ဆိုက်ဘာ ငွေကြေးလိမ်လည်မှု (ကျားဖြန့်) လုပ်ငန်းတွေကို ပစ်မှတ်ထား ချိုးနှိမ်တိုက်ခိုက်ဖို့ ရည်ရွယ်ထားတဲ့ ဥပဒေ တစ်ရပ်ကို ကမ္ဘောဒီးယားမှာ ပထမဆုံးအကြိမ် ပြဋ္ဌာန်းလိုက်ပါတယ်။
အဲဒီဥပဒေဟာ နိုင်ငံတကာမှာ လူပေါင်းများစွာကို ဒေါ်လာ ဘီလီယံနဲ့ချီ နစ်နာဆုံးရှုံးမှုတွေ ကြုံတွေ့စေခဲ့တဲ့ ကျားဖြန့်လုပ်ငန်းတွေကို အဓိက ပစ်မှတ်ထားပြီး ရေးဆွဲထားတာ ဖြစ်ပါတယ်။
ကမ္ဘောဒီးယားဟာ အရှေ့တောင်အာရှရဲ့ ကျားဖြန့်လုပ်ငန်းတွေ အဆိုးဆုံး နိုင်ငံတစ်ခုအဖြစ် နာမည်ဆိုး ထွက်နေပြီး အဲဒီရာဇဝတ်ဂိုဏ်းတွေကို ထိထိရောက်ရောက် တိုက်ဖျက်ပေးဖို့ အစိုးရအပေါ် တောင်းဆိုမှုတွေလည်း မြင့်တက်လာနေပါတယ်။
ဧပြီ ၃ ရက်နေ့မှာတော့ တရားရေးဝန်ကြီး ကူးထ်ရစ်သ်က ဥပဒေသစ်အကြောင်း အတည်ပြု ကြေညာခဲ့ပြီး နိုင်ငံအနှံ့က ကျားဖြန့်လုပ်ငန်းတွေကို နှိမ်နင်းရာမှာ ပိုပြီး ရှင်းလင်းတိကျ ပြတ်သားလာအောင် ရည်ရွယ် ရေးဆွဲထားတယ်လို့ ပြောကြားခဲ့ပါတယ်။ ဒါ့အပြင် အဲဒီ ဥပဒေဟာ ကျားဖြန့်ဂိုဏ်းတွေကို ဖြိုခွဲပြီးရင် နောက်တစ်ကြိမ် ခေါင်းထောင်မလာအောင်လည်း ရည်ရွယ်ထားတယ်လို့ ဆိုပါတယ်။
Public Service Announcement
အဲဒီဥပဒေဟာ အွန်လိုင်း ကျားဖြန့် လုပ်ငန်းတွေ ကမ္ဘောဒီယားမှာ ထပ်ပြီး အခြေစိုက်ခွင့် မရနိုင်ဘူးဆိုတာ သေချာစေဖို့၊ ကမ္ဘောဒီးယား နိုင်ငံနဲ့ ပြည်သူတွေအတွက် အကျိုးရှိစေဖို့ ဘက်ပေါင်းစုံကနေ စဉ်းစားပြီး ရေးဆွဲထားကြောင်း ဝန်ကြီးက မှတ်ချက်ပေးခဲ့ပါတယ်။
ဥပဒေသစ်ကို လွှတ်တော်က အတည်ပြုပေးခဲ့ပြီး လုပ်ထုံးလုပ်နည်းအရ ကမ္ဘောဒီးယား ဘုရင်က တရားဝင် လက်မှတ်ရေးထိုး ပြီးတဲ့အခါ အသက်ဝင်လာမှာ ဖြစ်ပါတယ်။
ကျားဖြန့်လုပ်ငန်း လုပ်ကိုင်ကြောင်း ပြစ်မှုထင်ရှားသူတွေကို ၂ နှစ်ကနေ ၅ နှစ်ထိ ထောင်ဒဏ်ဖြစ်စေ၊ ဒေါ်လာ ၁၂၅၀၀၀ အထိ ငွေဒဏ်ဖြစ်စေ ချမှတ်နိုင်တယ်လို့ ဥပဒေသစ်က ဆိုပါတယ်။ ဒါတင် မကသေးဘဲ ငွေကြေး ခဝါချမှု၊ ကျားဖြန့် လုပ်ငန်းတွေအတွက် သားကောင်အဖြစ် ပစ်မှတ်ထားသူတွေရဲ့ အချက်အလက်တွေကို စုဆောင်းမှု၊ ကျားဖြန့် ဝန်ထမ်းတွေကို စည်းရုံးလူစုမှု ကျူးလွန်သူတွေကိုလည်း ရာဇဝတ်ကြောင်းအရ အရေးယူမှာ ဖြစ်ပါတယ်။
အစောပိုင်းတုန်းက ကမ္ဘောဒီးယား အစိုးရဟာ ပြည်တွင်းမှာ ကျားဖြန့်လုပ်ငန်းတွေ ကျယ်ကျယ်ပြန့်ပြန့် လည်ပတ်နေတယ် ဆိုတာကို ငြင်းဆိုခဲ့ပေမယ့် နိုင်ငံတကာ ဖိအားပေးမှုတွေ မြင့်တက်လာမှသာ အဲဒီ ဂိုဏ်းတွေကို ဖြိုခွင်းဖို့ ပိုမို အာရုံစိုက်လာခဲ့ပါတယ်။ အခုအခါမှာတော့ ပြည်တွင်းမှာ ရှိနေတဲ့ ရာနဲ့ချီ များပြားတဲ့ ကျားဖြန့်လုပ်ငန်းတွေကို အပြီးတိုင် ပိတ်သိမ်းစေဖို့နဲ့ ဂိုဏ်းခေါင်းဆောင်တွေကို ဖမ်းဆီးနိုင်ဖို့ အာရုံစိုက် လုပ်ဆောင်နေကြောင်း အာဏာပိုင်တွေက ပြောကြားထားပါတယ်။
ကိုးကား: Reuters
