■ကျားဖြန့်ဂိုဏ်းတွေကို အမေရီကန်က နိုင်ငံတွင်းထိဝင်ပြီး တစ်ခုမကျန်ပိတ်ပစ်တာမျိုးဖြစ်နိုင်ကြောင်း FBI ပြော
မတ်-၂၀၊၂၀၂၆။People’s Spring
အမေရိကန် ဖက်ဒရယ် ထောက်လှမ်းရေးဗျူရို (FBI) ညွှန်ကြားရေးမှူးက မြန်မာအပါအဝင် အရှေ့တောင်အာရှ ဒေသတွင်း နိုင်ငံတွေရဲ့ ဆိုက်ဘာ ငွေကြေး လိမ်လည်မှု (ကျားဖြန့်) လုပ်ငန်းတွေမှာ တရုတ် အာဏာရ ကွန်မြူနစ်ပါတီ (CCP)ရဲ့ ဆက်စပ်မှု ရှိနေကြောင်း ပြောကြားခဲ့ပါတယ်။
မတ်လ ၁၈ ရက်နေ့တုန်းက အမေရိကန်အထက်လွှတ်တော်ရဲ့ ထောက်လှမ်းရေးဆိုင်ရာ ကော်မတီဟာ အမေရိကန်ပေါ် ခြိမ်းခြောက်လာနိုင်တဲ့ တစ်ကမ္ဘာလုံးက အခြေအနေတွေနဲ့ ပတ်သက်လို့ နိုင်ငံရဲ့ ထောက်လှမ်းရေး အေဂျင်စီ အကြီးအကဲတွေဆီက တင်ပြချက်တွေကို ကြားနာခဲ့ပါတယ်။
Public Service Announcement
အဲဒီ အစီအစဉ်မှာအထက်လွှတ်တော်အမတ်ဂျိမ်းစ်လင့်ဖိုဒ်က အမေရီကန်နိုင်ငံသားတွေအပေါ် အွန်လိုင်းငွေလိမ်လုပ်ငန်းတွေရဲ့ ခြိမ်းခြောက်မှုပိုကြီးမားလာတာနဲ့ပတ်သက်ပြီးမေးမြန်းခဲ့ပါတယ်။
FBI ညွန်ကြားရေးမှူးကက်ရှ်ပက်တဲလ်ကပြန်လည်ဖြေကြားရာမှာကမ္ဘောဒီးယားနဲ့ မြန်မာတို့လို နိုင်ငံတွေမှာ ရှိနေတဲ့ ကျားဖြန့် လုပ်ငန်း အဆောက်အအုံ အများစုကို CCP ရဲ့ အားပေး ထောက်ခံမှုနဲ့ တည်ဆောက်ခဲ့တယ်ဆိုတာ အမေရိကန်က ကျောထောက်နောက်ခံပြုထားတဲ့စုံစမ်းစစ်ဆေးရေးရလဒ်တွေက ညွှန်ပြနေကြောင်း ထည့်သွင်း ပြောဆိုသွားခဲ့ပါတယ်။
ထိုင်း-မြန်မာနဲ့ ထိုင်း-ကမ္ဘောဒီးယား နယ်စပ်တွေမှာ အဓိက အခြေစိုက်တဲ့ ကျားဖြန့်ဂိုဏ်းတွေကို နှိမ်နင်းဖို့ သက်ဆိုင်ရာ နိုင်ငံအသီးသီးရဲ့ အာဏာပိုင်တွေနဲ့လည်း အမေရိကန်က ချိတ်ဆက်ထားပြီး ဖြစ်တယ်လို့ ပက်တဲလ်က ဆိုပါတယ်။
အဲဒီကျားဖြန့်ဂိုဏ်းတွေဟာ အမေရိကန် နိုင်ငံသားတွေနဲ့ အရှေ့တောင်အာရှဒေသတွင်းကသက်ကြီးရွယ်အိုတွေကို အဓိကထားပြီး ငွေကြေးလိမ်လည်နေကြောင်း၊ အဲဒီ ဂိုဏ်းတွေရဲ့ ခြံဝင်းတွေနဲ့ အဆောက်အအုံတွေ တည်ဆောက်မှုကို CCPက အားပေး ကူညီခဲ့ကြောင်း၊ အကြောင်းရင်းကတော့ အဲဒီဂိုဏ်းတွေဟာ အမေရိကန် ပြည်သူတွေကို နေ့တိုင်း ဒုက္ခပေးမယ်ဆိုတာ CCPက သဘောပေါက်ထားလို့ဖြစ်ကြောင်း ပက်တဲလ်က စွပ်စွဲ ပြောဆိုသွားပါတယ်။
သူကအမေရိကန်ပြည်ထောင်စုဟာကျားဖြန့် နှိမ်နင်းရေး အားထုတ်မှုတွေကို အရှိန်အဟုန် ဆက်လက် မြှင့်တင်သွားမယ်လို့လည်းပြောကြားခဲ့ပါတယ်။
နောက်ထပ် အမေရိကန်က လုပ်ဆောင်လာနိုင်တဲ့ ခြေလှမ်းကတော့ အဲဒီနိုင်ငံတွေဆီ သွားပြီး ကျားဖြန့်ဂိုဏ်းတွေကို တစ်ခုမကျန် ပိတ်ချပစ်တာမျိုး ဖြစ်နိုင်တယ်လို့ သူက ဆိုပါတယ်။ ဒေသတွင်း အစိုးရတွေနဲ့ ပူးပေါင်းပြီး ကျားဖြန့်ဂိုဏ်းတွေ အသုံးပြုနေတဲ့ အင်တာနက် ကွန်ရက်တွေကို ဖြတ်တောက်တာမျိုးတွေလည်း အမေရိကန်က လုပ်ဆောင်ခဲ့ကြောင်း ပက်တဲလ်က ဆက်ပြောပါတယ်။
FBIဟာ အရှေ့တောင်အာရှ ကျားဖြန့်ဂိုဏ်းတွေကို ဖော်ထုတ် ဖြိုခွင်းရေး မစ်ရှင်အတွက် ထိုင်းနိုင်ငံ၊ ဘန်ကောက်မြို့မှာ ထားရှိတဲ့ ရုံးခွဲနဲ့လည်း စဉ်ဆက်မပြတ် အဆက်အသွယ် လုပ်နေသလို ထိုင်းရဲတပ်ဖွဲ့၊ တခြား ဒေသတွင်း မိတ်ဖက်တွေနဲ့ပါ ပူးပေါင်းချိတ်ဆက်မှုတွေ ရှိနေကြောင်းသူက ဆိုပါတယ်။
FBI အေးဂျင့်တွေက ထိုင်းနိုင်ငံ နယ်စပ်ဖက်ကနေ မြန်မာဖက်ခြမ်း၊ ကရင်ပြည်နယ်၊ မြဝတီမြို့နယ်ထဲက ကျားဖြန့် လုပ်ငန်း အဆောက်အအုံတွေဆီ မှန်ဘီလူးနဲ့ လှမ်းကြည့်နေတဲ့ ဓာတ်ပုံတွေကိုလည်း မတ်လဆန်းပိုင်းမှာ FBIက ထုတ်ပြန်ခဲ့ပါတယ်။
ကိုးကား-PBS
