အီရန်ရဲ့ ထောက်လှမ်းရေး ဝန်ကြီးကို လုပ်ကြံသတ်ဖြတ်နိုင်ခဲ့ကြောင်း အစ္စရေး က ပြောကြားခဲ့ပါတယ်။
မတ်လ ၁၈ ရက်နေ့မှာ အစ္စရေး ကာကွယ်ရေး ဝန်ကြီး အစ္စရေးကတ်ဇ်က ကြေညာခဲ့ရာမှာ ညလုံးပေါက် လေကြောင်းတိုက်ခိုက်မှုတွေအတွင်း အီရန်ရဲ့ ထောက်လှမ်းရေး ဝန်ကြီး အစ္စမေးလ် ခါတစ်ဘ် သေဆုံးသွားကြောင်း ဖော်ပြထားပါတယ်။
အစ္စရေးရဲ့ ထုတ်ပြန်ချက် မှန်ကန်တယ်ဆိုရင် နှစ်ရက်အတွင်း အီရန်ရဲ့ ထိပ်တန်း အရာရှိ ၃ ဦးထိ အစ္စရေး တိုက်ခိုက်မှုကြောင့် သေဆုံးခြင်း ဖြစ်ပါတယ်။ အစ္စရေး ကြေညာခဲ့သလိုပဲ ခါတစ်ဘ် သေဆုံးခဲ့သလား ဆိုတာကိုတော့ အီရန်ဖက် အတည်မပြုသေးပါဘူး။
ကတ်ဇ်က အခု ရက်ပိုင်းအတွင်း စစ်ဆင်ရေး မျက်နှာစာ အမျိုးမျိုးမှာ အံ့ဩစရာ သတင်းတွေ မကြာမကြာ ကြားရမယ်လို့ ပြောပေမယ့် အသေးစိတ်ကိုတော့ မှတ်ချက် မပေးခဲ့ပါဘူး။
Public Service Announcement
အဲဒီမတိုင်ခင် တစ်ရက်ကလည်း အစ္စရေးဟာ အီရန်ရဲ့ လုံခြုံရေး အရာရှိချုပ် အလီ လာရီဂျာနီနဲ့ အစ္စလာမ်မစ် တော်လှန်ရေး အစောင့်တပ် (IRGC)ရဲ့ ထိပ်တန်း တပ်မှူးတစ်ဦးတို့ကို လေကြောင်း တိုက်ခိုက်မှုတွေနဲ့ ရှင်းလင်းပစ်ခဲ့ပါတယ်။
အီရန်မှာ ဘူရှဟာ နျူကလီးယား ဓာတ်အားပေး စက်ရုံဝင်းထဲကိုလည်း ဒုံးကျည်၊ ဒါမှမဟုတ် ဒရုန်းတစ်ခုခုနဲ့ ပစ်ခတ်တာ ခံခဲ့ရပေမယ့် အသေအပျောက် မရှိခဲ့သလို ဓာတ်ပေါင်းဖိုတွေလည်း အပျက်အစီး မရှိခဲ့ဘူးလို့ အီရန်က ထုတ်ပြန်ခဲ့ပါတယ်။
စစ်ရေး ပဋိပက္ခတွေ အတောအတွင်း နျူကလီးယားဆိုင်ရာ ဆိုးရွားတဲ့ မတော်တဆမှုတွေ ဖြစ်ပေါ်မလာအောင် အထူးသတိထား ထိန်းထိန်းသိမ်းသိမ်း လုပ်ဆောင်ကြဖို့ ကုလသမဂ္ဂရဲ့ နျူကလီးယား အေဂျင်စီဖြစ်တဲ့ အပြည်ပြည်ဆိုင်ရာ အက်တမ်စွမ်းအင် အေဂျင်စီ (IAEA)ရဲ့ အကြီးအကဲ ရာဖေးလ် ဂရော့ဆီက ပြောကြားခဲ့ပါတယ်။
အစ္စရေးနဲ့ အမေရိကန်တို့ ပူးပေါင်းပြီး အီရန်မှာ လေကြောင်းတိုက်ခိုက်မှုတွေ ဆင်နွှဲခဲ့ရာက စတင်ခဲ့တဲ့ စစ်ပွဲဟာ ရက်ပေါင်း ၂၀ နီးပါး ကြာမြင့်လာပြီဖြစ်ပြီး လက်ရှိ အချိန်ထိတော့ နှစ်ဖက်စလုံးက အလျှော့ပေးမယ့်၊ ရပ်တန့်မယ့် အရိပ်အယောင်မျိုး မတွေ့ရသေးပါဘူး။
ကိုးကား: AP
