေသလည်း ဖြစ်ပါတယ်။ အာသံမှာ မှတ်တမ်းတင် စာရင်းသွင်းလို့ ရထားတဲ့ ဆင်ကောင်ရေပေါင်း ၆၀၀၀ နီးပါး ရှိနေပါတယ်။
အရင်ကလည်း အိန္ဒိယမှာ ရထားတွေနဲ့ တောဆင်ရိုင်းအုပ်တွေ တိုက်မိတဲ့ ဖြစ်စဉ်တွေ ရှိခဲ့ဖူးပါတယ်။ ဒါပေမဲ့ ဒီဇင်ဘာ ၂၀ ဖြစ်စဉ်ကတော့ ပုံမှန်ဆိုရင် တောဆင်ရိုင်းတွေ ကျက်စားသွားလာလေ့ရှိတဲ့ နယ်မြေ မဟုတ်ဘူးလို့ ရထားလိုင်းက မှတ်ချက်ပေးခဲ့ပါတယ်။
ကိုးကား: BBC
